អាជ្ញាធរក្រុងចុះរៀបចំសណ្តាប់ធ្នាប់ផ្សារ និងប្រើគោលការណ៍៣ កំណត់ឲ្យអាជីវករគោរពតាម
- ស្ទឹងត្រែង
បន្ទាប់ពីលោកអភិបាលខេត្ត ស្វាយ សំអ៊ាង ចុះសួរសុខទុក្ខក្រុមអាជីវករ និងពិនិត្យស្ថានភាពនៅជុំវិញបរិវេណផ្សារកន្លងទៅថ្មីៗនេះ
ខេត្តស្ទឹងត្រែង ៖ បន្ទាប់ពីលោកអភិបាលខេត្ត ស្វាយ សំអ៊ាង ចុះសួរសុខទុក្ខក្រុមអាជីវករ និងពិនិត្យស្ថានភាពនៅជុំវិញបរិវេណផ្សារកន្លងទៅថ្មីៗនេះ នៅព្រឹកថ្ងៃទី៣១ ខែតុលា ឆ្នាំ២០២២នេះ គណៈកម្មការផ្សារសាមគ្គីស្ទឹងត្រែង បានចាត់វិធានការក្ដៅ ដើម្បីរៀបចំសណ្ដាប់ធ្នាប់របៀបរៀបរយនៅជុំវិញបរិវេណផ្សារសាមគ្គីស្ទឹងត្រែង។
ក្នុងប្រតិបត្តិការខាងលើនេះ អាជ្ញាធរប្រើគោលការណ៍ចំនួន៣ ត្រូវបានកំណត់ឲ្យអាជីវករត្រូវតែគោរពតាម នោះគឺ ៖
១- អ្នកលក់ដូរក្នុងផ្សារ និងជុំវិញផ្សារទាំងអស់ ត្រូវដាក់អីវ៉ាន់ត្រឹមគំនូសដែលបានរៀបចំ ហើយមិនអនុញ្ញាតឲ្យដាក់តាំងលក់ហួសខឿន ឬលើផ្លូវចូលផ្សារឡើយ,
២- ចំពោះប្រជាពលរដ្ឋលក់ដូរបន្លែ ផ្លែឈើ ត្រីសាច់នៅលើខឿន ឬលើផ្លូវជុំវិញផ្សារ និងខាងជើងផ្សារទាំងអស់ មិនអនុញ្ញាតឲ្យលក់ដូរបន្តទៀតឡើយ គឺត្រូវរកទីតាំងលក់ដោយខ្លួនឯង។
៣- ម្ចាស់ម៉ូតូដែលបានចតអនាធិបតេយ្យជុំវិញផ្សារ ក៏ត្រូវយកទៅផ្ញើឲ្យបានសមរម្យដែរ។
ក្នុងករណីមិនគោរពតាមការណែនាំនេះ នៅពេលអាជ្ញាធរចុះរៀបចំសណ្ដាប់ធ្នាប់ ប៉ះពាល់ខូចខាតទ្រព្យសម្បត្តិ អាជ្ញាធរមិនទទួលខុសត្រូវឡើយ។
ជាមួយគ្នានេះ ក៏មានអាជីវករខ្លះមិនសប្បាយចិត្តផងដែរ ដោយសារតែពួកគាត់ចោទថា មិនស្មើភាពគ្នា។ ម្យ៉ាងចំពោះអ្នកលក់ដូរកញ្ច្រែងល្អីតូចតាច មានបន្លែត្រីសាច់បន្តិចបន្តួចយកមកពីតាមភូមិ ក៏ត្រូវហាមឃាត់ដែរ ដោយពួកគាត់ចោទថា អាជ្ញាធរមិនបានរកទីតាំងឲ្យពួកគាត់បានលក់ដូរនឹងគេនោះឡើយ។
សូមបញ្ជាក់ផងដែរថា កន្លងមក ក្រុមអាជីវករតាំងពីអ្នកមកតាមភូមិ និងអ្នកលក់ក្នុងផ្សារ បាននាំគ្នាចេញមកលក់នៅលើផ្លូវសាធារណៈជាហូរហែ ដែលជាហេតុធ្វើឲ្យកកស្ទះចរាចរណ៍ និងបាត់បង់សោភណភាពទីក្រុង៕
ចែករំលែកព័តមាននេះ