ពលរដ្ឋថាទីតាំងធ្វើអាជីវកម្មឧស្ម័នកណ្តាលក្រុងបង្កហានិភ័យ
ខេត្តស្ទឹងត្រែង ៖ ប្រជាពលរដ្ឋជាច្រើនគ្រួសារនៅចំណុចភូមិផុក សង្កាត់ស្ទឹងត្រែង ក្រុងស្ទឹងត្រែង បានត្អូញត្អែ និងបិទទ្វារផ្ទះដោយទ្រាំទ្រនឹងចំហាយឧស្ម័នហ្គាស
ខេត្តស្ទឹងត្រែង ៖ ប្រជាពលរដ្ឋជាច្រើនគ្រួសារនៅចំណុចភូមិផុក សង្កាត់ស្ទឹងត្រែង ក្រុងស្ទឹងត្រែង បានត្អូញត្អែ និងបិទទ្វារផ្ទះដោយទ្រាំទ្រនឹងចំហាយឧស្ម័នហ្គាស ព្រមទាំងការផ្ទុះប្រឈមហានិភ័យគ្រប់ពេល។ ប្រជាពលរដ្ឋនិយាយថា ពួកគាត់មិនអាចរស់នៅក្នុងផ្ទះរបស់ខ្លួនបានគ្រប់គ្រាន់នោះទេ ប្រសិនជានៅក៏មិនស្ងប់នោះដែរ ព្រោះពេលសម្រាកខ្លះលាន់ស្នូរផ្ទុះចេញពីផ្ទះធ្វើអាជីវកម្មបញ្ចូលហ្គាស លក់ហ្គាសក្បែនោះ សមាជិកគ្រួសារស្លន់ស្លោ តែផ្ទះធ្វើអាជីវកម្មនោះគិតថាជារឿងធម្មតា។
ប្រជាពលរដ្ឋទាំងនោះបានសំណូមពរទៅអាជ្ញាធរ និងអង្គភាពមន្ទីរពាក់ព័ន្ធចុះទៅសម្របសម្រួលដល់ម្ចាស់អាជីវកម្មដើម្បីលើកទីតាំងដាក់ក្រៅទីប្រជុំជនធានាបានសុវត្ថិភាពប្រជាពលរដ្ឋកណ្តាលទីក្រុង។ ប្រភពពីមន្ត្រីអង្គភាពពន្ធដាម្នាក់សុំមិនបញ្ចេញឈ្មោះលោកបាននិយាយថា ទីតាំងធ្វើអាជីវកម្មលក់ និងបញ្ចូលហ្គាសនោះអង្គភាពរបស់លោកព្រមទាំងកម្លាំងនគរបាលក្រុងអាជ្ញាធរក្រុងផងនោះ បានចុះធ្វើការណែនាំអប់រំឲ្យផ្លាស់ប្តូរទីតាំងក្រោយពលរដ្ឋប្តឹង តែក្រោយមកគ្មានប្រសិទ្ធភាពសោះ។
លោក សាយ កុសល អភិបាលរងក្រុងស្ទឹងត្រែងបានបានប្រាប់នៅរសៀលថ្ងៃទី២០ មេសា ២០១៧ នេះថា កាលពីឆ្នាំ២០១៣ និង២០១៤ មានបណ្តឹងពលរដ្ឋច្រើនហើយអាជ្ញាធរក្រុងក៏បានចុះត្រួតពិនិត្យ និងសួរនាំម្ចាស់អាជីវកម្មគាត់ប្រាប់ថា មានការអនុញ្ញាតពីមន្ទីររ៉ែ និងថាមពល។ លោកបន្តថា ក្រោយមកលោកបានហៅមន្ទីរ និងអង្គភាពពាក់ព័ន្ធទៅពិនិត្យបន្ថែមព្រមទាំងបំភ្លឺ ដោយកាលនោះមន្ទីរសាមីបានបំភ្លឺថា ទីតាំងនោះមានសុវត្ថិភាពមិនមានបញ្ហាតែលោកបានបញ្ជាក់ទៅមន្ទីរសាមីវិញថា សម្រាប់ទីតាំងសុវត្ថិភាពមិនសុវត្ថិភាពលើមន្ទីរសាមីជាអ្នកពិនិត្យ ប៉ុន្តែពលរដ្ឋគាត់មានការភ័យខ្លាច និងប៉ះពាល់សុខភាពរស់នៅប្រចាំថ្ងៃ។
លោកបន្តថា ទាក់ទងការធ្វើអាជីវកម្មហ្គាសខាងលើមានអង្គភាព និងមន្ទីរសាមី យើងដឹងហើយថាហ្គាសជាឧស្ម័នចំហាយប៉ះពាល់ក្លិនលើបរិស្ថានដូច្នេះយើងហៅមន្ទីរបរិស្ថានចូលរួមហើយឧស្ម័នហ្គាសនេះដែរវាអាចបង្កជាអគ្គិភ័យ ដូច្នេះអគ្គិភ័យស្នងការដ្ឋាននគរបាលខេត្តក៏បានចូលរួមដែរ។ លោកអភិបាលរងបន្ថែមថា អាជ្ញាធរក្រុងបានដាក់ផែនការរួចហើយដោយបានកំណត់ថាក្រោយចប់ពិធីបុណ្យចូលឆ្នាំអាជ្ញាធរត្រូវ ឲ្យម្ចាស់អាជីវកម្មរកទីតាំងថ្មីក្រៅពីប្រជុំជនដោយមានមន្ទីរសាមី និងអង្គភាពពាក់ព័ន្ធចុះទៅម្តងទៀត។
ការធ្វើអាជីវកម្មហ្គាសនេះដែរពលរដ្ឋអ្នកគាំទ្រជាច្រើនបានបញ្ចេញមតិរិះគន់ផងដែរថា ពួកគាត់មានផលលំបាកណាស់អំពីការប្រើប្រាស់ជាពិសេសបញ្ហាសំបកកំប៉ុងខូចគុណភាពអ្នកធ្វើអាជីវកម្មនោះមិនដូរថ្មីទេ បើទោះដឹងថាសំបកកំប៉ុងនោះច្រេះចាប់ និងចាស់ទៅហើយគាត់បែរជាបាញ់ថ្នាំស្ព្រាយពណ៌សបិតបាំង។ ពួកគាត់បន្តថាក្រោយពីពួកគាត់បារម្ភក៏បានទិញសំបកកំប៉ុងថ្មីទៅប្តូរតាមចំណុះហ្គាសមកប្រើតែទទួលមកវិញសំបកចាស់ដដែល ពេលប្រើប្រាស់ចំហាយហ្គាសចេញក្រៅឆាប់ចេញជាភ្លើង និងផ្ទុះថែមទៀត។
ពលរដ្ឋអ្នកគាំទ្រលើកឡើងថា ពួកគេបានដឹងហើយថា ហ្គាសត្រូវផ្ទេរចែករំលែកពីដបធំចូលកំប៉ុងតូចដោយប្រើដុំទឹកកកជំនួយហើយដុំទឹកកកនោះទៀតប្រើប្រាស់ដោយអំបិល និងជីរួមផ្សំឲ្យឆាបរឹងក្រោយពេលដែលដុំទឹកកករលាយសំបកកំប៉ុងទាំងនោះជាប់ដោយជាតិប្រៃលុះត្រូវកម្ដៅថ្ងៃសំបកកំប៉ុងងាយច្រេះចាប់ខូចតែដោយសារតម្រូវការតាមអ្នកប្រើប្រាស់ម្ចាស់អាជីវកម្មមិនខ្វះពីកក្តាហានិភ័យកើតឡើងនោះឡើយ ហើយអគ្គិភ័យមួយចំនួនកន្លងមកក៏កើតរួចមកហើយអំពីគុណភាពហ្គាសនេះ៕
ចែករំលែកព័តមាននេះ