បញ្ហាទំនាស់ដីទៀតហើយលោកស្រីឧកញ៉ា ស៊ុយ សុផាន
ខេត្តកណ្តាល ៖ នៅរសៀលថ្ងៃទី២៨ មីនា អ្នកភូមិប្រមាណ៣០គ្រួសារនៅភូមិពោធិ៍មៀវ ឃុំគគីរធំ ស្រុកកៀនស្វាយ បាននាំគ្នាទៅឡោមព័ទ្ធគ្រឿងចក្ររបស់
ខេត្តកណ្តាល ៖ នៅរសៀលថ្ងៃទី២៨ មីនា អ្នកភូមិប្រមាណ៣០គ្រួសារនៅភូមិពោធិ៍មៀវ ឃុំគគីរធំ ស្រុកកៀនស្វាយ បាននាំគ្នាទៅឡោមព័ទ្ធគ្រឿងចក្ររបស់ក្រុមហ៊ុនផានអ៊ីម៉ិចដែលលួចកាយទំនប់ធ្វើព្រំលើដីរបស់ពួកគាត់។ នៅពេលមានការតវ៉ានោះ គ្រឿងចក្រភាគីក្រុមហ៊ុនបានផ្អាកសកម្មភាពនិងបានកាយអាចម៍ដីលុបរណ្តៅវិញខណៈពេលដែលអ្នកភូមិទាំងនោះពុះកញ្ជ្រោលប្រឆាំងតវ៉ាយ៉ាងខ្លាំង ។ ប៉ុន្តែនៅពេលអ្នកភូមិម្ចាស់ដីនាំគ្នាត្រឡប់មកផ្ទះវិញអស់ ស្រាប់តែគ្រឿងចក្ររបស់ក្រុមហ៊ុននេះបានបន្តលួចធ្វើសកម្មភាពកាយដីដដែលធ្វើសកម្មភាពដូចចោរ។ ទង្វើរំលោភបំពាននេះត្រូវបានប្រជាពលរដ្ឋហៅថា «សង្គ្រាមដណ្តើមយកដីរាស្ត្រ» ។
ប្រជាពលរដ្ឋដែលនាំគ្នាទៅរារាំងគ្រឿងចក្ររបស់ក្រុមហ៊ុនផានអ៊ីម៉ិច បានអះអាងថា ភាគីក្រុមហ៊ុនមួយនេះបានរំលោភបំពានយកដីស្រែប្រាំងរបស់ពួកគាត់ ហើយពេលនេះមិនត្រឹមតែតវ៉ានៅកន្លែងទីតាំងកាយដីនោះទេ គឺពួកគាត់បានដាក់ពាក្យបណ្តឹងចូលទៅសាលាឃុំនិងរដ្ឋបាលស្រុកកៀនស្វាយរួចរាល់អស់ហើយ បើគិតមកទល់ពេលនេះរយៈពេលមួយខែហើយ តែនៅមិនទាន់មានដំណោះស្រាយនៅឡើយទេ សង្ស័យអភិបាលស្រុកត្រូវថ្នាំសណ្តំ ជាហេតុនាំឲ្យភាគីខាងក្រុមហ៊ុនឆ្លៀតឱកាសលួចកាយទំបន់ព័ទ្ធយកដីរបស់ពួកគាត់តាមទំនើងចិត្ត ។
ទាក់ទិននឹងទំនាស់ដីធ្លីរវាងក្រុមហ៊ុនលោកស្រីឧកញ៉ា ស៊ុយ សុផាន និងអ្នកភូមិត្រូវបានលោក ង៉ោ សុវណ្ណ ក្នុងនាមជាប្រធានគណៈពង្រឹងឃុំគគីរធំ និងឃុំសំរោងធំ ស្រុកកៀនស្វាយ ត្រូវបានអ្នកភូមិសំណូមពរសូមឱ្យចេញមុខដោះស្រាយជាមួយក្រុមហ៊ុន និងសុំបទអន្តរាគមន៍បន្ទាន់ពីលោកបណ្ឌិត ម៉ៅ ភិរុណ អភិបាលខេត្តកណ្តាលដើម្បីទប់ស្កាត់គ្រឿងចក្ររបស់ក្រុមហ៊ុនកុំឲ្យមានសកម្មភាពឈូសឆាយកាយលើកទំនប់ហ៊ុមព័ទ្ធដីជាបណ្តោះអាសន្នរង់ចាំការដោះសាយគ្នាតាមនីតិវិធីច្បាប់ ។ ជុំវិញភាពចម្រូងចម្រាស់នេះមិនអាចទាក់ទងសុំការបំភ្លឹពីលោកស្រីឧកញ៉ា ស៊ុយ សុផាន បានទេ ។
តាមការកត់សម្គាល់ លោកស្រីឧកញ៉ា ស៊ុយ សុផាន បង្កើតបញ្ហាទំនាស់ដីច្រើនកន្លែងទៀតរាប់មិនអស់ទេ ។ ចំពោះដំណោះស្រាយពីអាជ្ញាធរក៏យឺតដូចដង្កូវបាក់ខ្នង ។ ទំនាស់តំបន់មួយដោះស្រាយមិនទាន់ចប់ ធ្លាយទំនាស់តំបន់មួយទៀត។ កោះសន្តិភាពនឹងព្យាយាមស្វែងរកគ្រប់ឯកសារពាក់ព័ន្ធដើម្បីបូកសរុបម្តង តើអាចជាប់ឯតទគ្គកម្មខាងទំនាស់ដីដូចគេចោទមែនឬអត់?
ចែករំលែកព័តមាននេះ