ឆេះតូបលក់ដូរក្នុងផ្សារផេនសល មាត់ទន្លេ ផ្អើលទាំងព្រលឹម
រាជធានីភ្នំពេញ ៖ អគ្គិភ័យឆេះតូបលក់គ្រឿងអលង្ការ និងតូបលក់គ្រឿងភេសជ្ជៈ ដែលមានទី
រាជធានីភ្នំពេញ ៖ អគ្គិភ័យឆេះតូបលក់គ្រឿងអលង្ការ និងតូបលក់គ្រឿងភេសជ្ជៈ ដែលមានទីតាំងនៅក្នុងផ្សារទំនើបផេនសលមាត់ទន្លេ បង្កការភ្ញាក់ផ្អើលទាំងព្រឹកព្រលឹមដល់កម្លាំងពន្លត់អគ្គីភ័យចេញជួយអន្តរាគមន៍។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៥ និង១០នាទីព្រឹក ថ្ងៃទី៤ ខែវិច្ឆិកា ឆ្នាំ២០២២ ទីតាំងកើតហេតុស្ថិតនៅផ្សារទំនើបផេនសល ក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញភ្លើងឆេះចេញពីតូបនៅក្នុងផ្សារទំនើបផេនសល ចេញជាអណ្តាតភ្លើងបានលេបត្របាក់តូបរបស់អាជីវករអស់ចំនួន២តូប ជាតូបលក់គ្រឿងអលង្កា និងភេសជ្ជៈ។ ភ្លាមៗនោះប្រជាពលរដ្ឋបានផ្តល់ដំណឹងទៅកាន់សមត្ថកិច្ចមូលដ្ឋាន ដើម្បីទាក់ទងទៅកាន់ ការិយាល័យនគរបាលបង្ការពន្លត់អគ្គិភ័យ និងសង្គ្រោះ បានចេញរថយន្តចំនួន៤គ្រឿងដើម្បីចេញ ធ្វើការអន្តរាគមន៍បាញ់ពន្លត់ទាន់ពេលវេលា និងមិនបណ្តាលឲ្យនរណាម្នាក់រងរបួសនោះទេ។
បច្ចុប្បន្ន អគ្គិភ័យត្រូវបានរលត់ទាំងស្រុង ក្នុងនោះលោក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានអោយដឹងជាបឋមថា ករណីអគ្គិភ័យខាងលើនេះ សមត្ថកិច្ចជំនាញកំពុងធ្វើការស្រាវជ្រាវ ដើម្បីស្វែងរកមូលហេតុនៃការឆាបឆេះនៅពេលក្រោយផងដែរ៕
ចែករំលែកព័តមាននេះ