លោក ឈាង រ៉ា រដ្ឋមន្ត្រីក្រសួងសុខាភិបាល បានប្រាប់ឲ្យមន្ទីរពេទ្យជាតិ ទាំង១១ មន្ទីរពេទ្យបង្អែក មណ្ឌល់សុខភាពនានា ឲ្យយកចិត្តទុកដាក់លើបដិសណ្ឋារកិច្ចល្អ និងសីលធម៌វិជ្ជាជីវៈ ។
ថ្លែងនៅក្នុងពិធីបើកវគ្គបណ្តុះបណ្តាលស្តីពី «បដិសណ្ឋារកិច្ចរបស់មន្ត្រីសុខាភិបាល ចំពោះអ្នកជំងឺប្រកបដោយសីលធម៌វិជ្ជាជីវៈ ជាគុណតម្លៃនៃសេវាសុខាភិបាល» នៅមន្ទីរពេទ្យកាល់ម៉ែត កាលពីថ្ងៃទី ១១ ខែមិថុនា លោករដ្ឋមន្ត្រីបានអះអាងថា បដិសណ្ឋារកិច្ចល្អ និងសីលធម៌វិជ្ជាជីវៈ គឺជាគុណតម្លៃស្នូលនៃសេវាសុខាភិបាលសាធារណៈ ។
លោក ឈាង រ៉ា បានសង្កត់ធ្ងន់ថា បច្ចុប្បន្នរាជរដ្ឋាភិបាលកម្ពុជា កំពុងយកចិត្តទុកដាក់ខ្ពស់បំផុតលើបដិសណ្ឋារកិច្ចល្អ ក្នុងគ្រប់វិស័យ ជាពិសេសវិស័យសុខាភិបាលស្របតាមគោលការណ៍អាទិភាព មិនបោះបង់ពលរដ្ឋណាម្នាក់ ។
លោករដ្ឋមន្ត្រីបានបញ្ជាក់ថា ពាក្យ«បដិសណ្ឋារកិច្ច» គឺកិច្ចសម្តែងនូវការទទួលរាក់ទាក់ ដែលទាមទារឱ្យមានការចាត់ចែងការងារប្រទាក់ក្រឡាគ្នា ចាប់ពីការរៀបចំទីតាំងផ្តល់សេវាឱ្យងាយស្រួល រហូតដល់ឥរិយាបថ ពាក្យសម្តីរួសរាយ មិនរើសអើង និងការទទួលខុសត្រូវខ្ពស់របស់អ្នកផ្តល់សេវា ។
លោករដ្ឋមន្ត្រីបានលើកឡើងតាំងពីការគោរព, ការខិតខំយល់ចិត្តអ្នកជំងឺ, ការទំនាក់ទំនងល្អ, ការចេះគ្រប់គ្រងខ្លួនឯង, ភាពវិជ្ជមាន, ការដោះស្រាយបញ្ហាដោយមិនលាយឡំរឿងបុគ្គល, ការទទួលខុសត្រូវ និងភាពស្មោះត្រង់ ៕
ចែករំលែកព័តមាននេះ