អភិបាលរាជធានីឱ្យអាជ្ញាធរខណ្ឌត្រូវបន្តចុះពិនិត្យទីតាំងឃ្លាំងស្តុកទំនិញឬផលិតផលបង្កកដែលសង្ស័យនាំចូលពីប្រទេសថៃ ត្រូវសួរនាំឱ្យបានលម្អិតថា អ្នកណាជាអ្នកនាំចូល ?
- ភ្នំពេញ
រាជធានីភ្នំពេញ ៖ កាលពីរសៀលថ្ងៃទី១០ ខែមិថុនា ឆ្នាំ២០២៦កន្លងទៅ ក្រោមការដឹកនាំ និងបញ្ជាផ្ទាល់របស់ឯកឧត្តម ឃួង ស្រេង អភិបាលរាជធានីភ្នំពេញ រដ្ឋបាលខណ្ឌព្រែកព្នៅ សហការជាមួយកម្លាំងនគរបាលសេដ្ឋកិច្ចនៃស្នងការដ្ឋានរាជធានីភ្នំពេញ និងមានការសម្របសម្រួលដោយលោកស្រី ផាត់ សុគន្ធា ព្រះរាជអាជ្ញារងបានចុះពិនិត្យទីតាំងឃ្លាំងយីហោ «ភុត ប៊ុនហម » ស្ថិតនៅក្នុងភូមិធ្លក សង្កាត់គោករកា ដែលសង្ស័យមាននាំចូល និងស្តុកសាច់បង្កកពីប្រទេសថៃ ។ នេះបើតាមការឱ្យដឹងពីលោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ នាព្រឹកថ្ងៃទី១១ ខែមិថុនា ឆ្នាំ២០២៦ ។
ក្នុងចុះត្រួតពិនិត្យនេះ ក្រុមការងារចម្រុះបានរកឃើញ ៖
១-មានលិខិតអនុញ្ញាតអាជីវកម្ម និងប័ណ្ណពន្ធប៉ាតង់ ឆ្នាំ២០២៥ ។ ២-ផលិតផលក្នុងស្រុក ៖ ប្រហិតមាន់ ប្រហិតសាច់គោ ហតដកច្រើនប្រភេទ ណែមមីសួ សាច់ជ្រូកចង្កាក់ និងឆ្អឹងខ្ចីទ្រូងមាន់ ។ ៣-ផលិតផលសរសៃកែងមាន់បង្កកសរុប ៦៤២ដុំតូច មានដាក់អក្សរ THAILAND ចំនួន១៣៧ដុំ និងផលិតផលដែលគ្មានអក្សរបញ្ជាក់ប្រភពចំនួន៤២៧ដុំតូច ។
ក្រោយពេលចប់ប្រតិបត្តិការ ម្ចាស់ទីតាំងខាងលើ ត្រូវបាននាំខ្លួនទៅសាកសួរបន្ថែមនៅស្នងការដ្ឋាននគរបាលរាជធានីភ្នំពេញ ជុំវិញការនាំចូលផលិតផលទាំងនេះ និងស្វែងរកអ្នកពាក់ព័ន្ធ ។ រីឯទីតាំងឃ្លាំង ក្រុមការងារសម្រេចបិទជាបណ្តោះអាសន្ន ដើម្បីបន្តនីតិវិធី ។
លោកស្រីអ្នកនាំពាក្យបានបន្តថា ក្នុងថ្ងៃនេះដែរ រដ្ឋបាលខណ្ឌឫស្សីកែវ ដោយមានការចូលរួមសហការពីលោកស្រីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ កម្លាំងការិយាល័យនគរបាលប្រឆាំងបទល្មើសសេដ្ឋកិច្ចរាជធានីភ្នំពេញ និងមន្ដ្រី ក.ប.ប រាជធានីភ្នំពេញ បានចុះធ្វើការត្រួតពិនិត្យទីតាំងឃ្លាំងសាច់បង្កកចំនួន៣ទីតាំង ដែលសង្ស័យ ពាក់ព័ន្ធករណីនាំចូលស្តុកទុក និងចែកចាយផលិតផលសាច់បង្កកជាផលិលតផលរបស់ប្រទេសថៃរួមមាន៖
១-ទីតាំងស្ថិតនៅផ្លូវលេខ៥៩៨ ក្នុងភូមិស្វាយប៉ាក សង្កាត់ស្វាយប៉ាក ។ ២-ទីតាំងស្ថិតនៅផ្លូវលេខ៥៩៨ ក្នុងសង្កាត់ច្រាំងចំរេះទី២ ។ ទី៣-ឃ្លាំងទំនិញ ISR(ចែទូច) ស្ថិតនៅផ្លូវលំ ភូមិទី៤ សង្កាត់ច្រាំងចំរេះទី១ ។
ចំពោះទីតាំងទាំង៣នេះ កម្លាំងចម្រុះបានចុះពិនិត្យមិនឃើញមានករណីទំនិញបង្កកដែលនាំចូលមកពីប្រទេសថៃឡើយ ។ជាមួយគ្នានេះ លោកអភិបាលខណ្ឌឫស្សីកែវ បានថ្លែងអំណរគុណម្ចាស់ទីតាំងដែលបានផ្តល់ការសហការល្អសម្រាប់ក្រុមការងារចម្រុះចុះត្រួតពិនិត្យ ហើយបានសន្យាថា មិនមានការទទួលយកទំនិញនាំចូលមកពីប្រទេសថៃ មកបង្កកទុកនៅទីតាំងឃ្លាំងនេះឡើយ ។ដោយឡែក នៅខណ្ឌសែនសុខវិញ គណៈបញ្ជាការឯកភាពរដ្ឋបាលខណ្ឌ សហការជាមួយកម្លាំងចម្រុះ បានចុះត្រួតពិនិត្យទីតាំងឃ្លាំងស្តុកទំនិញមួយកន្លែងរបស់ក្រុមហ៊ុន FWI ស្ថិតនៅភូមិសំរោងទាវ សង្កាត់ក្រាំងធ្នង់ បន្ទាប់ពីមានការសង្ស័យថាមានការស្តុកសាច់បង្កកនាំចូលពីប្រទេសថៃ ។
ក្រោយពីបានធ្វើការពិនិត្យ និងធ្វើតេស្តវិភាគរបស់អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) និងសាខាគយនិងរដ្ឋាករខណ្ឌសែនសុខ បានរកឃើញមានការស្តុកទំនិញចំនួន៩ប្រទេស ក្នុងនោះ ចិន ប្រេស៊ីល សហរដ្ឋអាមេរិក ឥណ្ឌា ហូឡង់ តៃវ៉ាន់ អូស្ត្រាលី និងកម្ពុជា ។
ក្នុងចំណោមមុខទំនិញ និងសាច់បង្កកទាំងអស់ ក្រុមការងារមិនបានរកឃើញមុខទំនិញណានាំចូលពីប្រទសថៃឡើយ ។ជាមួយគ្នានេះ លោកស្រីអ្នកនាំពាក្យបានបញ្ជាក់ទៀតថា ឯកឧត្តម ឃួង ស្រេង អភិបាលរាជធានីភ្នំពេញ បានណែនាំនិងដាក់បទបញ្ជាយ៉ាងម៉ឺងម៉ាត់ដល់លោក លោកស្រី អភិបាលខណ្ឌទាំង១៤ ត្រូវបន្តចុះត្រួតពិនិត្យទីតាំងឃ្លាំងស្តុកទំនិញ ឬផលិតផលបង្កកនៅក្នុងដែនសមត្ថកិច្ចរបស់ខ្លូន ដែលសង្ស័យអាចមានប្រភពនាំចូលពីប្រទេសថៃឱ្យបានម៉ត់ចត់ ។ ក្នុងករណីរកឃើញត្រូវសួរនាំឱ្យបានលម្អិតថា អ្នកណាជាអ្នកនាំចូល ? ចូលតាមច្រកណា ? ខេត្តណា ? មានអាជ្ញាប័ណ្ណនាំចូលឬទេ ? ហើយអ្នកណាជាអ្នកដឹកជញ្ជូន ?
ឯកឧត្ដមអភិបាលរាជធានីភ្នំពេញបន្តថា កិច្ចការទាំងអស់នេះ រដ្ឋបាលខណ្ឌទាំង១៤ ត្រូវតែបន្តត្រួតពិនិត្យព្រមៗគ្នា ជាមួយនឹងការងារចុះប្រតិបត្តិការបោសសម្អាតបទល្មើសឆបោកតាមប្រព័ន្ធបច្ចេកវិទ្យា (Online Scams) ដោយមិនត្រូវរាថយជាដាច់ខាត ៕
ចែករំលែកព័តមាននេះ