រាជធានីភ្នំពេញ ៖ ជនជាតិបរទេសម្នាក់វ័យជាង៣៧ឆ្នាំ ស្រវឹងស្រាបែកគំនិតឈ្លោះប្រកែកគ្នាជាមួយសង្សារ និងដេញវាយសង្សារ តែត្រូវប្រជាពលរដ្ឋជួយឃាត់ បែរជាជនបរទេសនោះដេញវាយប្រជាពលរដ្ឋ រួមទាំងសមត្ថកិច្ចទៀត ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១០និង១៥នាទីយប់ ថ្ងៃទី១៩ ខែមេសា ឆ្នាំ២០១៧ តាមបណ្តោយផ្លូវព្រះស៊ីសុវត្ថិ នៅចំណុចមាត់ទន្លេ ស្ថិតនៅក្នុងសង្កាត់ជ័យជំនះ ខណ្ឌដូនពេញ ។
សាក្សីដែលឃើញហេតុការណ៍បានឱ្យដឹងថា មុនពេលកើតហេតុគេបានឃើញជនជាតិបរទេសម្នាក់ជិះម៉ូតូធុនធំម៉ាក Kawasaki ពណ៌លឿង ពាក់ស្លាកលេខភ្នំពេញ 1BX8995 មិនដឹងថា ទើបតែចេញមកពីណានោះទេ ថែមទាំងស្រវឹងស្រាជោកជាំធ្វើដំណើរមកតាមបណ្តោយផ្លូវព្រះស៊ីសុវត្ថិ ក្នុងទិសដៅពីត្បូងទៅជើង ពេលមកដល់ចំណុចកើតហេតុក៏បានឈប់ម៉ូតូ ហើយឈ្លោះប្រកែកគ្នាជាមួយសង្សារជាជនជាតិខ្មែរដែលជិះម៉ូតូមួយគ្រឿងទៀត ម៉ាក Nex ពណ៌ស មិនចាំស្លាកលេខ ។ ខណៈពេលឈប់ម៉ូតូឈ្លោះប្រកែកគ្នាហើយ ជនជាតិបរទេសរូបនោះបានវ៉ៃសង្សារខ្លួនឯងទៀតផង ភ្លាមៗនោះដែរប្រជាពលរដ្ឋនៅម្តុំនោះឃើញក៏នាំគ្នាចូលទៅជួយឃាត់ តែត្រូវជនជាតិបរទេសនោះដេញវាយគេឯងផ្អើលពេញផ្លូវ មាត់ទន្លេតែម្តង ។ លុះពេលសមត្ថកិច្ចនាំគ្នាមកជួយអន្តរាគមន៍ដើម្បីកុំឱ្យឈ្លោះប្រកែកគ្នា និងប្រាប់ឱ្យត្រឡប់ទៅផ្ទះរៀងៗខ្លួន ក៏ត្រូវជនជាតិបរទេសនោះរកវ៉ៃទាំងសមត្ថកិច្ច រហូតដល់សមត្ថកិច្ចខឹងគំរាមរកឃាត់ខ្លួន ទើបសង្សាររបស់គេបាននិយាយប្រាប់ជនជាតិបរទេសឲ្យឈប់ប្រព្រឹត្តទៀត ។
ក្រោយពេលកើតហេតុសង្សាររបស់ជនជាតិបរទេសបានហាមឃាត់ជនជាតិបរទេស រួចប្រាប់ឱ្យបណ្តើរម៉ូតូត្រឡប់ទៅផ្ទះ ដើម្បីកុំឱ្យមានរឿងបន្តទៀត ៕
ចែករំលែកព័តមាននេះ