ប្រទេសវៀតណាម ៖ តម្លៃលក់រាយប្រេងឥន្ធនៈនៅប្រទេសវៀតណាម ដែលបានចេញផ្សាយកាលពីថ្ងៃទី២១ ខែមេសា ឆ្នាំ២០២៦ បានបង្ហាញពីការធ្លាក់ចុះដល់កម្រិតទាបបំផុត ចាប់តាំងពីថ្ងៃទី៥ ខែមីនា ឆ្នាំ២០២៦។…
ប្រទេសវៀតណាម ៖ តម្លៃលក់រាយប្រេងឥន្ធនៈនៅប្រទេសវៀតណាម ដែលបានចេញផ្សាយកាលពីថ្ងៃទី២១ ខែមេសា ឆ្នាំ២០២៦ បានបង្ហាញពីការធ្លាក់ចុះដល់កម្រិតទាបបំផុត ចាប់តាំងពីថ្ងៃទី៥ ខែមីនា ឆ្នាំ២០២៦។ នេះបើតាមប្រភពពី VnExpress បានចេញផ្សាយ។
តម្លៃសាំង RON95 (សាំងស៊ុបពែរ) បានធ្លាក់ចុះ ៣,០៣% មកនៅត្រឹម ២៣ ០៤០ ដុង ឬប្រហែល ៣ ៥០០ រៀលក្នុង១លីត្រ។ ចំណែងសាំង E5 RON92 (សាំងធម្មតា) បានធ្លាក់ចុះ ២.៩២% មកនៅត្រឹម ២១ ៩៣០ ដុង ឬប្រហែល ៣ ៣០០ រៀល។ រីឯប្រេងម៉ាស៊ូតបានធ្លាក់ចុះ ១០,២% មកត្រឹម ២៧ ៨៥០ ដុង ឬប្រហែល ៤ ២០០ រៀល។
បច្ចុប្បន្នតម្លៃប្រេងឥន្ធនៈសកលបានបង្ហាញសញ្ញាធ្លាក់ចុះ ដោយសារតែការរំពឹងទុកនៃការចរចាសន្តិភាពជុំបន្ទាប់រវាងសហរដ្ឋអាមេរិក និងអ៊ីរ៉ង់។ នៅប្រទេសវៀតណាម តម្លៃសាំង RON95 បច្ចុប្បន្នខ្ពស់ជាងប្រហែល ១៤% បើធៀបនឹងចុងខែកុម្ភៈ នៅពេលដែលជម្លោះនៅតំបន់មជ្ឈិមបូព៌ាបានចាប់ផ្តើម។
រហូតមកទល់ពេលនេះ រដ្ឋាភិបាលវៀតណាមបានអនុម័តការកាត់បន្ថយពន្ធទាក់ទងនឹងប្រេងសាំង និងប្រេងម៉ាស៊ូតដល់សូន្យភាគរយ (០%) នៅក្នុងកិច្ចខិតខំប្រឹងប្រែងដើម្បីគ្រប់គ្រងតម្លៃលក់រាយ៕
ចែករំលែកព័តមាននេះ