សត្វគោ ក្របីសរុប២២៥ក្បាលនៅភូមិកងមាស ឃុំគោកបន្ទាយ ទទួលបានការចាក់វ៉ាក់សាំងការពារជំងឺសារទឹក
ខេត្តកំពង់ឆ្នាំង ៖ ប្រធានការិយាល័យផលិតកម្ម និង បសុព្យាបាល នៃមន្ទីរកសិកម្ម រុក្ខាប្រម៉ាញ់
ខេត្តកំពង់ឆ្នាំង ៖ ប្រធានការិយាល័យផលិតកម្ម និង បសុព្យាបាល នៃមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំង បានអំពាវនាវដល់បងប្អូនប្រជាពលរដ្ឋ សូមយកសត្វគោ ក្របីរបស់ខ្លួន មកទទួលការចាក់ វ៉ាក់សាំងការពារជំងឺសារទឹកឱ្យបានគ្រប់ៗគ្នា។ ការអំពាវនាវនេះបានធ្វើឡើង ក្នុងពេលដែលមន្ត្រីពេទ្យសត្វ ចុះចាក់វ៉ាក់សាំងការពារជម្ងឺ សារទឹក ដល់សត្វគោរបស់ប្រជាពលរដ្ឋ នៅភូមិកងមាស ឃុំគោកបន្ទាយ ស្រុករលាប្អៀរ នាព្រឹកថ្ងៃទី៤ ខែវិច្ឆិកា ឆ្នាំ២០២២។
លោក ក្រឹង សំអាត ប្រធានការិយាល័យផលិតកម្ម និង បសុព្យាបាល បានបន្តថា ដោយសារពេលនេះ មានការកើតជម្ងឺសារទឹកលើសត្វគោ ក្របីរបស់ប្រជាពលរដ្ឋ ដែលជាសត្វអូសទាញបំរើឱ្យវិស័យ កសិកម្ម ហើយមួយវិញទៀត គឺជារដូវដែលបងប្អូនប្រមូលផល ស្រូវរដូវវស្សាផងនោះ ថ្ងៃនេះ មន្ត្រីពេទ្យសត្វ បានសហការគ្នាជាមួយអាជ្ញាធរមូលដ្ឋាន បំផុសឱ្យបងប្អូនប្រជាពលរដ្ឋ នាំគោ ក្របីរបស់ខ្លួន មកចាក់ថ្នាំ ការពារជម្ងឺសារទឹក ឱ្យបានគ្រប់ៗគ្នា។ ជាមួយគ្នានេះ លោកសូមឱ្យបងប្អូនប្រជាពលរដ្ឋ ធ្វើអនាម័យលើសត្វរបស់ខ្លួន ដោយឱ្យដេកលើទីទួលគ្មានភក់ជ្រាំ ហើយបើសិនមានសត្វគោ ក្របីកើតជម្ងឺនេះសូមប្រញាប់រាយការណ៌ជាបន្ទាន់ដើម្បីមន្ត្រីជំនាញចុះមកព្យាបាលទាន់ពេលវេលា ។
ប្រធានការិយាល័យផលិតកម្ម និង បសុព្យាបាលខេត្តកំពង់ឆ្នាំង ក៍បានផ្តល់សេរ៉ាង ម្ជុល ថ្នាំ និង សម្ភារៈ មួយចំនួន ដល់ពេទ្យសត្វគ្រប់ភូមិក្នុងឃុំគោកបន្ទាយ ដើម្បីយកទៅជួយចាក់លើសត្វគោ ក្របីរបស់ប្រជាពលរដ្ឋ តាមភូមិរបស់ខ្លួនរាងៗខ្លួនផងដែរ ។
សូមបញ្ជាក់ដែរថា រយៈពេលមួយព្រឹកថ្ងៃទី៤ ខែវិច្ឆិកា មន្ត្រីពេទ្យសត្វបានចាក់វ៉ាក់សាំង ដល់គោក្របីប្រជាពលរដ្ឋបានចំនួន ២២៥ក្បាល៕
ចែករំលែកព័តមាននេះ