ខេត្តស្វាយរៀង៖មហាជនដាក់ការសង្ស័យការដាក់គម្រោងដេញថ្លៃគម្រោងកែលម្អផ្លូវនៅរដ្ឋបាលឃុំធ្មា និងឃុំកំពង់អំពឹលស្រុករំដួលថាខុសប្រក្រតី ដោយការដាក់ដេញថ្លៃគម្រោងកែលម្អផ្លូវក្រាលបេតុងអាម៉េ២ខ្សែនេះ ហាក់ដូចរៀបចំទុកមុន គឺនៅក្រៅឆាកចែកទឹកតែគ្នា ។ ការផ្ទុះការសង្ស័យនេះកើតឡើងនៅព្រឹកថ្ងៃទី២២ មេសា ឆ្នាំ២០២៦នៅឃុំសាលាកំពង់អំពឹលស្រុករំដួល ។…
ខេត្តស្វាយរៀង៖មហាជនដាក់ការសង្ស័យការដាក់គម្រោងដេញថ្លៃគម្រោងកែលម្អផ្លូវនៅរដ្ឋបាលឃុំធ្មា និងឃុំកំពង់អំពឹលស្រុករំដួលថាខុសប្រក្រតី ដោយការដាក់ដេញថ្លៃគម្រោងកែលម្អផ្លូវក្រាលបេតុងអាម៉េ២ខ្សែនេះ ហាក់ដូចរៀបចំទុកមុន គឺនៅក្រៅឆាកចែកទឹកតែគ្នា ។ ការផ្ទុះការសង្ស័យនេះកើតឡើងនៅព្រឹកថ្ងៃទី២២ មេសា ឆ្នាំ២០២៦នៅឃុំសាលាកំពង់អំពឹលស្រុករំដួល ។
បើតាមរដ្ឋបាលឃុំកំពង់អំពឹលបានឲ្យដឹងថា នៅសាលាឃុំកំពង់អំពឹលមានដាក់ដេញថ្លៃគម្រោងកែលម្អផ្លូវដីក្រាលបេតុងអាម៉េ០២ខ្សែគឺឃុំកំពង់អំពឹល១ខ្សែ ឃុំធ្មា១ខ្សែ។ទី១-រដ្ឋបាលឃុំធ្មា ដាក់គម្រោងដេញថ្លៃកែលម្អផ្លូវដី១ខ្សែក្រាលបេតុងអាម៉េប្រវែង៣៦០ម៉ែត្រ(០,៣៦០គម)ទទឹង០៥ម៉ែត្រកម្រាស់០,១៥ម៉ែត្រ ដាក់លូកាត់ផ្លូវ០១កន្លែង ទទឹងមុខកាត់០,៨០ម៉ែត្រប្រវែ០៧ម៉ែត្រនិងធ្វើស្លាកសញ្ញាគម្រោងថែទាំរយៈពេល៦ខែ ។ តម្លៃប៉ាន់ស្មាន១៩៩,៦៥១,៦៩៦រៀល លទ្ធផល បានទៅលើក្រុមហ៊ុន ពេជ្រធីតា តម្លៃ១៩២,៤០០,០០០រៀល។
ហើយអ្វីដែលមហាជនដាក់ការសង្ស័យ ថាមានការរៀបចំ និងខុសប្រកតីនោះ គឺមានក្រុមហ៊ុនជាច្រើនទៅចូលរួមដាក់សំណើរដេញថ្លៃ។ ប៉ុន្តែជាក់ស្តែង ដល់ម៉ោងដេញថ្លៃ គឺមានតែ០៣ក្រុមហ៊ុនម៉ែកូនប៉ុណ្ណោះដែលដាក់សំណើរដេញថ្លៃ ។ទី១-ក្រុមហ៊ុន សុខ គន្ធា ដាក់តម្លៃ១៩៤,២០០,០០០រៀល។ទី២-ក្រុមហ៊ុនផូ ចាន់ធឿន ដាក់តម្លៃ១៩៤,៦៤០,០០០រៀល។ទី៣-ក្រុមហ៊ុនពេជ្រ ធីតា ដាក់តម្លៃ១៩២,៤០០,០០០រៀល។ដែលមហាជនលើកឡើងថា ការដេញថ្លៃនេះគឺចុះតិចតួចបំផុតមិនធ្លាប់មានគឺ១៩៩លានជាងចុះតែ៧លានជាងប៉ុណ្ណោះ ហើយអ្វីដែលមហាជនកាន់តែដាក់ការសង្ស័យថាជាការរៀបចំទុកជាមុននោះគឺដោយក្រុមហ៊ុនទាំង០៣នេះគឺម្តាយ កូនស្រីនិងកូនប្រសា (ប្តីប្រពន្ធបើកក្រុមហ៊ុនម្នាក់០១)។
គម្រោងទី២ ៖នៅរដ្ឋបាលឃុំកំពង់អំពឹល ដាក់ដេញថ្លៃ កែលម្អផ្លូវដី១ខ្សែ ក្រាលបេតុងអាម៉េ ប្រវែង៣៥៩ម៉ែត្រ(០,៣៥៩គ.ម)ទទឹងក្រាលបេតុង០៥ម៉ែត្រកម្រាស់០,១៥ម៉ែត្រនិងធ្វើស្លាកសញ្ញាគម្រោង០១ តម្លៃប៉ាន់ស្មាន១៨៦,៤៩២,៤៣០រៀល។ មានក្រុមហ៊ុនមកចូលរួមដាក់សំណើរដេញថ្លៃចំនួន០៦ក្រុមហ៊ុន ក៏ប៉ុន្តែជាក់ស្តែង ចូលដាក់សំណើរដេញថ្លៃមានតែ០៣ក្រុមហ៊ុនប៉ុណ្ណោះគឺ៖ទី១-ក្រុមហ៊ុនពេជ្រ ធីតា ដាក់តម្លៃ១៨៥,២០០,០២២រៀល។២-ក្រុមហ៊ុនផូ ចាន់ ធឿន ដាក់តម្លៃ ១៨៤,៨០០,២៧៦រៀល។ ៣-ក្រុមហ៊ុនសុខ គន្ធា ដាក់តម្លៃ ១៨២,៦៨០,៧៤០រៀល។លទ្ធផលបានទៅលើក្រុមហ៊ុនសុខ គន្ធា ក្នុងតម្លៃ១៨២,៦៨០,៧៤០រៀល គឺក្រុមហ៊ុន០៣ខាងលើ ០៣នាក់ម្តាយ កូនស្រីនិងកូនប្រសា។
មហាជនលើកឡើងប្រាប់អ្នកសារព័ត៌មានយើងថា ឈ្មោះសុខ គន្ធា ក្រុមហ៊ុនសុខ គន្ធា ជាម្តាយ ក្រុមហ៊ុន ពេជ្រ ធីតា ឈ្មោះពេជ្រ ធីតា គឺជាកូនស្រីបង្កើតសុខគន្ធា ហើយក្រុមហ៊ុន ផូ ចាន់ធឿន ឈ្មោះផូ ចាន់ធឿន គឺជាប្តីរបស់ពេជ្រ ធីតា ទើបមហាជនដាក់ការសង្ស័យការដាក់ដេញថ្លៃនេះគឺជាការរៀបចំ ។
ទាក់ទិនករណីនេះដែរ លោកហែម សីណា អភិបាលស្រុករំដួល បានមានប្រសាសន៍ប្រាប់អ្នកសារព័ត៌មានយើងនារសៀលនេះថា ការដាក់ដេញថ្លៃគម្រោងកែលម្អផ្លូវដីក្រាលបេតុងអាម៉េ២ខ្សែនៅរដ្ឋបាលឃុំធ្មានិងឃុំកំពង់អំពឹល នៅព្រឹកថ្ងៃទី២២ មេសា ឆ្នាំ២០២៦នេះ គឺអនុវត្តទៅតាមនីតិវិធី ចំពោះមហាជនលើកឡើងថា ខុសប្រកតីដោយក្រុមហ៊ុនទាំង៣គឺជាក្រុមហ៊ុនម្តាយ កូន កូនប្រសា លោកមិនបានជ្រាបទេ ក៏ប៉ុន្តែប្រជាពលរដ្ឋមានសិទ្ធិបើកក្រុមហ៊ុនគ្រប់រូប ។ ហើយនៅព្រឹកដាក់ដេញថ្លៃ គឺមានក្រុមហ៊ុន ជាច្រើនទៅចូលរួមដាក់សំណើដេញថ្លៃ ក៏ប៉ុន្តែដល់ម៉ោងដាក់សំណើក្រុមហ៊ុនទាំងនោះមិនព្រមចូលដាក់សំណើដេញថ្លៃទេ គឺមានតែក្រុមហ៊ុនចំនួន០៣ប៉ុណ្ណោះដែលចូលដាក់សំណើដេញថ្លៃ ។
ហើយតាមនីតិវីធីគឺម្ចាស់គម្រោងពិនិត្យទៅលើក្រុមហ៊ុនដែលបានដាក់ប្រាក់កក់នៅធនាគារក្នុងខេត្តស្វាយរៀង គឺអនុញ្ញាតិឲ្យដាក់សំណើរដេញថ្លៃ ហើយការដាក់សំណើរ មាន០៣ក្រុមហ៊ុនគឺគ្រប់កូរ៉ុមម្ចាស់គម្រោងត្រូវតែអនុវត្តបើកសំណើរ ក្រុមហ៊ុនណាដាក់តម្លៃទាបគឺទទួលបានគម្រោងយកទៅអនុវត្ត។
លោកហែម ស៊ីណា បន្តទៀតថា កន្លងមកគម្រោងកែលម្អផ្លូវ២ឃុំនេះគឺធ្លាប់ស្អុយម្តងមកហើយ ក្រុមហ៊ុនមកចូលរួមដាក់សំណើរដេញថ្លៃច្រើនក៏ប៉ុន្តែដល់ម៉ោងដាក់សំណើរមានតែ២ក្រុមហ៊ុនចូលដាក់សំណើរដូច្នេះត្រូវផ្អាកហើយទើបតែដាក់ដេញថ្លៃលើកទី២។ ចំពោះអាជ្ញាធរឃុំស្រុកគឺចង់តែឲ្យក្រុមហ៊ុនច្រើនចូលរួមដាក់សំណើដេញថ្លៃដើម្បីឲ្យដំណើរការដេញថ្លៃល្អប្រសើរនិងយុត្តិធម៌ ជាពិសេសដំណើរការអភិវឌ្ឍន៍ហេដ្ឋារចនាសម្ពន្ធ័ផ្លូវថ្នល់មូលដ្ឋានត្រូវបានដំណើរការមិនជាប់គាំង ។ រីឯលោកសី ប៊ុន ចិន្តា ប្រធានការិយាល័យលទ្ធកម្មខេត្តស្វាយរៀងមិនអាចរកការបំភ្លឺបានទេដោយទូរសព្ទ័ចូលហើយតែគ្មានអ្នកទទួល ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ