សាលាខណ្ឌដូនពេញប្តូរទីតាំងថ្មីដោយស្ងាមស្ងាត់ប្រគល់ដីឱ្យក្រុមហ៊ុនសង់អគារកម្ពស់6ជាន់
រាជធានីភ្នំពេញ ៖ សាលាខណ្ឌដូនពេញបានប្តូរមកធ្វើការនៅទីតាំងថ្មី (អតីតសាលាន័រតុន)
រាជធានីភ្នំពេញ ៖ សាលាខណ្ឌដូនពេញបានប្តូរមកធ្វើការនៅទីតាំងថ្មី (អតីតសាលាន័រតុន) ដែលស្ថិតនៅកែងផ្លូវលេខ១១៨ និង១៩ សង្កាត់ផ្សារចាស់ ខណ្ឌដូនពេញនៅព្រឹកថ្ងៃទី៣ ខែមេសា ឆ្នាំ២០១៧ នេះក្រោយពីមានការឯកភាពពីសាលារាជធានីភ្នំពេញប្រគល់ដីនោះឲ្យទៅក្រុមហុ៊នហ្វុល អហ្វ អាសុីសអុិនវេសមិនឌឺវេឡុបមិន ដើម្បីសាសង់អគារថ្មីកម្ពស់៦ជាន់ ។
មន្ត្រីសាលាខណ្ឌដូនពេញបានបង្ហើបឲ្យដឹងថា សាលារាជធានីភ្នំពេញបានសម្រេចឲ្យសាលាខណ្ឌដូនពេញរុះរើការិយាល័យរបស់ខ្លួនទៅធ្វើការបណ្តោះអាសន្ននៅទីតាំងអតីតសាលាន័រតុនដែលមានទីតាំងស្ថិតនៅកែងផ្លូវលេខ១៩និង១១៨សង្កាត់ផ្សារចាស់ចាប់ពីថ្ងៃទី៣ ខែមេសា ឆ្នាំ២០១៧ នេះទៅ ហើយសាលាខណ្ឌដូនពេញក៏បានរើចេញជាបណ្តើរតាំងពីថ្ងៃទី៣០ ខែមីនា ឆ្នាំ២០១៧ ដោយស្ងៀមស្ងាត់មិនឲ្យមហាជនភ្ញាក់នោះទេ ហើយក៏ដើម្បីប្រគល់ដីទៅឲ្យក្រុមហុ៊ន ហ្វុល អហ្វ អាសុីសអុិនវេសមិនឌឺវេឡុបមិន ធ្វើការសាងសង់អគារថ្មីកម្ពស់៦ជាន់ជូនសាលាខណ្ឌដូនពេញជាថ្នូរនឹងការកាត់យកដីនៅផ្លូវកាច់ជ្រុងអស់ប្រមាណជាពីរភាគបីនៃផ្ទៃដីទំហំជាង២.០០០មែ៉ត្រការ៉េរបស់សាលាខណ្ឌ ។
មន្ត្រីដដែលបានបញ្ជាក់ថា កាលពីកំឡុងខែមីនា ឆ្នាំ២០១៦ សាលារាជធានីភ្នំពេញជាមួយនឹងក្រុមហុ៊នពាក់ព័ន្ធ និងការទិញលក់ដីសាលាខណ្ឌដូនពេញបន្តគ្នានេះគឺក្រុមហុ៊ន ហ្វុល អហ្វ អាសុីសអុិនវេសមិនឌឺវេឡុបមិន ដែលជាក្រុមហុ៊នទិញចុងក្រោយគេបានសុំសិទ្ធិគ្រប់គ្រង និងសិទ្ធិជាម្ចាស់កម្មសិទ្ធិលើដីសាលាខណ្ឌដូនពេញទំហំ១.៤៨៦មែ៉ត្រក្រឡាដោយទុកឲ្យសាលាខណ្ឌដូនពេញនៅសល់ផ្ទៃទំហំតែ៦០០មែ៉ត្រក្រឡាបុ៉ណ្ណោះ ។ ទីតាំងអតីតសាលាន័រតុនដែលស្ថិតនៅកែងផ្លូវលេខ១១៨និង១៩សង្កាត់ផ្សារចាស់ហើយត្រូវបានសាលាខណ្ឌដូនពេញជួលនោះគឺតម្លៃប្រមាណជា១មុឺនដុល្លារក្នុងមួយខែតែមិនដឹងថា ខាងណាជាអ្នកចេញលុយនោះទេ ដោយឡែកអគារថ្មីរបស់ខណ្ឌដូនពេញដែលត្រូវសាងសង់នោះមានកម្ពស់៦ជាន់ហើយរយៈពេលមួយឆ្នាំកន្លះទើបសាងសង់រួច ។
ការដោះដូរដីសាលាខណ្ឌដូនពេញដ៏មហាសាលទៅឲ្យឈ្មួញនេះមន្ត្រីរាជការ បុគ្គលិក របស់សាលាខណ្ឌមិនបានទទួលប្រាក់គោលនយោបាយនោះទេហើយក៏មិនមាននរណាម្នាក់ចេញមុខធ្វើការតវ៉ាដែររហូតមកដល់ពេលនេះ កន្លងមកសាលារាជធានីភ្នំពេញក៏បានបើកកិច្ចប្រជុំជាច្រើនលើកមកហើយដើម្បីសម្រេចឲ្យសាលាខណ្ឌដូនពេញធ្វើការរុះរើចេញពីអគារដែលកំពុងបំរើការងារបច្ចុប្បន្នទៅនៅទីតាំងថ្មី គឺអតីតសាលាន័រតុនស្ថិតនៅកែងផ្លូវលេខ១១៨និង១៩សង្កាត់ផ្សារចាស់នាដើមខែធ្នូ ឆ្នាំ២០១៦ ដើម្បីក្រុមហុ៊នខាងលើមានសិទ្ធិគ្របគ្រង និងសិទ្ធិជាម្ចាស់កម្មសិទ្ធិ ។ ទាក់ទិននឹងការរើទីស្នាក់ការសាលាខណ្ឌដូនពេញនេះមន្ត្រីគ្រប់មុខជំនាញណាម្នាក់ចេញមុខផ្តល់បទសម្ភាសដល់អ្នកកាសែតនោះទេ ៕
ចែករំលែកព័តមាននេះ