បើកយុទ្ធនាការក្តៅ! ផាកពិន័យក្រុមគ្រួសារអនឡាញជិត ២ម៉ឺនដុល្លារ ព្រមា.នម្ចាស់សណ្ឋាគារ-ផ្ទះសំណាក់ បើហ៊ា.នលាក់បំពួនបទល្មើ.ស
- ស្ទឹងត្រែង
ខេត្តស្ទឹងត្រែង៖ រដ្ឋបាលខេត្តស្ទឹងត្រែង បានបើកយុទ្ធនាការក្តៅ ដោយអនុវត្តវិធានការច្បាប់ផាកពិន័យជាទឹកប្រាក់សរុប១៩,០០០ដុល្លារអាមេរិកលើជនសង្ស័យពាក់ព័ន្ធបទល្មើសបច្ចេកវិទ្យាចំនួន ១៩ នាក់ (ម្នាក់ៗ ៤ លានរៀល)។
វិធានការក្តៅគគុកនេះ ធ្វើឡើងស្របពេលដែលខេត្តបានបើកកិច្ចប្រជុំផ្សព្វផ្សាយ ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា កាលពីថ្ងៃទី ១១ខែមិថុនា ឆ្នាំ ២០២៦ ម្សិលមិញនេះ។
លោក សរ សុពុត្រា អភិបាលខេត្តស្ទឹងត្រែង បានចេញព្រមានយ៉ាងម៉ឹងម៉ាត់ចំៗថា ចាប់ពីពេលនេះទៅ មិនមានការលើកលែង ឬទទួលការអន្តរាគមន៍ណាមួយឡើយ ចំពោះបុគ្គលដែលល្មើសច្បាប់។
លោកបានសង្កត់ធ្ងន់ថា៖ផ្ទះសំណាក់ សណ្ឋាគារ ឬផ្ទះស្នាក់ណា ដែលបណ្តោយឱ្យមានបទល្មើសអនឡាញកើតឡើងក្នុងទីតាំងរបស់ខ្លួន ហើយសមត្ថកិច្ចរកឃើញ នឹងត្រូវរងវិន័យដាច់ខាត។លោកអភិបាលខេត្ត ក៏បានជម្រះមន្ទិលជុំវិញថវិកាផាកពិន័យជិត ២ ម៉ឺនដុល្លារនោះដែរថា ថវិកាទាំងនេះត្រូវបានបង់ចូលស្ថាប័នរដ្ឋត្រឹមត្រូវតាមវិក្កយបត្រច្បាប់ថវិកា ដោយមិនបានយកទៅរក្សាទុកនៅរដ្ឋបាលខេត្ត ឬស្នងការដ្ឋាននគរបាលឡើយ ហើយនេះគ្រាន់តែជាទណ្ឌកម្មវិន័យជំហានដំបូង ដោយមិនទាន់គិតពីទោសទណ្ឌផ្សេងៗទៀតនោះទេ។
ជាមួយគ្នានេះដែរលោក កែវ សុធា ព្រះរាជអាជ្ញាអមសាលាដំបូងខេត្ត បានបង្ហើបថា ក្រុមឧក្រិដ្ឋជនអនឡាញអាចរកលុយខុសច្បាប់បានរាប់លានដុល្លារក្នុងមួយថ្ងៃៗ ដែលនេះជាមហន្តរាយសន្តិសុខ ទើបរាជរដ្ឋាភិបាលបង្កើតច្បាប់ថ្មីដែលមានទោសទណ្ឌ និងការផាកពិន័យធ្ងន់ធ្ងរបែបនេះ។
លោកឧត្តមសេនីយ៍ទោ សេរីបុត្រ សត្យា ស្នងការនគរបាលខេត្ត បានអំពាវនាវដល់វិស័យឯកជន និងប្រជាពលរដ្ឋទាំងអស់ ឱ្យចូលរួមសហការជាមួយអាជ្ញាធរ និងតុលាការ ព្រោះការបង្ក្រាបសំបុកឧក្រិដ្ឋកម្មបច្ចេកវិទ្យានេះ មិនមែនជាកាតព្វកិច្ចរបស់សមត្ថកិច្ចតែម្នាក់ឯងនោះទេ ដើម្បីធានាសុវត្ថិភាពរួមក្នុងខេត្ត។
សូមបញ្ជាក់ថា «ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា» ដែលមាន ៥ ជំពូក និង ២៤ មាត្រា ត្រូវបានប្រមុខរដ្ឋស្តីទី សម្តេចតេជោ ហ៊ុន សែន ចុះហត្ថលេខាប្រកាសឱ្យប្រើប្រាស់ជាផ្លូវការកាលពីថ្ងៃទី ០៦ ខែមេសា ឆ្នាំ ២០២៦ កន្លងទៅនេះ ហើយកំពុងមានអានុភាពអនុវត្តយ៉ាងទាន់ហន់នៅលើទូទាំងប្រទេស៕
ចែករំលែកព័តមាននេះ