បណ្ដាំសម្ដេចទៅជននៅក្រៅស្រុក ឱ្យរង់ចាំមើល តើឧស្សាហកម្មផលិតសម្ភារយោធារបស់កម្ពុជាខ្លាំងប៉ុណ្ណា?
- បាត់ដំបង
ខេត្តបាត់ដំបង ៖ ឆ្លើយតបទៅនឹងក្រុមប្រឆាំងប៉ុន្មាននាក់ ដែលតែងរិះគន់សម្ដេចកប់ៗមាត់ពីក្រៅប្រទេស ពាក់ព័ន្ធនឹងសម្ភារប្រើប្រាស់របស់កងទ័ពកម្ពុជា សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា ហាក់ប្រៀបធៀបក្រុមនោះទៅនឹងសត្វសុនខប៉ុន្មានក្បាលប៉ុណ្ណោះនៅក្រៅប្រទេស ។
សម្ដេចបានផ្ដាំទៅកាន់ក្រុមនោះដូច្នេះថា «បើអាចឈប់ព្រូសបាន ល្មមឈប់ព្រូសទៅ..! ហើយបើព្រូសពេលណា ក៏នៅតែព្រូស ឯងរង់ចាំមើលលទ្ធផលទៅ..! សមត្ថភាពរបស់កម្ពុជា គឺអាចធ្វើបាន នៅពេលខាងមុខ ឯងចាំមើលឧស្សាហកម្មយោធារបស់កម្ពុជាប៉ុនណា ? នេះជាការប្ដេជ្ញាចិត្ត ក្នុងនាមជាអ្នកទទួលខុសងត្រូវម្នាក់នៅក្នុងប្រទេសកម្ពុជា»។ នេះជាបណ្ដាំរបស់សម្ដេចតេជោទៅកាន់ក្រុមប្រឆាំងប៉ុន្មាននាក់ ដែលសម្ដេចប្រៀបធៀបទៅនឹងសត្វ«សុនខ»ប៉ុន្មានក្បាល ដែលចេះតែព្រូសពីក្រៅស្រុកមិនឈប់ឈរ ដែលសម្ដេចថ្លែងក្នុងពិធីជួបសំណេះសំណាលជាមួយកម្មករ និងកម្មការ ក្នុងការអញ្ជើញត្រូត
ពិនិត្យរោងចក្រផលិតសម្ភារយោធា«DSS» កាលពីរសៀលថ្ងៃទី១១ មិថុនា នៅក្នុងខេត្តបាត់ដំបង ។
ងាកទៅកាន់ក្រុមកម្មករ កម្មការិនីរោងចក្រដែលកំពុងមមារញឹកក្នុងការងារឯណេះវិញ សម្ដេច ហ៊ុន សែន បានផ្ដាំផ្ញើហាក់ផ្ទុយស្រឡះពីបណ្ដាំទៅកាន់ក្រុមរិះគន់ខាងលើ ដោយសម្ដេចបានណែនាំដូច្នេះថា «ក្មួយៗទាំងឡាយដែលធ្វើការងារនៅទីនេះ ត្រូវតែបង្កើនការយកចិត្តទុកដាក់ទៅលើបញ្ហាគុណភាព ប្រសិនបើគ្មានប្រសិទ្ធភាព មិនអាចយកទៅបំពាក់ឲ្យកងទ័ពបានទេ ។ ជីវិតកងទ័ពសំខាន់ណាស់ ។ ជីវិតមនុស្សសំខាន់ ដូច្នេះ មិនអាចខ្ជីខ្ជាបានទេក្នុងការផលិត» ។
នៅចំពោះមុខមន្ត្រី និងក្រុមកម្មករ កម្មការិនីរាប់រយនាក់នៅរោងចក្រ សម្ដេចប្រធានព្រឹទ្ធសភា បានលើកឡើងពីគុណភាពសម្ភារយោធានេះថា «តើត្រូវធានាចំពោះគ្រាប់ប្រភេទណាខ្លះ ? យើងផលិតត្រូវមានស្ដង់ដាគ្រប់គ្រាប់ ប៉ុន្តែខ្ញុំដើរពិនិត្យមើលអម្បាញ់មិញ ពិតមែនតែមើលមិនទាន់ទំនើប តែយើងមានសមត្ថភាព ដើម្បីឆ្លើយតបទៅលើការងារមួយចំនួន ដែលជាតម្រូវការទាំងកងទ័ពនៅជួរមុខ ទាំងអ្នកប្រតិបត្តិការផ្សេងៗ ដែលអាចមានការចាំបាច់ត្រូវប្រើប្រាស់» ។
ជាមួយនឹងផលិតផលនៃការផលិតបាននូវសម្ភារយោធារបស់កម្ពុជានេះ សម្ដេច ហ៊ុន សែន ហាក់បង្ហាញពីភាពរីករាយ និងមោទនៈភាពបំផុត នៅចំពោះមុខកម្មកររោងចក្រ«DSS» និងសម្ភារយោធាដែលបានដាក់តាំងបង្ហាញជូនសម្ដេច និងមន្ត្រីគ្រប់ស្ថាប័នត្រូតពិនិត្យ ។ ជាមួយនឹងការត្រួតពិនិត្យក្នុងឱកាសនោះ សម្ដេចក៏បានលើកឡើងដែរថា «ខ្ញុំមានការរីករាយជាមួយនឹងមានវឌ្ឍនៈភាព» ។
រោងចក្រផលិតសម្ភារយោធា«DSS» នៅក្នុងខេត្តបាត់ដំបងនេះ បានបើកដំណើរបានប្រមាណ០៦ខែកន្លងមកហើយ ។ នេះបើតាមប្រសាសន៍សម្ដេច ដែលបានសំណេះសំណាលជាមួយក្រុមកម្មករ កម្មការិនីនៅក្នុងរោងចក្រ ។ សម្ដេចតេជោបានថ្លែងថា
«រោងចក្រDSS ដំណើការបាន០៦ខែហើយ ។ យើងចាប់ផ្ដើមនៃការផលិតពីខ្នាតមួយមានចំនួនតិចទៅចំនួនច្រើន ។ ឥឡូវយើងអត់និយាយពីរាប់រយ ឬរាប់ពាន់កំផ្លេទេ ។ យើងនិយាយពីរាប់ម៉ានកំផ្លេវិញ ។ នេះជាការផ្ដាំទៅក្រុមប្រឆាំងក្រៅប្រទេស»។ រោងចក្រ«DSS» នៅក្នុងទឹកដីខេត្តបាត់ដំបង ជារោងចក្ររបស់កម្ពុជា ដែលផលិតសម្ភារកងទ័ព ដោយកម្លាំងរបស់កម្មករ កម្មការិនីកម្ពុជា ។
នៅក្នុងដំណើរអញ្ជើញដល់ក្នុងរោងចក្រនេះ សម្ដេចប្រមុខស្ដីទីនៃព្រះរាជាណាចក្រកម្ពុជាបានពិនិត្យពីចង្វាក់ផលិតកម្មទូទៅនៃដំណើការរោងចក្រ DSS ផលិតសម្ភារយោធាទាំងអស់ ចាប់តាំងពីវត្ថុធាតុដើម រហូតដល់ផលិតផលសម្រេច ។ ជាដំបូងនៃការចាប់ផ្ដើមរោងចក្រ DSS បាននិងកំពុងផលិតសម្ភារយោធារួមមាន «អាវក្រោះ និងមួកការពារសុវត្ថិភាព» ។«ការបើករោងចក្រផលិតសម្ភារយោធានេះ មិនមែនសម្រាប់យកទៅឈ្លានពានអ្នកណានោះទេ ។
ហើយរយៈពេលចុងក្រោយនេះ ពោលគឺក្រោយពេលមានរោងចក្រ DSS នេះ ទាំងកងកម្លាំងយោធា និងនគរបាល គឺពុំបាននាំសម្ភារ ឬអាវក្រោះចូលមកពីប្រទេសណាទៀតដែរ គឺប្រើប្រាស់សម្ភារៈរបស់ខ្មែរ ដែលផលិតនៅក្នុងរោងចក្រDSS នេះ ផ្ទាល់តែម្ដង» ។ នេះជាប្រសាសន៍បញ្ជាក់បន្ថែម ក្រោយពីសម្ដេចបានអញ្ជើញពិនិត្យរួចរាល់នូវខ្សែចង្វាក់ទូទៅក្នុងរោងចក្រ និងសម្ភារយោធាដែលផលិតបានសម្រេច ៕
ចែករំលែកព័តមាននេះ