រាជធានីភ្នំពេញ ៖ អង្គភាពប្រឆាំងអំពើពុករលួយ បានរៀចំបញ្ជូនសំណុំរឿងមន្ត្រីនគរ បាលជាតិជាន់ខ្ពស់នៃក្រសួងមហាផ្ទៃ២រូប ក្នុងនោះ មានផ្កាយ៣ផ្នែកអន្តោប្រវេសន៍មួយរូប និងផ្កាយ២ខាងនគរបាលក្រុងមួយរូប ព្រមទាំងជនសង្ស័យ២នាក់ទៀត ទៅកាន់សាលាដំបូងរាជធានីភ្នំពេញ…
រាជធានីភ្នំពេញ ៖ អង្គភាពប្រឆាំងអំពើពុករលួយ បានរៀចំបញ្ជូនសំណុំរឿងមន្ត្រីនគរ បាលជាតិជាន់ខ្ពស់នៃក្រសួងមហាផ្ទៃ២រូប ក្នុងនោះ មានផ្កាយ៣ផ្នែកអន្តោប្រវេសន៍មួយរូប និងផ្កាយ២ខាងនគរបាលក្រុងមួយរូប ព្រមទាំងជនសង្ស័យ២នាក់ទៀត ទៅកាន់សាលាដំបូងរាជធានីភ្នំពេញ ពាក់ព័ន្ធករណីទទួលសំណូកពីក្រុម Scams Online និងសម្អាតប្រាក់ ។
នេះបើតាមឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានបញ្ជាក់ប្រាប់បណ្តាសារព័ត៌មាន ។ ឯកឧត្តមបានបញ្ជាក់ថា អង្គភាពប្រឆាំងអំពើពុករលួយ បានរៀបចំបញ្ជូនមន្ត្រីនគរបាលជាតិជាន់ខ្ពស់២រូប និងជនសង្ស័យ២នាក់ទៀត ទៅសាលាដំបូងរាជធានីភ្នំពេញ នារសៀលថ្ងៃទី២២ ខែមេសា ឆ្នាំ២០២៦ ដើម្បីបន្តនីតិវិធី ។
ជនសង្ស័យទាំង៤នាក់ដែលបានចាប់ខ្លួនរួមមាន ៖
១-ឧត្តមសេនីយ៍ឯក អ៊ុក ហៃសីឡា អគ្គនាយករងនៃអគ្គនាយដ្ឋានអន្តោប្រវេសន៍ ។
២-ឧត្តមសេនីយ៍ទោ សរ សំណាង ស្នងការរងនៃស្នងការដ្ឋានរាជធានីភ្នំពេញ ។
៣-អ្នកស្រី អស កូពិសី ជាប្រពន្ធលោក សរ សំណាង ។
និង៤-ឈ្មោះ យ៉ាត កុសល ។
ពួកគេទាំង៤ ពាក់ព័ន្ធនឹងករណីសង្ស័យស៊ីសំណូកពីពួក Online Scams និងសម្អាតប្រាក់ ។
បើតាមឯកឧត្តមទេសរដ្ឋមន្ត្រី មនុស្ស២នាក់ទៀត ដែលជាប់ពាក់ព័ន្ធនឹងករណីនេះ រួមមាន អ្នកស្រី អស កូ ពិសី ជាប្រពន្ធលោក សរ សំណាង និងម្នាក់ទៀតឈ្មោះ យ៉ាត កុសល ដែលជាប់សង្ស័យរឿងទទួលសំណូកពីក្រុម Online Scams និងសម្អាតប្រាក់ ។
ឯកឧត្តមទេសរដ្ឋមន្ត្រី ឱម យ៉ិនទៀង បន្ថែមថា ការចាប់ខ្លួននាយនគរបាលជាន់ខ្ពស់ពីររូប និងជនពាក់ព័ន្ធខាងលើ បានធ្វើឡើងជាបន្តបន្ទាប់ ចាប់តាំងពីថ្ងៃទី១៩ ខែមេសា ឆ្នាំ២០២៦ ដែលករណីនេះ អង្គភាពប្រឆាំងអំពើពុករលួយ ACU បានបើកប្រតិបត្តិការស៊ើបអង្កេតរយៈពេល២០ថ្ងៃមកហើយ ហើយប្រតិបត្តិការ២០ថ្ងៃ អង្គភាពនឹងបញ្ជាក់ជូនលម្អិត ក្រោយបញ្ជូនជនសង្ស័យទាំង៤នាក់ទៅកាន់សាលាដំបូងរាជធានីភ្នំពេញរួចរាល់ ។
មួយរយៈពេលចុងក្រោយនេះ ACU បានចាប់ខ្លួនបុគ្គលសំខាន់ៗជាច្រើន ស្របពេលដែលរាជរដ្ឋាភិបាលបានដាក់ចេញនូវយុទ្ធនាការបង្ក្រាប បោសសម្អាតឧក្រិដ្ឋកម្មតាមប្រព័ន្ធអ៊ីនធើរណេត និងភាពអសកម្មនានា ។
កាលពីខែមីនា អនុប្រធាន និងមន្ត្រីសាខាគយ និងរដ្ឋាករខេត្តកោះកុង ព្រមទាំងមនុស្ស២នាក់ទៀត ក៏ត្រូវបានឃាត់ខ្លួនបញ្ជូនទៅតុលាការ ដោយរកឃើញលុយពុករលួយប្រមាណជាង១លានដុល្លារអាមេរិក ដែលសំណុំរឿងនេះ ជនសង្ស័យកំពុងដេកក្នុងពន្ធនាគារ ដើម្បីរង់ចាំទទួលទោសតាមផ្លូវច្បាប់ ៕
ចែករំលែកព័តមាននេះ