សញ្ញាដែលបង្ហាញថា ទីផ្សាររថយន្តជជុះនៅកម្ពុជាកំពុងតែរួមតូចនោះ គឺកាន់តែកើតមានច្បាស់ឡើងៗដោយសារតែការរីកចម្រើននៃជីវភាពរស់នៅរបស់ប្រជាពលរដ្ឋ ហើយគួបផ្សំ និងតម្លៃនៃរថយន្តថ្មី គឺកាន់តែសមរម្យថែមទៀត។ ជាការពិតមកដល់ពេលនេះ ពន្ធលើការនាំចូលរថយន្តនៅតែខ្ពស់បើធៀបនឹងបណ្តាប្រទេសជិតខាង ប៉ុន្តែទោះបីជាយ៉ាងណាដើម្បីទីផ្សារក្រុមហ៊ុនផលិតរថយន្តបានកែច្នៃ និងផលិតរថយន្តដែលតម្រូវនឹងជីវភាពអ្នកមធ្យមកាន់តែបើកឱកាសឲ្យផ្នត់គំនិតរបស់ពលរដ្ឋកាន់តែផ្លាស់ប្តូរគួបផ្សំ…
សញ្ញាដែលបង្ហាញថា ទីផ្សាររថយន្តជជុះនៅកម្ពុជាកំពុងតែរួមតូចនោះ គឺកាន់តែកើតមានច្បាស់ឡើងៗដោយសារតែការរីកចម្រើននៃជីវភាពរស់នៅរបស់ប្រជាពលរដ្ឋ ហើយគួបផ្សំ និងតម្លៃនៃរថយន្តថ្មី គឺកាន់តែសមរម្យថែមទៀត។
ជាការពិតមកដល់ពេលនេះ ពន្ធលើការនាំចូលរថយន្តនៅតែខ្ពស់បើធៀបនឹងបណ្តាប្រទេសជិតខាង ប៉ុន្តែទោះបីជាយ៉ាងណាដើម្បីទីផ្សារក្រុមហ៊ុនផលិតរថយន្តបានកែច្នៃ និងផលិតរថយន្តដែលតម្រូវនឹងជីវភាពអ្នកមធ្យមកាន់តែបើកឱកាសឲ្យផ្នត់គំនិតរបស់ពលរដ្ឋកាន់តែផ្លាស់ប្តូរគួបផ្សំ និងសេវាកម្មហិរញ្ញវត្ថុក៏កាន់តែបើកទូលាយថែមទៀតសម្រាប់ឥណទានរថយន្ត ដោយនៅពេលនេះអត្រាការប្រាក់នៃកម្ចីទិញរថយន្តនេះ គឺធនាគារខ្លះបានបញ្ចុះរហូតដល់៧ភាគរយនៅក្នុងមួយឆ្នាំ ហើយរយៈពេលនៃការខ្ចី គឺរហូតដល់ទៅ៧ឆ្នាំ។
មកដល់ពេលនេះ តម្លៃរថយន្តថ្មីកាន់តែប្រកួតប្រជែងជាមួយនឹងរថយន្តជជុះ ដោយតម្លៃរថយន្តថ្មីខ្លះ គឺមានតម្លៃត្រឹមតែប្រមាណជា២៧.០០០ ដុល្លារតែប៉ុណ្ណោះ។ទោះបីជារថយន្តថ្មីតម្លៃនេះវាអាចតូចមិនសូវទំនើបមិនប្រណិតដូចពពួករថយន្តជជុះមូដែលខ្លះក៏ពិតមែន ប៉ុន្តែទោះបីជាយ៉ាងណាក៏វាជារថយន្តដែលថ្មីមិនដែលមាននរណាជិះ។
ពាក់ព័ន្ធនឹងបញ្ហានេះ យើងខ្ញុំនៅមិនអាចរកតួរលេខនៃយានយន្តថ្មីដែលនាំចូលសរុបបានថ្មីមកបញ្ជាក់បាននៅឡើយទេ។ប៉ុន្តែទោះបីជាយ៉ាងណា ស្ថានភាពលក់ គឺដាច់ខ្លាំងដោយនៅពេលនេះអ្នកដែលបានបញ្ជាទិញរថយន្តថ្មីដែលមានតម្លៃប្រមាណជា២៧.០០០ដុល្លារនេះ ប្រសិនបើកំពុងតែចុះឈ្មោះកក់លុយនៅពេលនេះ គឺពួកគេត្រូវរង់ចាំជិះរហូតដល់ខែមេសា ឆ្នាំក្រោយបានមកដល់ ដោយសារតែរថយន្តនេះវាមិនមាននៅក្នុងស្តុកនៃក្រុមហ៊ុនទៀតឡើយ។
ក្រៅពីមានតម្លៃកាន់តែសមរម្យហើយនោះ ដោយមើលឃើញអំពីសក្តានុពលនេះ កម្ពុជានៅពេលនេះក៏មានក្រុមហ៊ុនដំឡើងរថយន្តជាច្រើនបានកំពុងតែបើកដំណើរការដំឡើងរថយន្តនៅកម្ពុជា ដូចជា ក្រុមហ៊ុនតម្លើងរថយន្តហ្វតនៅពោធិសាត់ ហ៊ីយ៉ានដាយនៅកោះកុង សាន់យ៉ុង នៅស្វាយរៀង អ៊ីហ្ស៊ុយស៊ុយនៅកំពង់ស្ពឺ ហើយក្រុមហ៊ុនតូយូតា ក៏កំពុងតែសាងសង់រោងចក្រដំឡើងរថយន្តនៅកម្ពុជាផងដែរ។ក្រៅពីនោះក៏មានក្រុមហ៊ុនផលិតរថយន្តចិនមួយចំនួនក៏បានមក ដំឡើងនៅកម្ពុជាផងដែរ។
តាមរបាយការណ៍របស់ក្រសួងសាធារណការ និងដឹកជញ្ជូនបានឲ្យដឹងថា គិតត្រឹមខែកញ្ញា ឆ្នាំ២០២២ លេខចុះបញ្ជីរថយន្តដែលជាលេខពិសេស និងលេខចុះបញ្ជីពិសេសផ្ទាល់ខ្លួន គឺមាន២២៥.១៧១លេខ ដោយភាគច្រើន គឺជារថយន្តថ្មី ឬជជុះដែរតែជាជជុះដែលមិនក្រោម១០ ឆ្នាំនោះទេ។
ក្រសួងនៅមិនទាន់ធ្វើបច្ចុប្បន្នភាពនៃយានយន្តដែលចុះបញ្ជីសរុបនៅឡើយទេ ប៉ុន្តែបើតាមអ្នកដែលធ្វើស្លាកលេខបានប៉ានប្រមាណនៅក្នុងមួយខែមានអ្នកមកចុះបញ្ជីរថយន្ត មិនក្រោម៥០០០គ្រឿងឡើយ។ ហើយបច្ចុប្បន្ននេះមួយភាគធំ គឺជារថយន្តថ្មី និងរថយន្តជជុះតែជារថយន្តប្រណីត។
ក្រុមអ្នកលក់រថយន្តថ្មីបានអះអាងថា កាលពី ១០ ឆ្នាំមុនចំនួនរថយន្តថ្មីដែលធ្វើ ចរាចរណ៍ នៅកម្ពុជាគឺមានត្រឹមតែ១០ ភាគរយទេ។ ប៉ុន្តែវាបានកើនឡើងជាលំដាប់ ហើយគេបានប៉ាន់ប្រមាណថា នៅពេលនេះ ចំណែករថយន្តថ្មីដែលធ្វើចរាចរណ៍នៅលើផ្លូវនានាអាចមានរហូតដល់ទៅ៣០ភាគរយ ហើយភាគរយនេះនឹងកើនឡើងជាលំដាប់ពីមួយឆ្នាំទៅមួយឆ្នាំខណៈដែលពួកគេបានអះអាងថា សេវាកម្មលក់រថយន្តបង់រំលោះ ឬសេវាឥណទានរថយន្ត គឺកាន់តែធ្វើឲ្យទីផ្សាររថយន្តថ្មីកាន់តែមានទំនុកចិត្តនៅកម្ពុជា។
ក្រុមអ្នកលក់បានប៉ាន់ប្រមាញទៀតថា នៅពេលនេះទីផ្សាររថយន្តជាពិសេស គឺរថយន្តថ្មីកំពុងតែកម្រើកខ្លាំងណាស់ ហើយអ្វីដែលប្រាកដទៅទៀតនោះនៅក្នុងអំឡុងពេលនៃការរីករាលដាលខ្លាំងដោយសារតែកូវីដ១៩ នៅក្នុងប្រទេសដែលគេគិតថា ទីផ្សាររថយន្តនឹងជាប់គាំងលែងមានតម្រូវការនោះក៏ទីផ្សារថយន្តជាពិសេស គឺរថយន្តថ្មីនៅតែមានចលនា ហើយបានធ្លាក់ចុះប្រមាណជា៣០ភាគរយប៉ុណ្ណោះ។
ក្រសួងពាណិជ្ជកម្មបានឲ្យដឹងថា កាលពីឆ្នាំ២០២១ ដែលប្រទេសរងវិបត្តិនៃការរីករាល ដាលដោយសារតែមេរោគកូវីដខ្លាំងទីផ្សារទេសចរណ៍ស្ងាត់ឈឹង ប៉ុន្តែ ការនាំចូលរថយន្តនៅតែបន្តកើនឡើង ពោល គឺរហូតដល់ទៅ៨ភាគរយជាមួយនឹងទឹកប្រាក់រហូតដល់ទៅជាង៩០០លានដុល្លារ។
សរុបមកវិញជាមួយនឹងនិន្នាការនេះយើងអាចសន្និដ្ឋានថា ទីផ្សារថយន្តថ្មីនៅកម្ពុជា នឹងកាន់តែមានសក្តានុពល ហើយផ្នត់គំនិតពលរដ្ឋក៏កាន់តែគាំទ្ររថយន្តថ្មី ដោយសារ តែពួកគេចាប់ផ្តើមដឹងអំពីគុណវិបត្តិនៃរថយន្តជជុះ។រថយន្តជជុះមួយចំនួនធំ ដែលនាំចូល គឺជាប្រភេទរថយន្តដែលមានការប៉ះទង្គិច រួចហើយ ដែលអាចប្រឈមមុខនឹងបញ្ហាសុវត្ថិភាពនៅពេលដែលបើកបរ។រថយន្តថ្មីជារថយន្តដែលអ្នកទិញមិនខ្វល់ខ្វាយពីប្រវត្តិយានយន្តយ៉ាងម៉ិច ខណៈអ្នកទិញរថយន្តជជុះថ្វីត្បិតតែវាទំនើប ប៉ុន្តែពួកគេត្រូវហត់ចិត្ត ហត់កាយ និងការស្វែងយល់ពីប្រភពនៃរថយន្តនោះ។
ដូច្នេះ និន្នាការរថយន្តថ្មីនឹងដណ្តើមទីផ្សាររថយន្តជជុះច្រើនឡើងៗ ហើយអាចឈានដល់ការសម្លា.ប់ទីផ្សាររថយន្តជជុះនៅពេលអនាគត៕ដោយៈ ហេង ចេស្តារ
ចែករំលែកព័តមាននេះ