កម្ពុជាទទួលបានការសរសើរពីបណ្ដាប្រទេសអាស៊ីចំពោះការជំរុញចលនាស្ដ្រីក្នុងកីឡា
- ភ្នំពេញ
រាជធានីភ្នំពេញ ៖ កម្ពុជា បានទទួលការកោតសរសើរ និងវាយតម្លៃខ្ពស់ ចំពោះការជំរុញចលនាស្ដ្រី
រាជធានីភ្នំពេញ ៖ កម្ពុជា បានទទួលការកោតសរសើរ និងវាយតម្លៃខ្ពស់ ចំពោះការជំរុញចលនាស្ដ្រីក្នុងវិស័យកីឡា ។ នេះបើតាមការបញ្ជាក់របស់លោក ញ៉ាន សុខវិសាល ប្រធាននាយកដ្ឋានទំនាក់ទំនងកិច្ចការអន្ដរជាតិ បន្ទាប់ពីលោកបានចូលរួមសិក្ខាសាលាស្តីពីសមភាពយែនឌ័រក្នុងវិស័យកីឡា Olympic Council of Asia Gender Equity seminar នៅប្រទេសបារ៉ែន កាលពីពេលថ្មីៗនេះ។
លោក ញ៉ាន សុខវិសាល បានឲ្យដឹងថា សិក្ខាសាលានេះ មានរយៈពេល២ថ្ងៃ នៅថ្ងៃទី៣០-៣១
ខែតុលា ឆ្នាំ២០២២ ដោយមានតំណាងគណៈកម្មាធិការជាតិអូឡាំពិក នៃបណ្ដាប្រទេសអាស៊ីចំនួន៤២ប្រទេសចូលរួម ពិសេសផ្នែកគណៈកម្មការស្ដ្រី និងកីឡា ក្នុងនោះក៏មានវត្តមានតំណាងគណៈ
កម្មាធិការជាតិអូឡាំពិកកម្ពុជា ២រូបដែរ គឺរូបលោក និងលោកស្រី ប្រាក់ សម្ផស្ស អនុប្រធានគណៈកម្មការស្ដ្រី និងកីឡា ។
លោកថា ក្នុងចំណោមប្រតិភូអូឡាំពិកអាស៊ីទាំង៤២ប្រទេស ដែលចូលរួមសិក្ខាសាលាខាងលើ មានតែ៤ប្រទេសប៉ុណ្ណោះ ដែលត្រូវបានជ្រើសរើសឱ្យធ្វើបទបង្ហាញ ក៏ដូចជាចែករំលែកពីចលនាស្ដ្រីក្នុងវិស័យកីឡា តាមប្រទេសរបស់ខ្លួន រួមមានកម្ពុជា ប៊ូតាន ម៉ុងហ្គោលី និងម្ចាស់ផ្ទះបារ៉ែន។
លោក ញ៉ាន សុខវិសាល បន្ដថា បទបង្ហាញរបស់យើង គឺគណៈកម្មាធិការជាតិអូឡាំពិកកម្ពុជា បានផ្ដោតការយកចិត្តទុកដាក់លើការលើកកម្ពស់ស្ដ្រីរបៀបយ៉ាងម៉េចក្នុងចលនាអូឡាំពិក ពិសេសកំឡុងពេលកូវីដ-១៩ ។ យើងក៏បានរៀបចំសិក្ខាសាលារបស់ស្ដ្រីផងដែរ ។ ជាក់ស្ដែងពេលនោះ យើងបានរៀបចំឲ្យ ស៊ន សៀវម៉ី និង ហែមថុន វិទិនី ចែករំលែក លើកទឹកចិត្ត និងបង្ហាញនូវរបៀបហាត់ប្រាណមួយចំនួន ដើម្បីឲ្យពួកគាត់ហាត់ប្រាណជាប្រចាំ តាមការណែនាំរបស់ពួកយើង ដើម្បីកុំឲ្យពួកគាត់ស្ដ្រេស កំឡុងពេលបិទខ្ទប់នៅផ្ទះ ដោយសារវិបត្តិកូវីដ-១៩ នោះ ។
ជាចុងក្រោយលោកបានសង្កត់ធ្ងន់ថា តាមរយៈការធ្វើបទបង្ហាញរបស់យើងនេះ យើងបានទទួលការកោតសរសើរពីបណ្ដាប្រទេសជាមិត្តក្នុងទ្វីបអាស៊ីទាំងអស់ថា កម្ពុជាធ្វើបទបង្ហាញបានយ៉ាងល្អ ពិសេសគឺការជំរុញចលនាស្ដ្រីក្នុងវិស័យកីឡានេះតែម្ដង ៕
ចែករំលែកព័តមាននេះ