ខេត្តបាត់ដំបង ៖ កម្លាំងចម្រុះស្រុកមោងប្ញស្សីជិត២០នាក់ ដែលដឹកនាំដោយមន្ត្រីជលផល បានចុះបង្ក្រាបបទល្មើសនេសាទ កាលពីថ្ងៃទី២៣ តុលា នៅតំបន់ទន្លេសាប ក្នុងភ្នុងភូមិសាស្ត្រ ឃុំតាលាស់ រឹបអូសបាននូវឧបករណ៏នេសាទខុសច្បាប់(ស្បៃមុង)ប្រវែងជិត៧០០ម៉ែត្រ តែឃាត់មិនបានម្ចាស់បទល្មើសទេ ។
របាយការណ៍បានឲ្យដឹងថា កម្លាំងចម្រុះប្រមាណជិត២០នាក់ ដឹកនាំដោយមន្ត្រីជលផល បានចុះទៅកាន់តំបន់ទន្លេសាបរុករកឃើញបទល្មើសនេសាទខុសច្បាប់នៅក្នុងភូមិសាស្ត្រ ឃុំតាលាស់ បានដាក់ពង្រាយពាសពេញតំបន់នោះ តែគេមិនបានស្គាល់ម្ចាស់បទល្មើសទេ ។ កម្លាំងចម្រុះបានរុះរើរឹបអូសយកបទល្មើសទាំងនោះរួមមាន សាច់អួនក្រឡាញឹកប្រវែង៦៥០ម៉ែត្រ បង្គោលចំនួន២៥០ដើម និងឡុកសម្រាប់ចាប់ត្រូវចំនួន០៣ត្រូវបានប្រមូលយកទៅដុតបំផ្លាញចោល ។
សូមបញ្ជាក់ថា រយៈពេលជាងមួយសប្ដាហ៏កន្លងទៅនេះ កម្លាំងចម្រុះនៃគណបញ្ជាការកងឯកភាពស្រុកចំនួនបួន ដែលមានភូមិសាស្ត្រ ជាប់តំបន់ទន្លេសាបបានបើកយុទ្ធនាការចុះបង្ក្រាបបទល្មើសនេសាទព្រមៗគ្នា ក្នុងនោះ មានស្រុកថ្មគោល ស្រុកសង្កែ ស្រុកឯកភ្នំ និងស្រុកមោងប្ញស្សី ។
កម្លាំងចម្រុះតាមបណ្ដាស្រុកទាំងនេះ បានរឹបអូសបានវត្ថុតាងជាច្រើន តែមិនឃើញមានឃាត់ជនប្រព្រឹត្តបទល្មើសបានម្នាក់នៅឡើយទេ សូម្បីតែឈ្មោះជនល្មើសក៏គ្មាននៅក្នុងរបាយការណ៍ដែរ ។ ពោលដកហូតបានតែវត្ថុតាង តែឃាត់មិនបានជនសង្ស័យណាម្នាក់ទេ រហូតមកដល់ពេល
នេះ ។
បទល្មើសនេសាទគ្រប់ប្រភេទត្រូវបានគេរាយការណ៏ថា បាននិងកំពុងកើតមានពាសពេញផ្ទៃបឹងទន្លសេសាប ។ បទល្មើសទាំងនោះភាគច្រើន និងមានទ្រង់ទ្រាយធំដុំត្រូវគេដឹងថា សុទ្ធតែមានការឃុមឃិតជាមួយសមត្ថកិច្ច ឬ មន្ត្រីជំនាញ ដែលមានស្នាក់ការបណ្ដែតទឹកប្រចាំតំបន់ទន្លេសាបនោះតែម្ដង ។
បើតាមប្រភពព័ត៏មានបានឲ្យដឹងថា បទល្មើសដែលកំពុងកើតមានសម្បើមជាងគេ និងកំពុងរីកពាសពេញតំបន់ទន្លេសាបក្នុងពេលនេះ គឺសកម្មភាព ប្រើប្រាសឧបករណ៍ឆក់ និងប្រើប្រាសអួនឬស្បៃមុងក្រឡញឹកដាក់ពង្រាយតាមជ្រលងព្រៃលិចទឹក ដើម្បីចាំត្រងយកត្រីតូច ធំ គ្រប់ប្រភេទនៅរដូវទឹកសម្រក ។
បទល្មើសទាំងនេះ បើគ្មានការបង់ប្រាក់សំណូកជូនសមត្ថកិច្ច ឬមន្ត្រីជំនាញប្រចាំតំបន់ទន្លេសាបទេ ពួកជនល្មើសមិនអាចធ្វើសកម្មភាពបានឡើយ ។ ដូច្នេះ បទល្មើសដែលកំពុងកើតពាសពេញបឹងទន្លេសាបយ៉ាងស្អេកស្កះ នាសព្វថ្ងៃនេះ សុទ្ធតែមានការឃុបឃិតពីសមត្ថកិច្ចស្ទើរគ្រប់ស្ថាប័នដែលមានភារកិច្ចប្រចាំការត្រួតពិនិត្យនៅតំបន់ទន្លេសាបនោះ ហើយយូរៗម្ដង ទើបមានកម្លាំងចម្រុះចុះបង្ក្រាបម្ដង តែគេមិនដែលឃើញចាប់បានជនល្មើស ឬ មានឈ្មោះជនល្មើសនៅក្នុងរបាយការណ៍ណាស់ ។ ពោលគេរឹបអូសបានតែវត្ថុតាង តែគ្មានឈ្មោះម្ចាស់បទល្មើស ៕
ចែករំលែកព័តមាននេះ