ប្រទេសកូរ៉េខាងត្បូង ៖ អតីតប្រធានាធិបតីកូរ៉េខាងត្បូង លោក YOON SUK YEOL ត្រូវបានកាត់ទោស កាលពីថ្ងៃទី១២ មិថុនាដាក់ពន្ធនាគារ៣០ឆ្នាំ ពីបទបញ្ជូនដ្រូនទៅកាន់កូរ៉េខាងជើង ដើម្បីបង្កហេតុដល់ក្រុងព្យុងយ៉ាង ហើយបង្កើតលេសប្រកាសច្បាប់អាជ្ញាសឹកកាលពីខែធ្នូ ឆ្នាំ២០២៤។
អតីតប្រមុខរដ្ឋកូរ៉េ់ខាងត្បូង អាយុ៦៥ឆ្នាំ រូបនោះ ត្រូវបានកាត់ទោសរួចហើយដាក់ពន្ធនាគារអស់មួយជីវិត កាលពីខែកុម្ភៈពីបទបះបោរ ដើម្បីប៉ុនប៉ងប្រកាសច្បាប់អាជ្ញាសឹក ហើយបញ្ជូនកងទ័ពទៅកាន់សភា។ លោកក៏ទទួលការកាត់ទោសដែរ កាលពីខែមករា ដាក់ពន្ធនាគារ៥ឆ្នាំពីបទចោទប្រកាន់មួយទៀត ដែលទោសនេះ បន្ទាប់មក ត្រូវបានបង្កើនដល់ដាក់ពន្ធនាគារ៧ឆ្នាំ ក្នុងសវនាការនៅសាលាឧទ្ធរណ៍ កាលពីខែមេសាពីបទរារាំងការងារតុលាការ។
បន្ទាប់មក តុលាការបានចោទប្រកាន់លោកពីបទបញ្ជាឲ្យបញ្ជូនដ្រូនយោធាទៅកាន់កូរ៉េខាងជើង ដើម្បីបាចខិតប័ណ្ណឃោសនាពីលើក្រុងព្យុងយ៉ាងកាលពីខែតុលាឆ្នាំ២០២៤ នាំឲ្យមានការកើនឡើងនៃភាពតានតឹងរវាងកូរ៉េទាំង២ ។ អ្នកនាំពាក្យតុលាការក្រុងសេអ៊ូល ថ្លែងនាថ្ងៃទី១២ មិថុនា ថា លោកYOON SUK YEOL ត្រូវកាត់ទោសដាក់ពន្ធនាគារ៣០ឆ្នាំពីបទចោទប្រកាន់
នេះ៕
ចែករំលែកព័តមាននេះ