ប្រមុខដឹកនាំកីឡាកាយសម្ព័ន្ធឱ្យពង្រឹងលើកត្តា៥ចំណុចដើម្បីស៊ីហ្គេម២០២៣
- ភ្នំពេញ
រាជធានីភ្នំពេញ ៖ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានសហព័ន្ធ
រាជធានីភ្នំពេញ ៖ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានសហព័ន្ធកីឡាកាយសម្ព័ន្ធកម្ពុជា បានជំរុញគណៈកម្មការប្រតិបត្តិសហព័ន្ធពង្រឹងលើកត្តា៥ចំណុចសម្រាប់កីឡាកាយសម្ព័ន្ធដើម្បីត្រៀមដណ្តើមមេដាយស៊ីហ្គេម ឆ្នាំ២០២៣នៅកម្ពុជា។
ក្នុងពិធីបិទការប្រកួតជើងឯកថ្នាក់ជាតិកីឡាកាយសម្ព័ន្ធកាលពីថ្ងៃទី២៧ ខែតុលា កន្លងទៅនេះ ឯកឧត្តមបណ្ឌិត ថោង ខុន បានលើកឡើងពីចំណុចទាំង៥ខាងលើថា ១-បណ្តុះបណ្តាលថ្នាក់ថ្នាលតាមកម្រិតអាយុ និងបង្កើនបរិមាណ-គុណភាពកីឡាករ កីឡាការិនី ក្លិប សមាគមកីឡាកាយសម្ព័ន្ធឱ្យបានទូលំទូលាយ។ ២-ពង្រឹងសមត្ថភាពអាជ្ញាកណ្ដាល ចៅក្រម មន្ត្រីបច្ចេកទេសឱ្យកាន់តែល្អប្រសើរ ទាំងបរិមាណ និងគុណភាព។
៣-ជំរុញឱ្យមានការរៀបចំការប្រកួតឱ្យបានច្រើន ការហ្វឹកហាត់ជាប្រចាំនៅតាមបណ្តាក្លិប សមាគម។ ៤-ពង្រឹងរចនាសម្ព័ន្ធគ្រប់គ្រងសហព័ន្ធ ក្លិប សមាគមទូទាំងប្រទេសឱ្យបានរឹងមាំ និងស្វែងរកដៃគូអភិវឌ្ឍបន្ថែមទៀត និង៥-ជំរុញឱ្យមានការចូលរួមប្រកួតជាលក្ខណៈអន្តរជាតិឱ្យបានច្រើនមុនពេលស៊ីហ្គេម លើកទី៣២ ឆ្នាំ២០២៣ ចូលមកដល់។
គួរឱ្យដឹងផងដែរថា បច្ចុប្បន្ននេះ អត្តពលិកកីឡាកាយសម្ព័ន្ធកម្ពុជាចំនួន១០រូប និងគ្រូជំនួយម្នាក់
កំពុងហ្វឹកហាត់នៅប្រទេសចិនរហូតដល់កីឡាស៊ីហ្គេម នាខែឧសភា ឆ្នាំ២០២៣ ទើបវិលត្រឡប់មកវិញដើម្បីប្រកួតតែម្តង ។
កាលស៊ីហ្គេម លើកទី៣១ ឆ្នាំ២០២១ (លើកឆ្នាំ២០២២) នៅប្រទេសវៀតណាម ក្រុមកីឡាកាយសម្ព័ន្ធកម្ពុជាធ្វើបានល្អមែនទែនដោយទទួលបានមេដាយប្រាក់៣គ្រឿង និងសំរឹទ្ធ១គ្រឿងដែលជាប្រវត្តិសាស្ត្រដំបូងសម្រាប់កីឡាកាយសម្ព័ន្ធកម្ពុជា ៕
ចែករំលែកព័តមាននេះ