ច្បាស់លាស់ហើយ អំពីកាលបរិច្ឆេទ នៃការប្រកួតកីឡាជាតិ
- ភ្នំពេញ
រាជធានីភ្នំពេញ ៖ មុននេះបន្តិច ការនិយាយពីការប្រកួតកីឡាជាតិគេនៅប្រើពាក្យថានឹងធ្វើនៅ
រាជធានីភ្នំពេញ ៖ មុននេះបន្តិច ការនិយាយពីការប្រកួតកីឡាជាតិគេនៅប្រើពាក្យថានឹងធ្វើនៅក្នុងអំឡុងខែវិច្ឆិកា ឆ្នាំ២០២២ ទើបតែនៅពេលនេះ ក្រសួងអប់រំ យុវជន និងកីឡា សហការជាមួយគណៈកម្មាធិការជាតិអូឡាំពិកកម្ពុជា គណៈកម្មាធិការជាតិប៉ារ៉ាឡាំពិកកម្ពុជា រួមជាមួយសហ
ព័ន្ធកីឡាជាតិចំនួន៣៨ ប្រកាសថានឹងរៀបចំការប្រកួតកីឡាជាតិ លើកទី៣ ឆ្នាំ២០២២ ចាប់ពីថ្ងៃទី១៩ ដល់ថ្ងៃទី៣០ ខែវិច្ឆិកា ឆ្នាំ ២០២២ ដែលមាន៣៨ប្រភេទកីឡា និងប្រភេទកីឡាប៉ារ៉ាឡាំពិកចំនួន៧ ដែលមានវិញ្ញាសា៤០៥ នៅរាជធានីភ្នំពេញ ខេត្តកែប កំពត ព្រះសីហនុ និងខេត្តសៀមរាប។
ចំពោះពិធីសម្ពោធបើកការប្រកួតនឹងប្រព្រឹត្តទៅនាថ្ងៃទី២១ ខែវិច្ឆិកា ឆ្នាំ២០២២ វេលាម៉ោង
១៨:០០នាទី និងបិទនាថ្ងៃទី៣០ ខែវិច្ឆិកា ឆ្នាំ២០២២ វេលាម៉ោង១៨:០០នាទី នៅពហុកីឡដ្ឋានជាតិមរតកតេជោក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។
ការប្រកួតនេះធ្វើឡើងក្នុងគោលបំណងផ្តល់ឱកាសដល់សហព័ន្ធកីឡាជាតិទាំងអស់បានដាក់មន្ត្រីបច្ចេកទេសដែលបានបណ្តុះបណ្តាលរួចឲ្យអនុវត្តការរៀបចំប្រកួតជាក់ស្តែងលើទីលានប្រកួតទទួលបានចំណេះដឹងនិងបទពិសោធន៍ កីឡាករកីឡាការិនីបានវាស់ស្ទង់គុណផលកីឡា និងទទួលបានបទពិសោធន៍នៃការប្រកួត រៀបចំទីលានប្រកួតឲ្យស្របតាមស្តង់ដារតំបន់ រៀបចំពិធីបើក និងបិទឲ្យស្របតាមស្តង់ដារហ្គេម ជាការសាកល្បងចុងក្រោយសម្រាប់ត្រៀមលក្ខណៈធ្វើជាម្ចាស់ផ្ទះនៃការប្រកួតកីឡាស៊ីហ្គេមលើកទី៣២និងអាស៊ានប៉ារ៉ាហ្គេម លើកទី១២ ឆ្នាំ២០២៣ នៅព្រះរាជាណាចក្រកម្ពុជា។
ការប្រកួតកីឡាជាតិធ្វើឡើងរៀងរាល់២ឆ្នាំម្ដង ខណៈលើកទី១ធ្វើនៅឆ្នាំ២០១៦ដែលកាលនោះកីឡាចំនួន១៤ប្រភេទត្រូវបានដាក់ឲ្យប្រកួត ។លើកទី២ធ្វើនៅឆ្នាំ២០១៨ ដោយដាក់កីឡាចំនួន២៧ប្រភេទឲ្យប្រកួត ។ ការប្រកួតកីឡាជាតិលើកទី៣គ្រោងធ្វើនៅឆ្នាំ២០២០តែដោយសារការរាតត្បាតនៃជំងឺកូវីដ១៩នោះទើបការប្រកួតកីឡាជាតិលើកទី៣ត្រូវបានអូសបន្លាយមកដល់ឆ្នាំ២០២២នេះ ៕
ចែករំលែកព័តមាននេះ