ចម្លើយសារភាពគួរឱ្យអាណិតផង ហួសចិត្តផង! ករណីសិស្ស១ក្រុមនាំគ្នាលួ.ចបេះផ្លែទុរេនចែកគ្នាហូប ត្រូវម្ចាស់ទុរេនប្តឹង
- មណ្ឌលគិរី
ខេត្តមណ្ឌលគិរី ៖ ផ្អែកតាមចម្លើយសារភាពគួរឱ្យអាណិតផង និងហួសចិត្តផង ដែលនៅចំពោះមុខសមត្ថកិច្ច ក្រុមក្មេងប្រុសៗជាសិស្សសាលាទាំង ៦នាក់ បានរៀបរាប់ថា មូលហេតុដែលពួកគេសម្រេចចិត្តធ្វើសកម្មភាពលួចបែបនេះ គឺដោយសារតែ «ផ្លែទុរេនមានក្លិនឈ្ងុយពេក» ហើយពួកគេគ្មានប្រាក់ទិញ ទើបនាំគ្នាដាច់ចិត្តលួចបេះយកទៅពុះបកចែកគ្នាហូបតែម្តង។
ហេតុការណ៍នេះបានកើតឡើងនៅក្នុងភូមិសាស្ត្រឃុំស្រែខ្ទុម ស្រុកកែវសីមា ខេត្តមណ្ឌលគិរី កាលពីថ្ងៃទី១០ ខែមិថុនា ឆ្នាំ២០២៦ ក្រោយម្ចាស់ទុរេនបានបង្ហោះរឿងរ៉ាវដែលក្រុមក្មេងៗលួចទុរេនដែលខ្លួនដាក់លក់តាមដងផ្លូវនៅលើបណ្តាញសង្គមហ្វេសប៊ុក ហើយលុះដល់ថ្ងៃទី១១ ខែមិថុនា ឆ្នាំ២០២៦ ជនរងគ្រោះក៏បានសម្រេចចិត្តមកដាក់ពាក្យបណ្ដឹងជាផ្លូវការនៅប៉ុស្តិ៍នគរបាល។
ក្រោយទទួលបានបណ្តឹងភ្លាម កម្លាំងប៉ុស្តិ៍នគរបាលរដ្ឋបាលស្រែខ្ទុម សហការជាមួយកម្លាំងជំនាញនៃអធិការដ្ឋាននគរបាលស្រុកកែវសីមា បានបើកការស្រាវជ្រាវយ៉ាងយកចិត្តទុកដាក់ រហូតកំណត់អត្តសញ្ញាណ និងនាំខ្លួនក្រុមក្មេងប្រុសទាំង ៦នាក់ មកធ្វើការសាកសួរ នៅព្រឹកថ្ងៃទី១២ ខែមិថុនា ។
សិស្ស១ក្រុមដែលត្រូវឃាត់ខ្លួនខាងលើរួមមាន ១-ឈ្មោះ យ.ផ.រ ភេទប្រុស អាយុ១៥ឆ្នាំ រៀនថ្នាក់ទី៨ ២-ឈ្មោះ អ.ព ភេទប្រុស អាយុ១៣ឆ្នាំ ឈប់រៀនទី៦ ៣-ឈ្មោះ ឆ.រ.ធ ភេទប្រុស អាយុ១៥ឆ្នាំ ៤-ឈ្មោះ រ.ម.ន ភេទប្រុស អាយុ១៦ឆ្នាំ រៀនថ្នាក់ទី៨ ៥-ឈ្មោះ រ.ដ.វ ភេទប្រុស អាយុ១៤ឆ្នាំ រៀនថ្នាក់ទី៨ និង៦-ឈ្មោះ ឡ.ដ.វ ភេទប្រុស អាយុ១៧ឆ្នាំ រៀនថ្នាក់ទី៨
ដោយពិនិត្យឃើញថា អ្នកប្រព្រឹត្តទាំងអស់សុទ្ធតែជាសិស្សសាលា និងស្ថិតក្នុងវ័យអនីតិជន ក្រោមការចង្អុលបង្ហាញពីលោកវរសេនីយ៍ឯក ជា ចិត្រា ស្នងការនគរបាលខេត្តមណ្ឌលគិរី និងមានការសម្របសម្រួលនីតិវិធីពីព្រះរាជអាជ្ញានៃអយ្យការអមសាលាដំបូងខេត្ត សមត្ថកិច្ចបានសម្រេចអនុវត្តវិធានការ ដោយធ្វើការអប់រំណែនាំ និងឱ្យក្រុមក្មេងៗធ្វើកិច្ចសន្យាបញ្ឈប់សកម្មភាពខុសច្បាប់។ ទន្ទឹមនឹងនោះ សមត្ថកិច្ចក៏បានកោះហៅអាណាព្យាបាលរបស់ពួកគេ មកធ្វើលិខិតធានា ដើម្បីនាំយកកូនចៅទៅអប់រំបន្តនៅតាមគេហដ្ឋានរៀងៗខ្លួនផងដែរ៕
ចែករំលែកព័តមាននេះ