អ្នករស់ប៊ូឌិញមិនទទួលយកលទ្ធផលនៃអង្គប្រជុំនៅក្រសួងដែនដី
រាជធានីភ្នំពេញ ៖ លទ្ធផលនៃកិច្ចប្រជុំពិភាក្សាអំពីការអភិវឌ្ឍអាគារប៊ូឌិញនៅក្រសួងរៀបចំដែនដីនគររូបនីយកម្មនិងសំណង់ នាព្រឹកថ្ងៃទី០៧ មេសា ២០១៧
រាជធានីភ្នំពេញ ៖ លទ្ធផលនៃកិច្ចប្រជុំពិភាក្សាអំពីការអភិវឌ្ឍអាគារប៊ូឌិញនៅក្រសួងរៀបចំដែនដីនគររូបនីយកម្មនិងសំណង់ នាព្រឹកថ្ងៃទី០៧ មេសា ២០១៧
រាជធានីភ្នំពេញ ៖ លទ្ធផលនៃកិច្ចប្រជុំពិភាក្សាអំពីការអភិវឌ្ឍអាគារប៊ូឌិញនៅក្រសួងរៀបចំដែនដីនគររូបនីយកម្មនិងសំណង់ នាព្រឹកថ្ងៃទី០៧ មេសា ២០១៧ គឺអ្នករស់នៅអាគារប៊ូឌិញប្រមាណជិត៥០០គ្រួសារ បាននាំគ្នាបដិសេធមិនទទួលយកដំណោះស្រាយរបស់លោកទេសរដ្ឋមន្ដ្រី ជា សុផារ៉ា រដ្ឋមន្ដ្រីក្រសួងរៀបចំដែនដីនគរូបនីយកម្មនិងសំណង់ ដោយសារផ្ដល់តម្លៃថ្លៃផ្ទះថោកជាងទីផ្សារមេឃនិងដី ធ្វើឲ្យពួកគាត់មិនអាចយកលុយទៅទិញផ្ទះចែកកូនចៅរស់នៅបានតទៅមុនទៀតឡើយ។
នៅក្នុងអង្គប្រជុំខាងលើនេះលោក ជា សុផារ៉ា បានលើកឡើងថា បើបងប្អូនរង់ចាំទទួលយកគម្រោងអភិវឌ្ឍន៍នៅនឹងកន្លែងនាថ្ងៃអនាគតរយៈពេល៤ឆ្នាំក្រោយ បងប្អូនអាចយកបន្ទប់នៃចំណែកផ្ទះបងប្អូនជួលក្នុងមួយខែបានតម្លៃចាប់ពី១៥០០ទៅ២០០០ដុល្លារ តែបើបងប្អូនសម្រេចចិត្ដលក់ផ្ទះវិញ គឺក្រុមហ៊ុនវិនិយោគរបស់ជប៉ុន គេហ៊ានទិញដីតំបន់ប៊ូឌិញដែលមានទំហំផ្ទះចាប់ពី៤០ម៉ែត្រការ៉េឡើងក្នុងតម្លៃ១ម៉ែត្រការ៉េស្មើនឹង១២៦៣ដុល្លារ។
ចំពោះតម្លៃដែលលើកឡើងដោយលោក ជា សុផារ៉ា ម្ចាស់ផ្ទះក្នុងអាគារប៊ូឌិញទាំងអស់បានប្រកែកដាច់អហង្ការតែម្ដង ដោយសារតម្លៃនេះទាបជាងទីផ្សារហួសហេតុជ្រុលពេក។ ជាមួយនឹងការបដិសេធរបស់ប្រជាពលរដ្ឋ លោកជា សុផារ៉ា បានបង្ហើបថា លោកអាចចរចារជាមួយភាគីអ្នកទិញក្នុងតម្លៃចន្លោះពី១៣០០ទៅ១៣៥០ដុល្លារ ក្នុង១ម៉ែត្រការ៉េនៃទំហំផ្ទះនីមួយៗ។
ឆ្លើយឆ្លងគ្នាក្នុងអង្គប្រជុំប្រជាពលរដ្ឋប្រមាណ២ទៅ៣គ្រួសារ បានសំណូមពរសុំតម្លៃ២២០០ដុល្លារក្នុង១ម៉ែត្រការ៉េ។ ដោយឡែកអ្នកផ្សេងទៀតស្ទើរតែទាំងស្រុងបានខ្សឹបតៗគ្នាថា មិនលក់ទេតម្លៃខាងលើនេះ គឺលក់ក្នុងតម្លៃយ៉ាងទាបបំផុត១ម៉ែត្រការ៉េ៥០០០ដុល្លារនៃទំហំផ្ទះជាក់ស្ដែង បើក្រុមហ៊ុនវិនិយោគទិញបានក៏ទិញទៅ បើទិញមិនបានក៏ហីទៅចុះ។
ដោយឡែកអ្នកមានផ្ទះនៅជាន់ផ្ទាល់ដីវិញរិតតែលែងលក់ទៅទៀត ចំពោះតម្លៃនេះ ដោយចាត់ទុកថា អង្គប្រជុំហាក់បីដូចជាមានចេតនាមើលងាយប្រជាពលរដ្ឋអ្នករស់នៅអាគារប៊ូឌិញ ដែលអ្នកខ្លះទិញផ្ទះរស់នៅក្នុងតំបន់ប៊ូឌិញតាំងពី២០ ឬ៣០ឆ្នាំមកម្ល៉េះ។ ពួកគាត់សួរថា បើសិនជាពួកគាត់ទិញផ្ទះរស់នៅក្នុងរាជធានីភ្នំពេញក្រៅពីតំបន់អាគារប៊ូឌិញ ប៉ុន្ដែមានទីតាំងក្បែរគ្នានោះដែរ គឺផ្ទៃក្រឡាផ្ទះគិតជាម៉ែត្រការ៉េ១ម៉ែត្រមិនក្រោមមួយម៉ឺនដុល្លារ ហើយតម្លៃនេះក៏គ្មានអ្នកណាលក់នៅជុំវិញអាគារប៊ូឌិញនោះដែរ។
បញ្ហាមួយទៀតអ្នកជាន់ផ្ទាល់ដីខ្លះ មន្ដ្រីជំនាញបានគិតផ្ទៃក្រឡាជាម៉ែត្រការ៉េជូនគ្រួសារខ្លះ គឺគិតទាំងសំយ៉ាបមុខផ្ទះដែលពលរដ្ឋកាន់កាប់រាប់ឆ្នាំមកហើយ។ រីឯអ្នកខ្លះទៀតមន្ដ្រីជំនាញមិនគិតបញ្ចូលសំយ៉ាបផ្ទះទៅក្នុងផ្ទៃក្រឡាផ្ទះឡើយ។ នៅក្នុងឱកាសនៃថ្ងៃបិទប្រកាសលទ្ធផលនៃការប្រកាសទទួលស្គាល់ទិន្នន័យទំហំផ្ទះនីមួយៗរយៈពេល១៥ថ្ងៃកាលពីខែមករា ឆ្នាំ២០១៧កន្លងមក ប្រជាពលរដ្ឋបានធ្វើការតវ៉ាអំពីរឿងបញ្ចូលផ្ទៃក្រឡាសំយ៉ាបមុខផ្ទះទៅក្នុងសាច់ផ្ទះ តែត្រូវបានមន្ដ្រីជំនាញបញ្ជាក់ថាមិនគិតម៉ែត្រការ៉េផ្ទៃសំយ៉ាបឡើយ ប៉ុន្ដែបែរជាអ្នកខ្លះ ត្រូវបានមន្ដ្រីគិតបញ្ចូលផ្ទៃក្រឡាសំយ៉ាបផ្ទះចូលទៅក្នុងផ្ទៃក្រឡាផ្ទះជាក់ស្ដែង។
បញ្ហានេះប្រជាពលរដ្ឋស្នើសុំលោករដ្ឋមន្ដ្រី ជា សុផារ៉ា មេត្ដាទទួលស្គាល់ការគ្រប់គ្រងកាន់កាប់ប្រើប្រាស់អាស្រ័យផលជាក់ស្ដែងរបស់បងប្អូនប្រជាពលរដ្ឋឲ្យស្មើភាពគ្នាស្របតាមអនុសាសន៍ដ៏ខ្ពង់ខ្ពស់របស់សម្ដេច ហ៊ុន សែន ប្រកាសនៅក្នុងខួប៧ មករាឆ្នាំ២០១៧កន្លងមកថ្មីៗនេះ ដោយទទួលស្គាល់សិទ្ធិរស់នៅកាន់កាប់ជាក់ស្ដែងរបស់បងប្អូនប្រជាពលរដ្ឋលើដីរដ្ឋ។
ជុំវិញបាតុភាពខាងលើនេះ លោក ប៉េង ហុងសុជាតិខេមរ៉ូ ប្រធាននាយកដ្ឋានអភិវឌ្ឍលំនៅឋាននៃក្រសួងរៀបចំដែនដីនគររូបនីយកម្មនិងសំណង់ បានប្រាប់អ្នកសារព័ត៌មានយ៉ាងគំរោះគំរើយតាមទូរស័ព្ទថា ពេលគេបិទផ្សាយម៉េចមិនតវ៉ាឆ្លើយ បានមួយម៉ាត់ពីរម៉ាត់ក៏បិទទូរស័ព្ទ។ បញ្ហានេះក៏ផ្ទុយពីប្រសាសន៍សម្ដេច ហ៊ុន សែន ដែលតែងតែដាស់តឿនមន្ដ្រីរាជការគ្រប់ជាន់ថ្នាក់ឲ្យយកចិត្ដទុកដាក់រាល់ទុកលំបាករបស់ប្រជាពលរដ្ឋ។
សូមបញ្ជាក់ថា ផ្ទៃក្រឡាដីនៃអាគារប៊ូឌិញទាំងមូលមានទំហំ៦៥៣១,៦៧ម៉ែត្រការ៉េ។ បើគិតតម្លៃទិញពីផ្ទៃក្រឡាតាមផ្ទះនីមួយៗពីជាន់ផ្ទាល់ដីដល់ជាន់ទី៣ គឺក្រុមហ៊ុនចំណាយលុយជិត២២លានដុល្លារប៉ុណ្ណោះ ។ ដោយសារលទ្ធផលអង្គប្រជុំមិនរលូនល្អលោក ជា សុផារ៉ា បានប្រកាសលើកពេលទៅថ្ងៃក្រោយ ហើយបិទអង្គប្រជុំនៅវេលាម៉ោង១០និង៣០នាទីព្រឹកថ្ងៃសុក្រដដែលនេះ ដោយមិនទុកពេលឆ្លើយសំណួរអ្នកកាសែតឡើយ៕
ចែករំលែកព័តមាននេះ