រាជធានីភ្នំពេញ ៖ នៅយប់ថ្ងៃអាទិត្យទី៩ មេសា ខានស្អែកនេះ ប្រដាល់«កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និង
រាជធានីភ្នំពេញ ៖ នៅយប់ថ្ងៃអាទិត្យទី៩ មេសា ខានស្អែកនេះ ប្រដាល់«កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និងថៃ២រូបប៉ះគ្នា ។ ការប្រកួតនៅចុងសប្ដាហ៍នេះ សូត្រ ប៊ុនធី និង ស៊ឹម វណ្ណដេត ដែលសុទ្ធតែជាជើងខ្លាំងរបស់កម្ពុជាត្រូវបានសង្វៀនមួយនេះបើកផ្លូវឱ្យស្វាគមន៍កីឡាករថៃមកពីទីក្រុងបាងកក ដោយរំពឹងថា នឹងធ្វើឱ្យសង្វៀនមួយនេះកក្រើកខ្លាំងមិនខាន ។
ការប្រកួតដែលនឹងធ្វើឡើងចាប់ពីម៉ោង៨យប់ក្រោមការរៀបចំរបស់ស្រាបៀរ Black Cat នៅលើសង្វៀនទូរទស្សន៍អាស៊ីអាគ្នេយ៍នេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែង គឺព្រឹត្តិការណ៍ដំណើរការចំពេលរាត្រីថ្ងៃអាទិត្យ ដែលមានអ្នកទស្សនាយ៉ាងកកកុញស្រាប់ដោយសូម្បីតែការប្រកួតស្ថិតក្នុងលក្ខណៈជាតិ និងជាតិក្ដី ។ កីឡាករកម្ពុជា២រូប គឺ សូត្រ ប៊ុនធី និង ស៊ឹម វណ្ណដេត ក្លាយជាគូប្រកួតស៊ីសាច់ហុតឈាមជាមួយកីឡាករថៃនៅយប់ថ្ងៃអាទិត្យស្អែកនេះ។ អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិរបស់ស្រាបៀរប្លេកខេត ឲ្យពួកគេប្រកួតគ្នានេះ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ សូត្រ ប៊ុនធី មកពីក្លិបបក្សីស្លាបដែក ឱ្យឡើងប្រកួតជាមួយកីឡាករថៃឈ្មោះ Khon Krong Thep ក្នុងនាមជាគូឯកអន្តរជាតិសម្រាប់ប្រដាល់អន្តរជាតិនៅយប់ថ្ងៃអាទិត្យនោះ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយភាគីទាំងពីរសុទ្ធតែបានដឹងពីគ្នា និងទទួលយកការផ្គូផ្គងសម្រាប់ការជួបគ្នានោះផង ។ កីឡាករ សូត្រ ប៊ុនធី លោកចាត់ទុកជាជើងខ្លាំងម្នាក់នៅលើសង្វៀនប្រដាល់អន្តរជាតិ ទើបសម្រេចឱ្យឡើងប្រកួតនៅលើសង្វៀន Black Cat ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថា សមត្ថភាពកីឡាកររូបនេះវាយសន្ធាប់បានល្អ បើទោះជាមុននេះបន្តិចគេត្រូវបរាជ័យក្រោមដៃកីឡាករថៃ ដែលធ្វើឱ្យអ្នកគាំទ្រខកចិត្តក្ដី ។
លោកថា នោះជារឿងភ្លាត់ស្នៀតប៉ុណ្ណោះ ប៉ុន្តែធាតុពិត គឺលោកទុកចិត្តកីឡាករកម្ពុជារូបនេះ ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើ ។ លោកថា គូនេះជាជំនួបអ្នកខ្លាំងប៉ះអ្នកខ្លាំង ទើបលោករំពឹងយ៉ាងច្រើនថា ការប្រកួតដែលនឹងធ្វើឡើងពិតជាល្អត្រូវចិត្ត ។ ក្នុងជំនួបគូនេះ កីឡាករថៃ Khon Krong Thep ធ្លាប់ប្រកួត៦៩លើក ឈ្នះ៦២លើក និងចាញ់៧លើក ក្នុងពេលកីឡាករកម្ពុជា ធ្លាប់ប្រកួត៨៨លើក ឈ្នះ៧០លើក ចាញ់១៤លើក និងស្មើ៤លើក ។
សម្រាប់កីឡាករ ស៊ឹម វណ្ណដេត មកពីក្លិបនិរោធមានជ័យ លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃជាម្ចាស់ខ្សែក្រវាត់តែម្ដងឈ្មោះ Pha Sanghan នៅក្នុងព្រឹត្តិការណ៍ប្រដាល់អន្តរជាតិរបស់ស្រាបៀរ Black Cat នៅយប់ថ្ងៃអាទិត្យនោះដែរ ។ លោកថា ការប្រកួតរបស់គូនេះ នៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែល ស៊ឹម វណ្ណដេត ឡើងកូដតែពេលខ្លះម្ដងគេល្អម្ដងធ្លាក់ដៃពិបាកប៉ាន់ស្មានពីកម្រិតប្រកួត១០០ភាគរយ ហើយកីឡាករថៃក៏មិនណយ ។ លោកថា កីឡាករថៃធ្លាប់ប្រកួត៦៩លើក ឈ្នះ៥៨លើក ចាញ់១១លើក និងមិនធ្លាប់ស្មើ រីឯកីឡាករកម្ពុជាធ្លាប់ប្រកួត៥៨លើក ឈ្នះ៥១លើក ចាញ់៥លើក និងស្មើ២លើក ។
នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនទូរទស្សន៍អាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិផងដែរ ខណៈនៅប៉ុស្ដិ៍លេខ៥នាល្ងាចថ្ងៃសៅរ៍នេះក៏មានការប្រកួតជម្រុះក្នុងវគ្គ៣២នាក់ យក១៦នាក់ យ៉ាងស្វិតស្វាញនៅសង្វៀនប្រដាល់ជ្រោយចង្វា ដែលការប្រកួតជើងឯកក្នុងវគ្គថ្មីនេះ ក៏មានជើងខ្លាំងច្រើនដែរប្រកួតជម្រុះគ្នា ៕
ចែករំលែកព័តមាននេះ