ដើម្បីរៀបចំពិធីបុណ្យអុំទូក អកអំបុក និងសំពះព្រះខែ ដែលនឹងប្រព្រឹត្តទៅនៅដើមខែវិច្ឆិកា ខាងមុខនេះ ឯកឧត្តម ស៊ុន សុវណ្ណារិទ្ធ ខេត្តកំពង់ឆ្នាំង និងលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង បានដឹកនាំក្រុមការងារចុះពិនិត្យការដំឡើងផ្ទាំងរូបភាព និងការដាក់បំភ្លឺភ្លើងចម្រុះពណ៌តាមផ្លូវនានាក្នុងក្រុង
ខេត្តកំពង់ឆ្នាំង ៖ ដើម្បីរៀបចំពិធីបុណ្យអុំទូក អកអំបុក និងសំពះព្រះខែ ដែលនឹងប្រព្រឹត្តទៅនៅដើមខែវិច្ឆិកា ខាងមុខនេះ ឯកឧត្តម ស៊ុន សុវណ្ណារិទ្ធ ខេត្តកំពង់ឆ្នាំង និងលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង បានដឹកនាំក្រុមការងារចុះពិនិត្យការដំឡើងផ្ទាំងរូបភាព និងការដាក់បំភ្លឺភ្លើងចម្រុះពណ៌តាមផ្លូវនានាក្នុងក្រុងកំពង់ឆ្នាំង ដែលក្រុមជាងកំពុងមមាញឹករៀបចំ ហើយក៏បានកែលំអរចំណុចខ្វះខាតខ្លះ ដើម្បីឱ្យការតុបតែងមានសោភ័ណ្ឌភាព សម្រាប់ទាក់ទាញភ្ញៀវទេសចរ។
ជុំវិញការរៀបចំ ដើម្បីត្រៀមពិធីបុណ្យអុំទូកនេះដែរ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ធ្លាប់បានបញ្ជាក់កាលពីពេលថ្មីៗនេះ ក្នុងកិច្ចប្រជុំមួយនៅសាលាខេត្តថា ការរៀបចំប្រារព្ធពិធីបុណ្យអុំទូក គឺនឹងធ្វើឡើងនៅមាត់ទន្លេផ្សារក្រោមរយៈពេល២ថ្ងៃ ហើយក៏មានរៀបចំពិធីអកអំបុក សំពះព្រះខែ ទៅតាមប្រពៃណីជាតិយើងផងដែរ។ ជាមួយនឹងពិធីបុណ្យអុំទូកនេះដែរ ក៏នឹងមានរៀបចំការប្រណាំងកាណូតផងដែរ។
ឯកឧត្តមអភិបាលខេត្តកំពង់ឆ្នាំង បានដាក់ផែនការដល់អាជ្ញាធរក្រុងស្រុកទាំង៨ ត្រូវរៀបចំអញ្ជើញប្រជាពលរដ្ឋមកចូលរួមលេងកំសាន្ត ក្នុងពិធីប្រណាំងទូក និងកាណូត ឱ្យបានច្រើន ដែល ឯកឧត្តមនឹងត្រៀមចំណាយថវិកាចំនួន ១០០ លានរៀល សម្រាប់ជួយឧបត្ថម្ភជូនបងប្អូនប្រជាពលរដ្ឋមកចូលរួមប្រណាំងទូក និងកាណូតនេះ។
ចំណែកក្រុមការងារយុវជនតាមអង្គភាពនានា ត្រូវរៀបចំវង់ភ្លេងរាំលេងកម្សាន្តតាមសាឡាង និងកាណូតធំៗ ដើម្បីកំដរពិធីបុណ្យអុំទូកឲ្យបានអធិកអធម។ រីឯនៅក្នុងក្រុងកំពង់ឆ្នាំង ក៏ត្រូវរៀបចំដាក់ឱ្យមានកីឡាប្រដាល់ ការប្រណាំងកង់ និងរត់ប្រណាំងម៉ារ៉ាតុង ដែលកម្មវិធីនេះប្រគល់ជូនមន្ទីរ អប់រំយុវជន និងកីឡាជាអ្នករៀបចំ។ ហើយពេលយប់ក៏រៀបចំពិធីដុតកាំជ្រូចអបអរសាទរផងដែរ។ ហើយតាមផ្លូវពីផ្សារលើទៅផ្សារក្រោមវិញ គឺចាប់ពីចំណុចផ្លូវច្រមុះជ្រូកផ្សារលើ រហូតដល់ដើមពោធិ៍ផ្សារក្រោម រដ្ឋបាលខេត្ត និងរដ្ឋបាលក្រុង ត្រូវរៀបចំជាធ្វើជាតំបន់ត្រជាក់ស្វាគមន៍ប្រជាពលរដ្ឋ និងភ្ញៀវទេសចរមកលេងកម្សាន្តបានសប្បាយរីករាយផងដែរ។
សូមបញ្ជាក់ថា ក្រៅពីបំពាក់ភ្លើងបំភ្លឺ ភ្លើងចម្រុះពណ៌ តាមដងផ្លូវ និងដើមឈើតាមទីសាធារណៈ និងលើកប៉ាណូរំលេចរូបភាព ជាមិត្តសញ្ញាឆ្នាំងដី រូបអុំទូក នៅតាមសួនច្បារវិមានឯករាជ្យ ក៏រៀបចំកាត់ផ្កាលំអរ លាបពណ៌តាមខឿនសួនច្បារ និងជួសជុលនាគបាញ់ទឹកផងដែរ៕
ចែករំលែកព័តមាននេះ