រាជធានីភ្នំពេញ ៖ ថ្ងៃអាទិត្យ ទី២ មេសា ខានស្អែកនេះ នៅលើសង្វៀនទូរទស្សន៍ភីអិនអិន មានរៀបចំការប្រកួតប្រដាល់ដូចរាល់ដងដែលប្រមូលផ្ដុំដោយកីឡាករជើងចាស់និងជើងថ្មីចំនួន៤គូឡើងបញ្ចេញស្នៀត
រាជធានីភ្នំពេញ ៖ ថ្ងៃអាទិត្យ ទី២ មេសា ខានស្អែកនេះ នៅលើសង្វៀនទូរទស្សន៍ភីអិនអិន មានរៀបចំការប្រកួតប្រដាល់ដូចរាល់ដងដែលប្រមូលផ្ដុំដោយកីឡាករជើងចាស់និងជើងថ្មីចំនួន៤គូឡើងបញ្ចេញស្នៀតគុនជូនទស្សនិកជនបានទស្សនាកម្សាន្តនាថ្ងៃសម្រាកចុងសប្ដាហ៍មិនឱ្យខកបំណងឡើយ ។
កីឡាករ ពុយ វណ្ណៈ មកពីក្លិបឃ្លាំងមឿងកីឡា ត្រូវជួបប្រកួតជាមួយកីឡាករ ពុទ្ធ អំអាន មកពីក្លិបពុទ្ធសិរីវង្សព្រែកតាទែន ។ រវាង ពុយ វណ្ណៈ និង ពុទ្ធ អំអាន ទើបតែមានឈ្មោះបោះសំឡេងនៅលើសង្វៀនប្រដាល់មួយរយៈខ្លីនេះប៉ុណ្ណោះ ប៉ុន្តែអ្នកប្រដាល់ជើងចាស់ល្មមៗពិបាកទប់ទល់ជាមួយគេខ្លាំងណាស់ ។ ពុយ វណ្ណៈ ស្នៀតកែងនិងជង្គង់ល្អ ចលនាវាយចេញរហ័ស ប៉ុន្តែមិនដែលបានជួបប្រកួតជាមួយ ពុទ្ធ អំអាន ពីមុនមកឡើយ ។ ពុទ្ធ អំអាន ជាអ្នកប្រដាល់មួយរូបដែលធ្វើឱ្យអ្នកតាមដានការប្រកួតភាគច្រើនមានការចាប់អារម្មណ៍យ៉ាងខ្លាំង ដោយសារតែកីឡាកររូបនេះទើបតែមានឈ្មោះបោះសំឡេងនៅលើសង្វៀនមិនបានប៉ុន្មានផង គេអាចផ្ដួលអ្នកប្រដាល់ជើងចាស់មួយចំនួនឱ្យចាញ់នៅក្រោមកណ្ដាប់ដៃរបស់គេជាបន្តបន្ទាប់ ។
ប៉ុន្តែលើកនេះនៅមិនទាន់ដឹងថា យ៉ាងណានោះទេ ព្រោះអី ពុយ វណ្ណៈ ក៏មិនមែនជាជើងអន់ដែលងាយស្រួលបង្ក្រាបប៉ុន្មានទេ ។
ចំណែកកីឡាករ យុគ យក្សផ្លែ មកពីក្លិបបុរីរាជសីហ៍មានឫទ្ធិ ដែលត្រូវជួបប្រកួតជាមួយកីឡាករ ព្រឿង សុជាតិ មកពីសមាគមកីឡាប្រដាល់ក្រសួងការពារជាតិ លើកនេះមិនទាន់ដឹងថាយ៉ាងណានោះដែរ ព្រោះពួកគេទាំងពីរមិនធ្លាប់ជួបគ្នាទេពីមុនមក ។ យោងតាមការសង្កេតយុគ យក្សផ្លែ ថ្វីដៃប្រកួតរបស់គេល្អគួរសមទាំងផ្លែកែងនិងជង្គង់អាចប្រើការបានយ៉ាងស្ទាត់ជំនាញបំផុត គ្រាន់តែចិត្តរបស់គេរាងឆេវឆាវបន្តិច ។ រីឯព្រឿង សុជាតិ ដែលមានប្រវត្តិប្រកួតច្រើនជាងយុគ យក្សផ្លែ បន្តិចនោះក៏មិនប្រាកដថាអាចផ្ដួលគូប្រកួតបានឬអត់នោះទេ ។ ព្រឿង សុជាតិ ផ្លែកែងនិងជង្គង់មិនសូវជាប្រើការបានល្អប៉ុន្មាន ប៉ុន្តែស្នៀតកណ្ដាប់ដៃរបស់គេមិនអាចមើលស្រាលបានឡើយ ឯកម្លាំងស៊ុហ្វត្រឹមប្រកួត៥ទឹកគឺមិនលំបាកសម្រាប់រូបគេសោះ ។ ចាំមើលគូនេះអ្នកណានឹងក្លាយជាអធិរាជនៅលើសង្វៀន ?
ចំណែក២គូទៀត កីឡាករ លី ជិនហឺ មកពីក្លិបសាមគ្គីកូនខ្មែរ ប្រកួតជាមួយកីឡាករ ម៉ុន ស៊ីម៉ាក់ មកពីក្លិបអង្គរមានជ័យខេត្តសៀមរាប និងកីឡាករ ផាន រះ មកពីក្លិបតាព្រហ្មមានជ័យ ប្រកួតជាមួយកីឡាករ លីន វីរៈ មកពីក្លិបបុរីរាជសីហ៍មានឫទ្ធិ ៕
ចែករំលែកព័តមាននេះ