ខេត្តស្ទឹងត្រែង ៖ មានការភ្ញាក់ផ្អើល និងរិះគន់យ៉ាងខ្លាំងទៅលើចំណាត់ការរបស់សមត្ថកិច្ច បន្ទាប់ពីជនសង្ស័យម្នាក់ពាក់ព័ន្ធករណីមនុស្សឃាត បានរត់គេចខ្លួនបាត់ស្រមោលពីប៉ុស្តិ៍នគរបាលរដ្ឋបាលឃុំតាឡាត ស្រុកសេសាន កាលពីយប់ថ្ងៃទី ១៦ ខែមេសា…
ខេត្តស្ទឹងត្រែង ៖ មានការភ្ញាក់ផ្អើល និងរិះគន់យ៉ាងខ្លាំងទៅលើចំណាត់ការរបស់សមត្ថកិច្ច បន្ទាប់ពីជនសង្ស័យម្នាក់ពាក់ព័ន្ធករណីមនុស្សឃាត បានរត់គេចខ្លួនបាត់ស្រមោលពីប៉ុស្តិ៍នគរបាលរដ្ឋបាលឃុំតាឡាត ស្រុកសេសាន កាលពីយប់ថ្ងៃទី ១៦ ខែមេសា ឆ្នាំ ២០២៦ ក្រោយពេលឃាត់ខ្លួនបានត្រឹមតែមួយថ្ងៃប៉ុណ្ណោះ ។
យោងតាមការរៀបរាប់របស់លោក ស៊ីម នាង មានទីលំនៅភូមិខ្សាច់ថ្មី ឃុំតាឡាត ស្រុកសេសានត្រូវជាបងប្រុសសពជនរងគ្រោះឈ្មោះ ស៊ីម ណាត បានឱ្យដឹងថា កាលពីថ្ងៃទី ១១ ខែមេសា ឆ្នាំ ២០២៦ ជនសង្ស័យឈ្មោះ ប៊ុន ដេន បានមកបបួលប្អូនប្រុសរបស់លោកទៅអារឈើនៅក្នុងព្រៃតែពីរនាក់ ។ លុះដល់ថ្ងៃទី ១២ ប្អូនប្រុសលោកបានត្រឡប់មកផ្ទះដោយបានយកសត្វកាំប្រម៉ាមួយក្បាលមកអោយប្រពន្ធហើយក៏ត្រឡប់ទៅវិញ ក្នុងថ្ងៃទី ១២ នោះដែរ ។
ក្រោយមកនៅថ្ងៃទី ១៥ ឈ្មោះ ប៊ុន ដេន បានផ្តាំតាមគេអោយសួរថា ឃើញជនរងគ្រោះត្រឡប់
ទៅផ្ទះហើយ ឬនៅ ? ។ ដោយមានការសង្ស័យ ថាទៅព្រៃតែពីរនាក់ហេតុអីមកវិញតែម្នាក់ ហើយបាត់ដំណឹងម្នាក់ឈឹង ក្រុមគ្រួសារក៏សម្រេចប្តឹងសមត្ថកិច្ចឱ្យឃាត់ខ្លួនឈ្មោះ ប៊ុន ដេន នៅថ្ងៃទី ១៥ ខែមេសា ដើម្បីសាកសួរ ។
ក្នុងចម្លើយបឋម ជនសង្ស័យឆ្លើយថា ពួកគេបានទៅឆ្លុះសត្វជាមួយគ្នា លុះដល់ម៉ោង ២អាធ្រាត្រទើបត្រឡបមកដល់កន្លែងស្នាក់នៅវិញ ខ្លួនក៏បានងូតទឹករួចចូលដេកមុន រីឯជនរងគ្រោះថាឈឺពោះទៅបត់ជើង លុះព្រឹកឡើងមិនឃើញខ្លួនក៏បានដើររកជុំវិញនោះដែរ តែរកមិនឃើញ ព្រោះស្មានជនរងគ្រោះត្រឡប់ទៅផ្ទះ ។
អ្វីដែលធ្វើឱ្យក្រុមគ្រួសារជនរងគ្រោះហួសចិត្តបំផុតនោះគឺ ក្រុមគ្រួសារធ្លាប់ស្នើឱ្យនគរបាល
នាំជនសង្ស័យទៅបង្ហាញទីតាំងបាត់ខ្លួន តែនគរបាលបដិសេធ ។ ក្រោយមកនៅយប់ថ្ងៃទី ១៦ ខែ
មេសា បន្ទាប់ឃាត់ខ្លួនមួយថ្ងៃ ជនសង្ស័យបានរត់គេចខ្លួនចេញពីប៉ុស្តិ៍នគរបាលបាត់ស្រមោល
។ នៅពេលសួរដេញដោលពីក្រុមគ្រួសាររងគ្រោះ លោក ឡង់ ជា អនុប៉ុស្តិ៍ បានឆ្លើយតបយ៉ាងព្រងើយកន្តើយថា ៖ «អ្នកណាទៅឈ្នះអង្គុយយាមគេ» ។
រហូតដល់រសៀលថ្ងៃទី ២០ ខែមេសា ទើបអ្នកដើររកឃ្មុំប្រទះឃើញសពជនរងគ្រោះក្នុងស្ថានភាពហើមស្អុយរលួយនៅចំណុចព្រៃចាស់ញ៉ើន ឃុំស្តៅ ស្រុកសេសាន ។ សពត្រូវបានសមត្ថកិច្ចជំនាញពិនិត្យ និងធ្វើបុណ្យបូជាភ្លាមៗនៅនឹងកន្លែង កាលពីព្រឹកថ្ងៃទី ២១ ខែមេសា ។
លោក ហួត ស៊ូ មេប៉ុស្តិ៍នគរបាលឃុំតាឡាតបានបញ្ជាក់ថា រហូតមកដល់ពេលនេះ មិនទាន់ចាប់ខ្លួនជនសង្ស័យត្រឡប់មកវិញបាននៅឡើយទេ ។
លោក វ៉ា សុផាន់ ស្នងការរងនគរបាលទទួលផែនការងារព្រហ្មទណ្ឌខេត្តស្ទឹងត្រែងបានមានប្រសាសន៍នៅព្រឹកថ្ងៃទី ២២ ខែមេសានេះថា ខាងជំនាញមិនទាន់ឡើងរបាយការណ៍មកនៅឡើយទេ ។
គួររំលឹកផងដែរថា ជនសង្ស័យឈ្មោះ ប៊ុន ដេន គឺជាមុខសញ្ញាចាស់ ដែលធ្លាប់ត្រូវបានចាប់ខ្លួនកាលពីឆ្នាំ ២០១៨ ក្នុងករណីចោរកម្មគាស់ផ្ទះ និងធ្លាប់ជាប់ពន្ធនាគារជាច្រើនខែរួចមកហើយ ។
មហាជនកំពុងរង់ចាំមើលថា តើនឹងមានការទទួលខុសត្រូវបែបណា ចំពោះការបណ្តោយឱ្យជនសង្ស័យរត់គេចខ្លួនបែបនេះ ខណៈដែលគ្រួសារជនរងគ្រោះកំពុងទាមទាររកយុត្តិធម៌យ៉ាងខ្លាំងក្លា ៕
ចែករំលែកព័តមាននេះ