រាជធានីភ្នំពេញ ៖ គណៈប្រតិភូព្រឹទ្ធសភាបារាំងមួយក្រុមដឹកនាំដោយលោកជំទាវកាតឺរីន តាស្កា (Catherine Tasca) អតីតរដ្ឋមន្ដ្រីក្រសួងវប្បធម៌ បច្ចុប្បន្នជាអនុប្រធានទី១នៃព្រឹទ្ធសភា និងជាប្រធានក្រុមមិត្ដភាពព្រឹទ្ធ សភាបារាំង-កម្ពុជាអញ្ជើញមកបំពេញទស្សនកិច្ចនៅប្រទេសកម្ពុជាពីថ្ងៃទី២៤ ដល់ថ្ងៃទី៣០ ខែមករា ។
ដំណើរទស្សនកិច្ចនេះ ធ្វើឡើងក្នុងគោល បំណងពិនិត្យលទ្ធផលការងារកិច្ចសហប្រតិបត្ដិ ការដែលកំពុងអនុវត្ដជាមួយព្រឹទ្ធសភាកម្ពុជា ជាពិសេសក្នុងក្របខណ្ឌនៃបណ្ដាប្រទេសនិយាយភាសាបារាំង (ហ្វ្រង់កូហ្វូនី) និងកំណត់ទស្សន វិស័យសំរាប់អនាគត ។ ក្នុងឱកាសទស្សនកិច្ចនេះ លោកជំទាវតាស្ការួមជាមួយព្រឹទ្ធសមាជិកកម្ពុជា នឹងអញ្ជើញធ្វើសិក្ខាសាលាមួយពាក់ព័ន្ធនឹងតួនាទីរបស់សមាជិកព្រឹទ្ធសភា ក្រោមប្រធានបទ «ការងារនីតិកម្ម ការពិនិត្យការអនុវត្ដច្បាប់ និងសកម្មភាពក្នុងមូលដ្ឋាន»។
ក្នុងដំណើរទស្សនកិច្ចនេះ គណៈប្រតិភូព្រឹទ្ធសភាបារាំងក៏ចូលក្រាបបង្គំគាល់ ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជាផងដែរ ព្រមទាំងជួបសវនាការជាមួយសម្ដេចជា ស៊ីម ប្រធានព្រឹទ្ធសភាលោកងួន ញិល អនុ ប្រធានទី១រដ្ឋសភា និងសម្ដេចហ៊ុន សែន នាយករដ្ឋមន្ដ្រីនៃរាជរដ្ឋាភិបាលកម្ពុជា ។ ក្រៅពីនេះលោកជំទាវធ្វើដំណើរទៅកាន់ខេត្ដសៀមរាបដែលនៅទីនោះ គណប្រតិភូជួបពិភាក្សាជាមួយលោកស៊ូ ភិរិន្ទ អភិបាលខេត្ដ ព្រមទាំងទស្សនាសាលាបារាំង និងថ្នាក់ពីរភាសានៅក្រុងទេសចរណ៍នេះ ៕
ចែករំលែកព័តមាននេះ