រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានសម្តែងនូវសុទិដ្ឋិនិយមថា កម្ពុជានឹងទទួលបានភ្ញៀវទេសចរចិន១លាននាក់នៅឆ្នាំនេះ កើនឡើងពីជាង៨០ម៉ឺននាក់កាលពីឆ្នាំមុន ។
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានសម្តែងនូវសុទិដ្ឋិនិយមថា កម្ពុជានឹងទទួលបានភ្ញៀវទេសចរចិន១លាននាក់នៅឆ្នាំនេះ កើនឡើងពីជាង៨០ម៉ឺននាក់កាលពីឆ្នាំមុន ។
លោករដ្ឋមន្ត្រីមានប្រសាសន៍តាមទូរស័ព្ទកាលពីពេលថ្មីៗនេះថា លោករំពឹងថា ចំនួនភ្ញៀវទេសចរចិននឹងកើនដល់១លាននាក់នៅឆ្នាំនេះ ជាមួយកំណើនដែលយើងព្យាករថា នឹងសម្រេចបាន២០% ធៀបរយៈពេលដូចគ្នាកាលពីឆ្នាំមុន ។ បច្ចុប្បន្ន មានភ្ញៀវទេសចរចិនកាន់តែច្រើនមកទស្សនាកម្ពុជា តាមរយៈការបង្កើនជើងហោះហើរពីគោលដៅសំខាន់ៗរបស់ប្រទេសចិន ។ លោកបន្តថា កម្ពុជារំពឹងថា នឹងទទួលបានភ្ញៀវទេសចរចិនប្រមាណ២លាននាក់នៅឆ្នាំ២០២០ ខាងមុខនេះ ។
ក្រសួងទេសចរណ៍បានដាក់ចេញនូវផែនការយុទ្ធសាស្ត្ររបស់ខ្លួនរួចហើយ ដើម្បីទាក់ទាញភ្ញៀវទេសចរចិនមកទស្សនាកម្ពុជា តាមរយៈការដាក់ចេញសៀវភៅ «ស» ឬ China Ready បង្កើនការបណ្តុះបណ្តាលមគ្គទេសក៍និយាយភាសាចិន ក៏ដូចជាការបង្កើតវេបសាយជាភាសាចិនជាដើម ។
លោក ថោង ខុន បន្តថា ឆ្នាំនេះ ការមកដល់របស់ភ្ញៀវទេសចរពីគោលដៅនានាបានកើនឡើងច្រើន ជាពិសេស ភ្ញៀវទេសចរចិន លើកលែងតែភ្ញៀវទេសចរកូរ៉េនៅបន្តធ្លាក់ចុះ។ ផ្ទុយទៅវិញ ភ្ញៀវទេសចរជប៉ុនបានចាប់ផ្តើមកើនឡើង ដោយសារការភ្ជាប់ជើងហោះហើរត្រង់ពីក្រុមហ៊ុនអាកាសចរណ៍ ANA របស់ជប៉ុនមកកាន់កម្ពុជា ក្នុងអំឡុងដើមខែកញ្ញា ឆ្នាំមុន ។
ក្នុងអំឡុងដំណើរទស្សនកិច្ចមកកម្ពុជាកាលពីចុងឆ្នាំមុន ប្រធានាធិបតីចិន ស៊ី ជីងពីង បានសន្យាថា នឹងជំរុញឲ្យមានជើងហោះហើរត្រង់ថ្មីៗពីប្រទេសចិនមកកាន់កម្ពុជាឲ្យបានច្រើនបន្ថែមទៀត ដើម្បីសម្រេចគោលដៅធ្វើយ៉ាងណា ឲ្យកម្ពុជាទទួលបានភ្ញៀវទេសចរចិន២លាននាក់នៅឆ្នាំ២០២០ តាមការគ្រោងទុក ។
លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជា មានប្រសាសន៍ថា កាលពីឆ្នាំមុន កម្ពុជាទទួលបានភ្ញៀវទេសចរចិនជិត៨០ម៉ឺននាក់ ។ ដូច្នេះ ឆ្នាំនេះលោករំពឹងថា នឹងទទួលបានភ្ញៀវចិន១លាននាក់ ព្រោះគោលនយោបាយបើកចំហជើងមេឃរបស់រាជរដ្ឋាភិបាល និងការកើនឡើងនៃជើងហោះហើរពីប្រទេសចិន នឹងធ្វើឲ្យកម្ពុជាសម្រេចបាននូវគោលដៅនេះ ។
លោកបន្តថា បច្ចុប្បន្ន មានក្រុមហ៊ុនអាកាសចរណ៍ចិនចំនួន៦ បានហោះហើរចេញពីគោលដៅផ្សេងៗគ្នាមកកាន់ព្រលានយន្តហោះអន្តរជាតិទាំងបីរបស់កម្ពុជា ដោយក្នុងមួយសប្តាហ៍មានជើងហោះហើរពីប្រទេសចិនចន្លោះពី៣០ទៅ៤០លើក ។ លោកបន្តថា ភ្ញៀវទេសចរចិន ជាប្រភេទភ្ញៀវមានគុណភាព ចំណាយប្រាក់ច្រើន និងស្នាក់នៅរយៈពេលមធ្យមនៅកម្ពុជា ខុសពីបណ្តាប៉ុន្មានឆ្នាំមុន ដែលប្រទេសនានាមិនសូវស្វាគមន៍ភ្ញៀវទេសចរចិនទេ ប៉ុន្តែពេលនេះ ភ្ញៀវចិនត្រូវបានប្រទេសនានាស្វាគមន៍ ដោយសារពួកគេចូលចិត្តទិញទំនិញ និងចំណាយប្រាក់ច្រើន ៕
ចែករំលែកព័តមាននេះ