ខេត្តស្ទឹងត្រែង ៖ នៅល្ងាចថ្ងៃទី២៣ សីហា កន្លងមក អំណោយជាថវិការបស់សប្បុរសជនត្រូវបាននាំយកទៅប្រគល់ជូនដល់កូនភ្លោះប្រុសកំព្រាពិការ២នាក់ដែលផ្ញើខ្លួនរំពឹងលើជីដូនជរា ចំនួន២៤០.០០០រៀល និង១០០ដុល្លារដែលផ្តល់តាមរយៈកោះសន្តិភាព ។ ថវិកាជាអំណោយនេះ កោះសន្តិភាពទទួលបានពី១-លោកសរ ធូរី ប្រធាននាយកដ្ឋានរដ្ឋបាលទូរគមនាគមន៍កម្ពុជាឧបត្ថម្ភ៥០ដុល្លារ ២-លោកគិត សុផល មេបញ្ជាការកងរាជអាវុធហត្ថខណ្ឌសែនសុខរាជធានីភ្នំពេញ ឧបត្ថម្ភ៥០ដុល្លារ ៣-លោកតែ សុខឡុង ឧបត្ថម្ភ២០ម៉ឺនរៀល និង៤-អ្នកស្រីខោល ម៉ាលី ព្រមទាំងបុត្រឧបត្ថម្ភ៤ម៉ឺនរៀល ។
កូនភ្លោះកំព្រាពិការទាំង២នាក់នេះ មានអាយុ១៤ឆ្នាំ ឈ្មោះដួង ហួ និងដួង ហៃ ពិការស្វិតដៃជើងតាំងពីកំណើត ហើយរស់នៅជាមួយជីដូនឈ្មោះទូ គីមឡេង អាយុ៧៩ឆ្នាំ រស់នៅក្នុងវត្តភ្នំស្ទឹងត្រែង ភូមិរាជានុកូល សង្កាត់ស្ទឹងត្រែងក្រុងស្ទឹងត្រែង ដែលមានម្តាយឈ្មោះច្រឹប បានស្លាប់តាំងពីឆ្នាំ១៩៩៦ ក្រោយពីវះកាត់បង្កើតពួកេគទាំងពីរនាក់បានរយៈពេល៨ថ្ងៃ និងមានឪពុកឈ្មោះដួង យូ ជាយោធា ហើយបានស្លាប់តាំងពីឆ្នាំ២០០៦ ដោយជំងឺគ្រុនចាញ់ ។
អំណោយជាថវិកា ដែលយកទៅប្រគល់ឱ្យក្មេងកំព្រាទាំងពីរនាក់នោះ ក៏មានការនិមន្តចូលរួមពីសំណាក់ព្រះតេជគុណអ៊ិត វីន ព្រះចៅអធិការវត្តភ្នំស្ទឹងត្រែង ។ កូនភ្លោះកំព្រាដួង ហួ និងដួង ហៃ ក្រោយពីទទួលអំណោយរួចក៏បានលើកដៃទាំងពីរប្រណមឡើងដោយសេចក្តីថ្លែងអំណរគុណដល់សប្បុរសជនទាំងអស់ដែលជួយជាថវិកាដើម្បីដោះស្រាយជីវភាព និងទិញថ្នាំ លេប ព្រោះសព្វថ្ងៃកុមារពិការទាំងពីរនាក់កំពុងមានជំងឺជាប់កាយ ហើយពីមួយថ្ងៃទៅមួយថ្ងៃ ដៃ ជើងចេះតែស្វិតទៅៗ អាស្រ័យដោយកង្វះអាហារូបត្ថម្ភ ។
កុមារពិការទាំងពីរនាក់នេះបាននិយាយឱ្យកោះសន្តិភាពដឹងថា សព្វថ្ងៃពួកគេរស់នៅយ៉ាងវេទនាបំផុត បើសិនជាជីដូនស្លាប់ចោល ពួកគេមិនដឹងជាពឹងលើនរណាទៀតទេ តែបើគេស្លាប់មុនប្រហែលជាអស់កម្មពៀរ និងមានសំណាងជាង ព្រោះរាល់ថ្ងៃនេះបានជីដូនជរាជាអ្នកថែរក្សា ហើយមានពេលខ្លះខឹងខ្លួនឯងដែលមិនអាចធ្វើអ្វីបានទាល់តែសោះ មិនដឹងថា ខ្លួនឯងនេះមានកម្មអ្វីពីជាតិមុនទេ ។
ជំនួសឱ្យកូនភ្លោះកំព្រាទាំងពីរ ព្រះតេជគុណអ៊ិត វីន ព្រះចៅអធិការវត្តភ្នំស្ទឹងត្រែងបានថ្លែងអំណរគុណដល់សប្បុរសជនដែលមានទឹកចិត្តអាណិតអាសូរយកចិត្តទុកដាក់លើការរស់នៅរបស់ក្មេងទាំងពីរនាក់នេះ ដែលកន្លងមកពួកគេមិនសូវជាមានពន្លឺប៉ុន្មានទេ តែឥឡូវពួកគេបានទទួលការយកចិត្តទុកដាក់ពីសប្បុរសជននានាជាពិសេសសារព័ត៌មានកោះសន្តិភាពបានលាតត្រដាងពីជីវិតពិតរបស់ពួកគេ ។ ព្រះអង្គសូមជូនពរដល់សប្បុរសជនជាម្ចាស់អំណោយឱ្យជួបតែសេចក្តីសុខ សេចក្តីចំរើន កុំបីឃ្លៀងឃ្លាតឡើយ ៕
ចែករំលែកព័តមាននេះ