រាជធានីភ្នំពេញ ៖ ព្រឹត្តិការណ៍រត់ប្រណាំងស្ដ្រីចម្ងាយ១០គីឡូម៉ែត្រ (Women Run 10K) លើកទី៥ ដើម្បីអបអរទិវាអន្តរជាតិនារីធ្វើឡើងនៅមុខវត្តបទុមវតីកាលពីព្រឹកថ្ងៃទី៨ ខែមីនា ឆ្នាំ២០២៦…
រាជធានីភ្នំពេញ ៖ ព្រឹត្តិការណ៍រត់ប្រណាំងស្ដ្រីចម្ងាយ១០គីឡូម៉ែត្រ (Women Run 10K) លើកទី៥ ដើម្បីអបអរទិវាអន្តរជាតិនារីធ្វើឡើងនៅមុខវត្តបទុមវតីកាលពីព្រឹកថ្ងៃទី៨ ខែមីនា ឆ្នាំ២០២៦ មានកីឡាករ កីឡាការិនីចូលរួមប្រមាណជាង៤ពាន់នាក់។ នេះបើតាមការឱ្យដឹងពីលោកសែម ផល្លា នាយកប្រតិបត្តិរៀបចំព្រឹត្តិការណ៍កីឡាម៉ារ៉ាតុងអមគណៈកម្មាធិការជាតិអូឡាំពិកកម្ពុជា។
លោកសែម ផល្លា បានឱ្យដឹងទៀតថាទិវារត់ប្រណាំងស្ត្រីចម្ងាយ១០គីឡូម៉ែតឆ្នាំនេះធ្វើឡើងក្រោមប្រធានបទ«ស្ត្រីរត់លើវិថីសន្តិភាព»។ ព្រឹត្តិការណ៍នេះទទួលបានការគាំទ្រយ៉ាងខ្លាំងពីសំណាក់ប្រជាពលរដ្ឋនៅក្នុងរាជធានីភ្នំពេញ ជាពិសេសមន្ត្រីរាជការ បុគ្គលិកក្រុមហ៊ុនដែលធ្វើឱ្យចំនួនអ្នកចូលរួមរត់លើសការរំពឹងទុក ដោយមានការកើនឡើងលើសឆ្នាំមុនប្រមាណ២០ភាគរយ ។ សូម្បីតែចំនួនមេដាយដែលធ្វើត្រៀមទុកចែកដល់អ្នកចូលរួមក៏ត្រូវខ្វះដែរ។
លោកនាយកប្រតិបត្តិរូបនេះបានឱ្យដឹងទៀតថា ពីមួយឆ្នាំទៅមួយឆ្នាំមានអ្នកចូលរួមកើនឡើងជាលំដាប់ ព្រោះពួកគាត់មានការយល់ដឹងច្រើនពីបញ្ហាសុខភាព ការលេងកីឡាដើម្បីសុខភាព និងការរស់នៅប្រចាំថ្ងៃ ។ មិនតែប៉ុណ្ណោះទិវារត់ប្រណាំងនេះក៏ជាផ្នែកមួយក្នុងការរួមចំណែកជួយជំរុញវិស័យសេដ្ឋកិច្ចជាតិឱ្យកាន់តែមានការរីកចម្រើនថែមមួយកម្រិតទៀត។ លោកថា ក្នុងចំណោមអ្នកចូលរួមជាង៤ពាន់នាក់នេះមានស្ត្រីប្រហែលជា៦០ភាគរយ។ លោកក៏បានដាក់ការរំពឹងខ្ពស់សម្រាប់ឆ្នាំក្រោយអាចនឹងមានអ្នកចូលរួមរហូតដល់៥ពាន់នាក់ ។ ដូច្នេះលោកក៏មានគម្រោងសម្រួលដល់ការចុះឈ្មោះឱ្យមានរយៈពេលវែងជាងឆ្នាំនេះដែរ។
លោកស្រីកុយ ពិសី ប្រធានគណៈកម្មការស្ត្រីនិងកីឡា អមគណៈកម្មាធិការជាតិអូឡាំពិកកម្ពុជា មានប្រសាសន៍ឱ្យដឹងថា បច្ចុប្បន្នស្ត្រីមានតួនាទី សកម្មភាពមិនចាញ់បុរសនោះទេ ។ ជាពិសេសការចូលរួមក្នុងការងារសង្គមជាតិ ជាថ្នាក់ដឹកនាំក្នុងជួរមន្ត្រីរាជការ ប្រធានក្រុមហ៊ុន និងកីឡាការិនីជម្រើសជាតិ ថែមទាំងដណ្ដើមបានមេដាយយ៉ាងច្រើនជូនជាតិទៀតផង។សរុបសេចក្ដីទៅអ្វីគ្រប់យ៉ាងដែលបុរសធ្វើបានស្ត្រីក៏អាចធ្វើបានដែរ ៕
ចែករំលែកព័តមាននេះ