រាជធានីភ្នំពេញ ៖ នៅរសៀលថ្ងៃសៅរ៍ទី៨ មេសា ខានស្អែកនេះ ប្រដាល់អន្តរជាតិរបស់ខារ៉ាបាវ មិនទាន់មានការប្រកួតដណ្ដើមខ្សែក្រវាត់នៅឡើយទេបន្ទាប់ពីបានរកឃើញកីឡាករឡាវជាម្ចាស់ជើងឯក ។ ការប្រកួតជាលក្ខណៈមិត្តភាពនេះ រួមមានកីឡាករជើងខ្លាំង ជា សំនៀង និងកីឡាករម្ចាស់ពានជើងឯកប៉ុស្ដិ៍លេខ៥ ឡុង សំណាង ប៉ះគ្នាជាមួយកីឡាករថៃ ដែលល្បីថាខ្លាំងមិនធម្មតាណាស់ដែរ ។
បើទោះជាបានបញ្ចប់ចំនួន៣សប្ដាហ៍មកហើយ តែព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ភេសជ្ជៈខារ៉ាបាវវគ្គ២ បានទទួលនូវការចាប់អារម្មណ៍យ៉ាងខ្លាំងពីស្រទាប់អ្នកស្នេហាកីឡាប្រដាល់។
កីឡាករម្នាក់ៗទាំងកម្ពុជា និងបរទេសសុទ្ធតែបានរួមគ្នាធ្វើឱ្យព្រឹត្តិការណ៍ទាំងមូលទទួលបានការគាំទ្រ ក្នុងពេលដែលកីឡាករបរទេសក៏បានរុញឱ្យការប្រកួតមានភាពទាក់ទាញផងដែរ ។
អ្នកគាំទ្រកីឡាករកម្ពុជានៅតែមានអារម្មណ៍ខកចិត្តក្នុងពេលការប្រកួតចុងក្រោយ មិនទទួលបានផ្លែផ្កាតាមការចង់បាន ។ អ្នកគាំទ្រទាំងនោះទទូចឱ្យឆាប់រៀបចំការប្រកួតដណ្ដើមខ្សែក្រវាត់ជាថ្មី ដើម្បីបានឃើញពីសមាសភាពកីឡាករកម្ពុជា និងបរទេសឱ្យបានកាន់តែឆាប់នោះផង ។ យ៉ាងណាមិញ មន្ត្រីជាអ្នករៀបចំបានអះអាងថា ការប្រកួតវគ្គបន្ទាប់នឹងត្រូវកើតឡើងក្នុងពេលខាងមុខ ពោលគឺបន្ទាប់ពីចូលឆ្នាំខ្មែរ ដោយសារតែកីឡាករម្នាក់ៗនៅជាប់បុណ្យទាន ។ លោកថា សមាសភាពដែលត្រូវប្រកួតសម្រាប់វគ្គថ្មី បានរៀបរួចហើយ ដូច្នេះមិនយូរនោះទេ ការប្រកួតនឹងចាប់ផ្ដើមឡើងក្រោយពីពិធីបុណ្យចូលឆ្នាំត្រូវអស់ចំហាយ ។ លោកទទូចឱ្យមានការគាំទ្រចំពោះការប្រដាល់ឱ្យបានច្រើន ដោយលោកបញ្ជាក់ថា កីឡាប្រដាល់កាន់តែមានការរីកចម្រើន ប៉ុន្តែសម្រាប់ការគាំទ្រពីអ្នកទស្សនាហាក់នៅមានកម្រិត។ ក្នុងនោះ អ្នកគាំទ្រមួយចំនួនលោកថា បានយកការប្រដាល់ធ្វើជាអាជីវកម្ម ដោយការចាក់ភ្នាល់ ហើយលាបពណ៌ថា គណៈកម្មការផ្ដល់ពិន្ទុមិនយុត្តិធម៌ប៉ាតណាប៉ាតណីនោះផង នៅពេលកីឡាករដែលពួកគេភ្នាល់មិនឈ្នះតាមការចង់បាន ។ លោកថា អ្នកគាំទ្របែបនេះបានធ្វើឱ្យវិស័យប្រដាល់បាក់មុខ ប៉ុន្តែទូរទស្សន៍អាស៊ីអាគ្នេយ៍ ក៏នឹងសម្រាំងការប្រដាល់ឱ្យមានគុណភាព១០០ភាគរយ មិនអាចធ្វើតាមការគូសវាសរបស់អ្នកភ្នាល់នោះទេ ។ លោកនៅតែថា អ្នកភ្នាល់ជាអ្នកធ្វើឱ្យវិស័យប្រដាល់បាក់មុខ ប៉ុន្តែអ្នកគាំទ្រផ្កាប់មុខទាំងនោះ ក៏ជួយឱ្យវិស័យប្រដាល់មានភាពផុលផុសផងដែរ ។ លោក ញាណ សុធី អ្នករៀបចំការប្រកួតបានអះអាងថា ឱ្យតែរាល់ការប្រកួតដណ្ដើមខ្សែក្រវាត់ រមែងមានការលើកឡើងថា យុត្តិធម៌ និងមិនយុត្តិធម៌ ដែលសុទ្ធតែជាការលាបពណ៌ នៅពេលការប្រកួតរវាងកីឡាករដែលពួកគេភ្នាល់មិនបានជោគជ័យ ។ ការប្រកួតដណ្ដើមខ្សែក្រវាត់វគ្គ៣របស់ក្រុមហ៊ុនខារ៉ាបាវ នឹងសម្រាំងកីឡាករឱ្យល្អដើម្បីធ្វើឱ្យព្រឹត្តិការណ៍ខារ៉ាបាវមានភាពលេចធ្លោ ។
ងាកមកកាន់ការប្រកួតមិត្តភាពនៅថ្ងៃសៅរ៍នេះវិញ លោក ញាណ សុធី បញ្ជាក់ថា កីឡាករ ជា សំនៀង មកពីក្លិបទ័ពឆត្រយោង៩១១ ត្រូវជួបប្រកួតជាមួយកីឡាករថៃឈ្មោះ Aram Boy ។
លោកថា កីឡាករកម្ពុជានឹងមិនភ្លាត់ឱ្យចាញ់សម្រាប់ការប្រកួតនេះទេ ថ្វីដ្បិតថាគេប្រកួតឈ្នះនឹងឈានឡើងក្រេឌីត តែបើចាញ់នឹងរងការរិះគន់ថាប្រកួតធ្លាក់ដៃ ។ លោកថា កីឡាកររូបនេះ នឹងត្រូវការឈ្នះដើម្បីលុបលាងភាពអាម៉ាស់ ខណៈដែលកីឡាករថៃក៏ប្រាថា្នចង់ឈ្នះដូចគ្នា ។ កីឡាករថៃត្រូវលោកប្រកាសថា ធ្លាប់ប្រកួត៧៥លើក ឈ្នះ៥៩លើក ចាញ់១៦លើក មិនដែលស្មើក្នុងពេលដែលកីឡាករកម្ពុជាឆ្លងកាត់ការប្រកួតរហូតដល់៧៧លើក ឈ្នះ៦២លើក ចាញ់១២លើក និងស្មើ៣លើក ។
សម្រាប់កីឡាករ ឡុង សំណាង មកពីក្លិបឡុងសាលវ័ន្ត លោក ញាណ សុធី បញ្ជាក់ថាគេត្រូវឡើងប្រកួតជាមួយកីឡាករថៃឈ្មោះ Reda ក្នុងលក្ខណៈមិត្តភាពសម្រាប់ព្រឹត្តិការណ៍អន្តរជាតិខារ៉ាបាវនោះដែរ ។ លោកថា ឆ្លងកាត់ការប្រកួតបានច្រើនលើក លោកក៏មិនទាន់ហ៊ានទុកចិត្តកីឡាករកម្ពុជា១០០ភាគរយនោះដែរ បើទោះជាគេជាជើងខ្លាំងនៅលើសង្វៀន និងឡើងកូដ ។ នោះគឺដោយសារតែកីឡាករកម្ពុជាក៏ខ្លាំងមិនធម្មតា ។ លោកថា កីឡាករថៃធ្លាប់ប្រកួត១០៣លើក ឈ្នះ៨២លើក ចាញ់១៥លើក និងស្មើ១លើក ក្នុងពេលកីឡាករកម្ពុជាធ្លាប់ប្រកួត៦៦លើក ឈ្នះ៥៦លើក ចាញ់៧លើក និងស្មើ៣លើក ទើបលោកមិនហ៊ានទុកចិត្តចំពោះកីឡាករកម្ពុជា ៕
ចែករំលែកព័តមាននេះ