សហរដ្ឋអាមេរិក ៖ នៅក្នុងរបាយការណ៍បច្ចុប្បន្នភាពសេដ្ឋកិច្ចសកលរបស់ធនាគារពិភពលោក បានកាត់បន្ថយការព្យាករណ៍កំណើនសេដ្ឋកិច្ចពិភពលោកឆ្នាំ ២០២៦ មកត្រឹម ២,៥% ដោយសារតែសង្គ្រាមនៅមជ្ឈិមបូព៌ា ហើយបានព្រមានថា កំណើនអាចនឹងថយចុះយ៉ាងគំហុកត្រឹម ១,៣% ប្រសិនបើការរំខានដល់ការផ្គត់ផ្គង់ថាមពលកាន់តែធ្ងន់ធ្ងរ និងសម្ពាធកាន់តែខ្លាំងនៅក្នុងទីផ្សារហិរញ្ញវត្ថុ។ នេះបើតាមប្រភពពី Reuters និង The Business Times ចេញផ្សាយកាលពីថ្ងៃទី១១ ខែមិថុនា ឆ្នាំ ២០២៦។
ធនាគារពិភពលោកដែលមានទីស្នាក់ការកណ្តាលនៅក្នុងរដ្ឋធានីវ៉ាស៊ីនតោន សហរដ្ឋអាមេរិក បានបញ្ជាក់នៅក្នុងរបាយការណ៍បច្ចុប្បន្នភាពសេដ្ឋកិច្ចសកលប្រចាំឆមាសរបស់ខ្លួនថា កំណើនសេដ្ឋកិច្ចសកលបានកើនឡើងដល់ ២,៩% ក្នុងឆ្នាំ២០២៥ កើនឡើង ០,២% ធៀបនឹងការប៉ាន់ប្រមាណ កាលពីខែមករា។ ចំណែកការព្យាករណ៍សម្រាប់ឆ្នាំ ២០២៦ គឺធ្លាក់ចុះ ០,១% ធៀបនឹងខែមករាដើមឆ្នាំ ដែលជាកម្រិតទាបបំផុតមិនធ្លាប់មាន ចាប់តាំងពីមានជំងឺរាតត្បាតកូវីដ១៩ ចាប់ផ្តើមនៅចុងឆ្នាំ២០១៩ មក។
ធនាគារពិភពលោកបានកាត់បន្ថយការព្យាករណ៍សម្រាប់ប្រទេសចំនួនពីរភាគបីពិភពលោក ដោយសារឥទ្ធិពលនៃសង្គ្រាម។ ការកាត់បន្ថយដ៏ធំបំផុតសំដៅលើប្រទេសអេមីរ៉ាតអារ៉ាប់រួម អ៊ីរ៉ាក់ និងប្រទេសដទៃទៀតក្នុងតំបន់មជ្ឈិមបូព៌ា ដែលការនាំចេញថាមពលរបស់ពួកគេបានរងផលប៉ះពាល់យ៉ាងខ្លាំង។
ទស្សនវិស័យដ៏គួរឱ្យបារម្ភរបស់ធនាគារពិភពលោក បានលេចឡើងនៅក្នុងពេលដែលសង្គ្រាមបង្កឡើងដោយការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់កាលពីថ្ងៃទី២៨ ខែកុម្ភៈឆ្នាំ២០២៦ បានអូសបន្លាយចូលដល់ខែទី៤ហើយ ដោយបានធ្វើឱ្យតម្លៃថាមពលហក់ឡើងខ្ពស់ ដោយសារការបិទច្រកសមុទ្រហ័រមូស (Hormuz) បង្កើតឱ្យមានសម្ពាធអតិផរណាជាថ្មីនៅទូទាំងពិភពលោក និងជំរុញឱ្យមានការរំពឹងទុកពីការរឹតបន្តឹងគោលនយោបាយរូបិយវត្ថុនៅក្នុងប្រទេសជាច្រើន។ ស្របពេលដែលតម្លៃជីកសិកម្មក៏បានហក់ឡើងខ្ពស់ផងដែរ បង្កឱ្យមានការបារម្ភអំពីវិបត្តិការផ្គត់ផ្គង់ស្បៀងអាហារពិភពលោក។
ធនាគារពិភពលោកបានបន្ថែមថា កំណើនសេដ្ឋកិច្ចពិភពលោកអាចនឹងយឺតយ៉ាវមកនៅត្រឹម ២,១% ប្រសិនបើការរំខានថាមពលអូសបន្លាយពេលយូរជាងនេះ ហើយប្រសិនបើតម្លៃប្រេងមានជាមធ្យម ១១៥ ដុល្លារអាមេរិកក្នុង១បារ៉ែលក្នុងឆ្នាំនេះ ដែលអាចរុញច្រានអតិផរណាឱ្យឡើងរហូតដល់ ៤,៤%។ ទស្សនវិស័យនេះនឹងកាន់តែអាក្រក់ទៅៗ ដោយកំណើនសេដ្ឋកិច្ចនឹងធ្លាក់ចុះមកត្រឹមតែ ១,៣% ប៉ុណ្ណោះ ប្រសិនបើវិបត្តិថាមពលជះឥទ្ធិពលយ៉ាងធ្ងន់ធ្ងរដល់ទីផ្សារហិរញ្ញវត្ថុ៕
ចែករំលែកព័តមាននេះ