សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ ត្រាំ ថ្លែងកាលពីថ្ងៃទី១១ មិថុនា ថា បានលុបចោលការវាយប្រហារថ្មីៗ ប្រឆាំងអ៉ីរ៉ង់ដោយអះអាងថា មានការរីកចម្រើនខ្លាំងសម្រេចបានក្នុងការចរចា សំដៅបញ្ចប់សង្គ្រាម ។ សេចក្ដីប្រកាសនោះរបស់លោកធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីលោកគំរាមវាយប្រហារខ្លាំងក្លាបំផុតលើអ៉ីរ៉ង់ ដោយដណ្ដើមត្រួតត្រាឧស្សាហកម្មប្រេងអ៉ីរ៉ង់។
រយៈពេលប៉ុន្មានសប្ដាហ៍ចុងក្រោយនេះ លោកត្រាំថ្លែងជាច្រើនលើកមកហើយថា ភាគីច្បាំងគ្នាកំពុងតែឈានទៅចុះហត្ថ
លេខាលើកិច្ចព្រមព្រៀង តែពុំឃើញមាននៅឡើយ ។ អ្នកនាំពាក្យក្រសួងការបរទេសអ៉ីរ៉ង់ ថ្លែងក្នុងបទសម្ភាសន៍តាមទូរស័ព្ទមួយ ជាមួយទូរទស្សន៍រដ្ឋថា បណ្ដាអ្នកអាជ្ញាកណ្ដាលបានខិតខំ និងនៅមិនទាន់បង្ហើយកិច្ចការសំដៅបញ្ចប់ជម្លោះនៅឡើយ។
ប្រធានាធិបតីអាមេរិកបានបើកធ្វើសន្និសីទមួយនៅការិយាល័យពងក្រពើនៃសេតវិមាន កាលពីថ្ងៃទី១១ មិថុនា នាវេលារសៀលដោយថ្លែងថា យើងនឹងចុះហត្ថលេខាលើកិច្ចព្រមព្រៀងមួយដ៏ល្អបំផុតស្ដីពីសង្គ្រាមជាមួយអ៉ីរ៉ង់។ លោកមិនបានផ្ដល់ភាពលម្អិតឡើយ ដោយគ្រាន់តែគូសបញ្ជាក់ថា លោករង់ចាំកិច្ចព្រមព្រៀងមួយសំដៅពន្យារពេលបទឈប់បាញ់គ្នាដ៏ផុយស្រួយ ចាប់ផ្ដើមពីខែមេសាមក ត្រូវបានបង្ហើយនាប៉ុន្មានថ្ងៃខាងមុខនេះ ។
ការពន្យារពេលបទឈប់បាញ់គ្នាអាចឲ្យបណ្ដាមេដឹកនាំអាមេរិកនូវពេលវេលាច្រើនថែមទៀត សម្រាប់ចរចាពីបញ្ហានុយក្លេអ៊ែរអ៉ីរ៉ង់ជារឿងសំខាន់ ដែលលោកដូណាល់ត្រាំ និងនាយករដ្ឋមន្ត្រីអ៊ីស្រាអែលលោកបេនចាមីននេតាន់យ៉ាហ៊ូលើកឡើង ដើម្បីធ្វើសង្គ្រាមជាមួយអ៉ីរ៉ង់ ។ ខុន្ទកាល័យលោកនេតាន់យ៉ាហ៊ូ ថ្លែងនាថ្ងៃទី១១ មិថុនា ថា អ៉ីស្រាអែលមិនបានចូលរួមក្នុងកិច្ចព្រមព្រៀងថ្មីណាមួយ រវាងអាមេរិក និងអ៉ីរ៉ង់ឡើយ។
ការប្រកាសនោះ របស់លោកត្រាំកើតមាន បន្ទាប់ពី២ថ្ងៃនៃការវាយប្រហារគ្នាទៅវិញទៅមក រវាងអាមេរិក និងអ៉ីរ៉ង់ដែលរុញច្រានតំបន់មជ្ឈឹមបូព៌ាទៅដល់មាត់ជ្រោះនៃការផ្ទុះសង្គ្រាមទាំងស្រុងជាថ្មី ។ មុននេះ នាថ្ងៃទី១១ មិថុនា ដែរ លោកត្រាំបានគំរាមវាយប្រហារទ្រង់ទ្រាយធំប្រឆាំងអ៉ីរ៉ង់ ហើយដណ្ដើមត្រួតត្រាឧស្សាហកម្មប្រេងអ៉ីរ៉ង់ ។ ក្នុងសារមួយតាមបណ្ដាញសង្កម លោកត្រាំលើកឡើងថា នឹងវាយប្រហារអ៉ីរ៉ង់ខ្លាំងក្លាបំផុតនាយប់ថ្ងៃទី១១ មិថុនា ហើយដណ្ដើមត្រួតត្រាទាំងស្រុងឧស្សាហកម្មប្រេងនិងឧស្ម័នអ៉ីរ៉ង់ ក្នុងនោះ មានទាំងទីតាំងប្រេងនៅកោះ KHARG ក្នុងពេលខាងមុខមិនយូរឡើយ ។ អ្នកនាំពាក្យក្រសួងការបរទេសអ៉ីរ៉ង់លោកអ៉ីស្មាអ៉ីលបាហ្គាអី ថ្លែងក្នុងកិច្ចសន្ទនាតាមទូរស័ព្ទជាមួយទូរទស្សន៍រដ្ឋថា អត្ថបទនៃកិច្ចព្រមព្រៀងជិតបង្ហើយទាំងស្រុងហើយ។ ការខ្វែងគំនិតគ្នា គឹលើជំហររបស់អាមេរិក ដែលបង្កការលំបាកក្នុងដំណើរការចរចា។
ប្រធានាធិបតីអាមេរិកក៏ថ្លៃងនាថ្ងៃទី១១ មិថុនា ដែរ ថា មេដឹកនាំកំពូលអ៉ីរ៉ង់លោកម៉ូសតាបាខាមេនី បានផ្ដល់សុពលភាពកិច្ចព្រមព្រៀងជាមួយសហរដ្ឋអាមេរិក ដោយលោកថា កិច្ចព្រមព្រៀងនោះអាចចុះហត្ថលេខានាចុងសប្ដាហ៍នេះនៅអឺរ៉ុប តែក្រសួងការបរទេសអ៉ីរ៉ង់អះអាងថា អ៉ីរ៉ង់នៅមិនទាន់ធ្វើការសម្រេចចិត្តជាស្ថាពរលើកិច្ចព្រមព្រៀងនោះនៅឡើយ ។
លោកថា កិច្ចព្រមព្រៀងនោះអាចចុះហត្ថលេខានៅអឺរ៉ុប ដោយលោកមិនបានចូលរួមក្នុងពិធីនេះឡើយ តែមានវត្តមានរបស់អនុប្រធានាធិបតីលោកឌីជីវ៉ាន់។ លោកលើកឡើងទៀតថា មេដឹកនាកំពូលអ៉ីរ៉ង់ផ្ដល់សុពលភាពលើអ្វីដែលលោកចាត់ទុកថា កិច្ចព្រមព្រៀងក្របខណ្ឌដែលរឹងមាំបំផុត និងលម្អិតបំផុតជាមួយសហរដ្ឋអាមេរិក ៕
ចែករំលែកព័តមាននេះ