រាជធានីភ្នំពេញ ៖ បុរសម្នាក់បើករថយន្តត្រឡប់ពីខេត្តសៀមរាប ត្រូវគេដឹងថា គាត់ប្រញាប់មកជួបសង្សារនៅឯភ្នំពេញ បានប្រើល្បឿនយ៉ាងលឿនជ្រុល ក៏រេចង្កូតទៅបុកជាមួយបង្គោលភ្លើងបំភ្លឺផ្លូវលើសួនច្បារពុះចែកផ្លូវចំពីមុខយ៉ាងពេញទំហឹង ហើយបន្តបុកជាមួយសាំយ៉ុងមួយគ្រឿងទៀត ដែលមានមនុស្សជិះពេញរថយន្ត ដែលរថយន្តនេះធ្វើដំណើរឆ្ពោះទៅទទួលបងប្អូនមកពីប្រទេសកូរ៉េ ។
ហេតុការណ៍រន្ធត់នេះ ធ្វើឱ្យមនុស្សស្លាប់២នាក់ របួសធ្ងន់១៧នាក់ និងស្រាល២នាក់ កើតឡើងកាលពីវេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី៤ មេសា ស្ថិតតាមបណ្តោយផ្លូវជាតិលេខ៦ ចម្ងាយ៥០ម៉ែតពីផ្សារព្រែកលៀប ក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ។
ប្រភពឱ្យដឹងថា ជនរងគ្រោះដែលស្លាប់ ម្នាក់ឈ្មោះរស់ ស្រីណា អាយុ៤៥ឆ្នាំ ជាអ្នកលក់ត្រី ស្នាក់នៅភូមិកងស្វាយ ឃុំស្វាយអំពា ស្រុកមុខកំពូល ខេត្តកណ្តាល និងអ្នកស្លាប់ម្នាក់ទៀត ជាបើករថយន្តបង្កឈ្មោះសៀង ភារុន ភេទប្រុស អាយុ២១ឆ្នាំ ជាជាងជួសជុលរថយន្តនៅខេត្តសៀមរាប ស្នាក់នៅបុរីរិទ្ធ ក្នងសង្កាត់ទួលសង្កែ ខណ្ឌប្ញស្សីកែវ ។ ដោយឡែកអ្នករងរបួសមិនទាន់ស្គាល់អត្តសញ្ញាណទេ ។
ប្រភពឱ្យដឹងទៀតថា មុនពេលកើតហេតុ គេឃើញរថយន្តបង្ក ម៉ាកហាយឡែនឌ័រ ពណ៌.ស្ករ ពាក់ស្លាកលេខភ្នំពេញ2AL-1953 បើកបរដោយយុវជនខាងលើ តាមបណ្តោយផ្លូវជាតិលេខ៦ នៅក្នុងទិសដៅពីខេត្តសៀមរាបទៅភ្នំពេញ ក្នុងល្បឿនយ៉ាងលឿនដូចហោះ។ ពេលមកដល់ចំណុចកើតហេតុ សង្ស័យងោកមួយភាំង ឬក៏បែកកង់រថយន្ត ទើបរេចង្កូតជ្រុលឡើងទៅបុកបង្គោលភ្លើងបំភ្លឺផ្លូវនៅលើសួនពុះចែកទ្រូងផ្លូវ បណ្តាលឲ្យបាក់បង្គោលភ្លើងធ្លាក់អំពូលភ្លើងបំភ្លឺខ្ចាយ ។ ហើយរថយន្តបង្កបានរេចង្កូតទៅខាងឆ្វេងដៃទៅបុករថយន្តសាំងយ៉ុង១២កៅអី ពណ៌ខៀវ ពាក់ស្លាកលេខភ្នំពេញ2L-8824 បើកតាមបណ្តោយផ្លូវជាតិលេខ៦ ក្នុងទិសដៅពីភ្នំពេញទៅស្រុកមុខកំពូល ចំពីមុខយ៉ាងពេញទំហឹង បណ្តាលឱ្យរថយន្តទាំង២គ្រឿងបុកទល់មុខគ្នាខ្ទេចមួយកំណាត់មុខដូចគ្នាកៀបតៃកុងរថយន្តបង្កជាប់ក្នុងរថយន្តស្លាប់ ចំណែកតៃកុងរថយន្តរងគ្រោះ កៀបជាប់រងរបួសធ្ងន់ធ្ងរ និងអ្នកជិះក្នុងរថយន្តស្លាប់ម្នាក់ របួសធ្ងន់១៧ នាក់និងរបួសស្រាល២នាក់។
ក្រោយកើតហេតុ ទម្រាំតែនាំគ្នាគាស់រថយន្តចាប់ទាញជនរងគ្រោះដែលជាប់ក្នុងរថយន្តទាំង២គ្រឿងចេញមកបាន គឺប្រើរយៈពេលជិត២ម៉ោង ។ អ្វីកត់សម្គាល់ ហេតុការណ៍គ្រោះថ្នាក់ចរាចរណ៍នេះ មាននារីជាសង្សាររបស់អ្នកបើករថយន្តបង្កដែលស្លាប់នោះបានទៅដល់កន្លែងកើតហេតុ យំសោកស្តាយ ព្រមទាំងសាច់ញាតិរបស់ជនរងគ្រោះមានការសោកស្តាយជាពន់ពេក ។
ចែករំលែកព័តមាននេះ