ទីក្រុងតេអេរ៉ង់៖ យោធាអ៊ីរ៉ង់បានបាញ់កប៉ាល់ដឹកទំនិញបីគ្រឿងដែលបើកកាត់ច្រកសមុទ្រហ័រម៉ូស។ ហេតុនេះវាជាការបង្ហាញថាការផ្គត់ផ្គង់ថាមពលជាសាកលនៅតែមានបញ្ហា ហើយកិច្ចខិតខំប្រឹងប្រែងដើម្បីនាំយកអាមេរិក និងអ៊ីរ៉ង់ទៅអង្គុយនៅតុចរចានៅតែពិបាកដដែល។ សារព័ត៌មានអ៊ីរ៉ង់ផ្សាយថាឆ្មាំបដិវត្តជាអ្នកបាញ់ប្រហារទៅលើនាវាទាំងបីគ្រឿងនោះ។ ហេតុការណ៍នេះកើតឡើងបន្ទាប់ពីលោកដូណាល់ត្រាំទើបតែប្រកាសបន្តសុពលភាពបទឈប់បាញ់ដោយឥតកំណត់ពេលវេលា។
ទន្ទឹមនឹងការបន្តសុពលភាពនេះ លោកត្រាំប្រកាសថាអាមេរិកនឹងបន្តបិទខ្ទប់ដែនសមុទ្រអ៊ីរ៉ង់មិនឱ្យកប៉ាល់ចេញចូលកំពង់ផែបានឡើយ។ ការវាយប្រហារថ្ងៃនេះរឹតតែបង្កគ្រោះថ្នាក់សម្រាប់កប៉ាល់ដែលចង់បើកកាត់ច្រកហ័រម៉ូស។ មានន័យថាថ្វីដ្បិតបទឈប់បាញ់នៅជាធរមានពិតមែនហើយ ហើយអាមេរិក និងអ៊ីរ៉ង់មិនវាយប្រហារគ្នាទ្រង់ទ្រាយធំដូចកាលពីមុន ប៉ុន្តែក៏មិនមែនមានន័យថាសង្គ្រាមនេះបានបញ្ចប់នោះដែរ។ សេដ្ឋកិច្ចពិភពលោកនឹងបន្តរងផលប៉ះពាល់ដដែល។
រហូតមកដល់ពេលនេះ អ៊ីរ៉ង់មិនទាន់ប្រកាសទទួលស្គាល់ជាផ្លូវការនូវការបន្តសុពលភាពបទឈប់បាញ់ដែលប្រកាសជាឯកតោភាគីដោយលោកត្រាំទេ។ អ្នកការទូតអ៊ីរ៉ង់ថ្លែងថាការចរចាគ្នាអាចកើតមានទៅបានលុះត្រាតែអាមេរិកបិទបញ្ចប់ការបិទខ្ទប់ទៅលើដែនសមុទ្រអ៊ីរ៉ង់ជាមុនសិន។ កាលពីព្រឹកមិញ អ៊ីរ៉ង់បាញ់កប៉ាល់ដឹកកុងតេណឺជាលើកដំបូង បន្ទាប់មក បាញ់កប៉ាល់មួយគ្រឿងទៀត។ នេះបើយោងតាមមជ្ឈមណ្ឌលប្រតិបត្តិការរបស់យោធាអង់គ្លេស។
សារព័ត៌មានអ៊ីរ៉ង់ផ្សាយថាកប៉ាល់ទាំង២គ្រឿងត្រូវឆ្មាំបដិវត្តចាប់ឃាត់ទុក និងបញ្ជូនទៅប្រទេសអ៊ីរ៉ង់។ កប៉ាល់មួយគ្រឿងឈ្មោះ MSC Francesca និងមួយគ្រឿងទៀតឈ្មោះ Epamnodes។ ក្រោយមក ទីភ្នាក់ងារព័ត៌មានអ៊ីរ៉ង់រាយការណ៍ថាឆ្មាំបដិវត្តបានវាយប្រហារកប៉ាល់ទីបីឈ្មោះ Euphoria។ ទីភ្នាក់ងារទាំងនោះផ្សាយថាកប៉ាល់នោះចតនៅមួយកន្លែងនៅលើមាត់សមុទ្រអ៊ីរ៉ង់។ គិតទៅចាប់តាំងពីសង្គ្រាមផ្ទុះឡើងដំបូងកាលពីចុងខែកុម្ភៈរហូតមកដល់ពេលនេះ អ៊ីរ៉ង់បាញ់កប៉ាល់ជាង៣០គ្រឿង៕ ប្រភព៖ អារ៉ាប់ ញូស៍ (Arab News) និងប្រភពដទៃទៀត
ចែករំលែកព័តមាននេះ