រាជធានីភ្នំពេញ ៖ នៅយប់ថ្ងៃសៅរ៍ទី១ មេសា ស្អែកនេះ ប្រដាល់អន្តរជាតិពេលរាត្រីរបស់ទូរទស្សន៍អាស៊ីអាគ្នេយ៍នឹងបើករេញឱ្យកីឡាករកម្ពុជា និងថៃ៤រូបប៉ះគ្នា ។
កីឡាករ សេក គឹមផៃ និងកីឡាករ ចាន់ ប៊ុនហឿន នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃ២រូបទៀតសម្រាប់ព្រឹត្តិការណ៍នេះ ។
ការប្រកួតរបស់កីឡាករទាំង៤រូបនៅរាត្រីនេះ នឹងទទួលបានការចាប់អារម្មណ៍មិនខុសពីព្រឹត្តិការណ៍ប្រដាល់អន្តរជាតិផ្សេងទៀតនោះទេ បើទោះជាការប្រកួតនេះធ្វើឡើងចាប់ពីម៉ោង៨យប់ និងមិនមែនជាការប្រកួតដណ្ដើមខ្សែក្រវាត់ ក្ដី ។ កីឡាករម្នាក់ៗទាំងកម្ពុជា និងបរទេសសុទ្ធតែប្ដេជ្ញារួមគ្នាធ្វើឱ្យព្រឹត្តិការណ៍មួយនេះកក្រើកសង្វៀនក្នុងពេលកីឡាករបរទេសក៏បានរុញឱ្យការប្រកួតនាសប្ដាហ៍កន្លងមក តាំងពីបង្កើតឡើងមានភាពទាក់ទាញ ។ សេក គឹមផៃ និងចាន់ ប៊ុនហឿន គឺជាសមាភាពកីឡាករកម្ពុជាដែលត្រូវប៉ះប្រកួតជាមួយកីឡាករថៃទាំង២ដែលជាជើងខ្លាំងមកពីទីក្រុងបាងកក ។
សមាសភាពកីឡាករទាំង៤រូបមានការផ្គូផ្គងក្រោមការស្នើសុំរបស់គ្រូបង្វឹកទាំងសងខាង ដើម្បីឱ្យពួកគេបានសាកកម្លាំងគ្នានៅលើសង្វៀនអន្តរជាតិទាំងមូល ។ អ្នកស្នេហាកីឡាប្រដាល់មិនចាត់ទុកថា ពួកគេជាកីឡាករលំដាប់កំពូលនៅក្នុងវិស័យប្រដាល់នោះទេ ប៉ុន្តែម្នាក់ៗបានទទួលស្គាល់ថា កីឡាករទាំង៤រូបសុទ្ធតែមានសមត្ថភាពអាចតតាំងគ្នាឱ្យកក្រើកសង្វៀនប្រដាល់បាន ។ ក្រុមមន្ត្រីបច្ចេកទេសបានអះអាងថា កីឡាករកម្ពុជា និងកីឡាករថៃ សុទ្ធតែត្រៀមរៀងខ្លួន ទើបការប្រកួតដែលនឹងធ្វើឡើងនៅយប់ថ្ងៃសៅរ៍ស្អែកនេះមិនខុសពីការប្រកួតស៊ីសាច់ហុតឈាមនៅលើសង្វៀន ។
លោក ញាណ សុធី អ្នករៀបចំការប្រកួតប្រចាំទូរទស្សន៍អាស៊ីអាគ្នេយ៍ បង្ហាញទំនុកចិត្តខ្ពស់ថា កីឡាករកម្ពុជា និងកីឡាករថៃនឹងមិនលក់ការប្រកួតដោយការធ្វើចាញ់ដើម្បីកុំឱ្យមានការរិះគន់ណាមួយក្រោយពេលប្រកួតចប់ ។ ម្យ៉ាងមកពីក្រុមការងាររបស់លោកក៏មានគណៈកម្មការវាយតម្លៃពីការប្រកួតចាញ់មិនប្រក្រតីផង ទើបលោកយល់ថា កីឡាករដែលមានឈ្មោះឡើងប្រកួតនៅលើសង្វៀននាយប់នេះ នឹងមិនធ្វើឱ្យខូចក្រេឌីតឡើយ ។ លោកថា ទូរទស្សន៍អាស៊ីអាគ្នេយ៍ ធ្លាប់បានដេញចោលកីឡាករ និងពិន័យមិនឱ្យឡើងប្រកួតច្រើនមកហើយ ទើបកីឡាករភាគច្រើនមិនហ៊ានសម្ដែងធ្វើចាញ់ណាមួយនោះទេនៅក្នុងការគ្រប់គ្រងរបស់លោក ។
ការប្រកួតមិត្តភាពនៅថ្ងៃសៅរ៍ស្អែកនេះវិញ លោក ញាណ សុធី បញ្ជាក់ថា កីឡាករ សេក គឹមផៃ មកពីក្លិបអង្គរមានជ័យខេត្តសៀមរាប ត្រូវជួបប្រកួតជាមួយកីឡាករថៃឈ្មោះ Phlay Noy ។ លោកថា កីឡាករកម្ពុជានឹងមិនភ្លាត់ឱ្យចាញ់សម្រាប់ការប្រកួតនេះទេ ព្រោះបើឈ្នះនឹងឡើងក្រេឌីត តែបើចាញ់នឹងរងការរិះគន់ថាប្រកួតធ្លាក់ដៃ ។ លោកថា កីឡាកររូបនេះ នឹងត្រូវការឈ្នះដើម្បីលុបលាងភាពអាម៉ាស់ ខណៈដែលកីឡាករថៃក៏ប្រាថា្នចង់ឈ្នះដូចគ្នា ។
កីឡាករថៃត្រូវលោកប្រកាសថា ធ្លាប់ប្រកួត១០៥លើក ឈ្នះ៨២លើក ចាញ់១៩លើក និងស្មើ៤លើក ក្នុងពេលកីឡាករកម្ពុជាឆ្លងកាត់ការប្រកួតបានតែ៦៦លើក ឈ្នះ៥៩លើក និងចាញ់៧លើក ។
សម្រាប់កីឡាករ ចាន់ ប៊ុនហឿន លោក ញាណ សុធី បញ្ជាក់ថា គេត្រូវឡើងប្រកួតជាមួយកីឡាករថៃឈ្មោះ Num Satoek ។ លោកថា ឆ្លងកាត់ការប្រកួតបានច្រើនលើក លោកក៏មិនទាន់ហ៊ានទុកចិត្តកីឡាករថៃ១០០ភាគរយនោះដែរ ដោយសារសំអាងថា កីឡាករកម្ពុជាក៏ល្អផងដែរ ។ លោកថា កីឡាករថៃធ្លាប់ប្រកួត៨៤លើក ឈ្នះ៦៥លើក ចាញ់១៨លើក និងស្មើ១លើក ក្នុងពេលកីឡាករកម្ពុជាធ្លាប់ប្រកួតបានដល់៥៦លើក ឈ្នះ៤៩លើក និងចាញ់៧លើក ទើបលោកប្រកាសថាមានតែរង់ចាំមើលការប្រកួតជាក់ស្ដែង ៕
ចែករំលែកព័តមាននេះ