រាជធានីភ្នំពេញ៖ ស្ត្រីជាម្ដាយចុងម្នាក់ ខណៈប្ដីចេញទៅធ្វើការបាត់ ខឹងកូនប្រុសទើបតែអាយុ២ឆ្នាំចាក់សាប៊ូចោល ក៏វាយទាត់ធាក់និងចាប់រុញបោកផ្ទប់ជញ្ជាំង រហូតដល់ស្លាប់បាត់បង់ជីវិត បន្ទាប់មកយកសពបម្រុងទៅបូជាចោលនៅវត្តបំបាត់ភស្តុតាងទៀត ។ ប៉ុន្តែដោយសារតែមានការសង្ស័យថាក្មេងប្រុសតូចនោះស្លាប់មិនប្រក្រតី លោកតាអាចារ្យក៏បានរាយការណ៍ជូននគរបាលឲ្យចុះទៅពិនិត្យមើល ទើបដឹងថាជារឿងឃាតកម្ម រួចក៏ឃាត់ខ្លួនម្ដាយចុងចិត្តខ្មៅនោះចាត់ការតាមច្បាប់តែម្ដង ។
ហេតុការណ៍នោះបានកើតឡើងកាលពីវេលាម៉ោង៧និង៣០នាទីយប់ថ្ងៃទី៣០ ខែមីនា ឆ្នាំ២០២៦ នៅចំណុចផ្ទះជួលបន្ទប់លេខ២ ជាន់ទី២ ផ្លូវបេតុង ស្ថិតនៅក្នុងភូមិដំណាក់ត្រយឹង សង្កាត់ចោមចៅទី២ ខណ្ឌ ពោធិ៍សែនជ័យ ភ្នំពេញ ។
ស្ត្រីជាម្ដាយចុងដែលជាឃាតករ ឈ្មោះ ហឿន ស្រីណៃ អាយុ២៤ឆ្នាំ មានទីលំនៅអចិន្ត្រៃយ៍នៅភូមិប្រាសាទ ឃុំតុងរ៉ុង ស្រុកព្រៃឈរ ខេត្តកំពង់ចាម ។ មានប្ដីឈ្មោះទេព វណ្ណឌី អាយុ២២ឆ្នាំមុខរបរព្រូរថយន្ត ចំណែកកូនប្រុសចុងដែលត្រូវបានវាយសម្លាប់ឈ្មោះឌី ភក្ត្រា អាយុ២ឆ្នាំ ហើយគ្រួសារមួយនេះស្នាក់នៅផ្ទះជួលកើតហេតុខាងលើ ។
នគរបាលបានប្រាប់ថា បុរសដែលជាឪពុកបង្កើតក្មេងប្រុសរងគ្រោះខាងលើបានលែងលះគ្នាជាមួយប្រពន្ធដើម ហើយបានយកកូនប្រុសឈ្មោះឌី ភក្ត្រានេះមកនៅជាមួយ ក្រោយពីលែងលះគ្នារួច ស្ត្រីជាប្រពន្ធដើមក៏បានទៅរស់នៅឯស្រុកកំណើតនៅខេត្តបាត់ដំបងបាត់ទៅ ។ លុះដល់អំឡុងខែសីហា ឆ្នាំ២០២៥ បុរសនោះក៏បានយកស្ត្រីឈ្មោះហឿន ស្រីណៃ (ឃាតករ)នេះដែលជាស្រីមេម៉ាយកូន១ដែរ មកធ្វើជាប្រពន្ធចុង និងរួមរស់នៅជាមួយគ្នារហូតមកដល់ថ្ងៃកើតហេតុ ។
នគរបាលបានប្រាប់ឲ្យដឹងបន្តទៀតថា នៅមុនពេលកើតហេតុ បុរសជាប្ដីបានចេញទៅធ្វើការ ដោយទុកឲ្យស្ត្រីជាប្រពន្ធក្រោយនេះនៅផ្ទះមើលថែទាំកូន ហើយក្រោយមកកូនប្រុសចុងឈ្មោះឌី ភក្ត្រា បានទៅលេងសាប៊ូ និងចាក់សាប៊ូចោល ។ ពេលឃើញបែបនេះស្ត្រីជាម្ដាយចុងចិត្តអប្រិយ ខឹងណាស់ក៏បានក្ដិចមួល ភ្លៅ ព្រមទាំងវាយទាត់ធាក់ចំឆ្អឹងជំនីរក្រោមក្លៀក និងចាប់បោកកូនចុងផ្ទុបទៅនឹងជញ្ជាំងបន្ទប់ បណ្ដាលឲ្យរងរបួសធ្ងន់ធ្ងរ ។ បន្ទាប់មកទៀតនាងនេះក៏បានហៅម៉ូតូកង់បីដឹកបញ្ជូនទៅកាន់មន្ទីរពេទ្យកុមារជាតិ ដើម្បីសង្គ្រោះបន្ទាន់ដែរ ប៉ុន្តែពេលទៅដល់គ្រូពេទ្យបានប្រាប់ថាកូនប្រុសចុងរូបនេះស្លាប់បាត់ទៅហើយ ទើបនាងដឹកសពយកទៅកាន់វត្តព្រៃស្ពឺ ដើម្បីបូជាបំបាត់ភស្តុតាង ។
នគរបាលបានប្រាប់ឲ្យដឹងបន្តទៀតថា ខណៈនោះដោយសារតែមានការសង្ស័យថាក្មេងប្រុសតូចនោះស្លាប់មិនប្រក្រតី ទំនងមិនមែនស្លាប់ដោយជំងឺ ទើបលោកតាអាចារ្យអត់ហ៊ានបូជា រួចក៏រាយការណ៍ជូននគរបាលប៉ុស្តិ៍ចោមចៅទី២និងនគរបាលខណ្ឌពោធិ៍សែនជ័យឲ្យចុះទៅពិនិត្យមើល ។ ពេលនោះទើបដឹងថាជារឿងឃាតកម្មដែលបង្កឡើងដោយស្ត្រីជាម្ដាយចុង បន្ទាប់មកនគរបាលក៏បានធ្វើការឃាត់ខ្លួនម្ដាយចុងចិត្តខ្មៅរូបនោះនាំទៅសាកសួរនិងកសាងសំណុំរឿងចាត់ការតាមច្បាប់តែម្ដង ។
ស្ត្រីជាឃាតកររូបនោះបានសារភាពប្រាប់នគរបាលថា នៅថ្ងៃទី៣០ ខែមីនា ឆ្នាំ២០២៦ វេលាម៉ោង ០៦ និង៣០នាទីព្រឹក ប្តីបានចេញទៅធ្វើការបាត់ ហើយនាងបាននៅក្នុងបន្ទប់ជួលមើលកូនចុង(ក្មេងប្រុសរងគ្រោះ) ។ ពេលនោះកូនចុងបានលេងកន្ត្រកសាប៊ូ ហើយបានចាក់ចោល ជាហេតុធ្វើឲ្យនាងខឹងក៏បានវ៉ៃ ក្តិចមួលភ្លៅ បណ្ដាលឲ្យកូនស្រែកយំខ្លាំងៗ ខណៈនោះនាងលួងមិនបាត់យំសោះ ទើបទាត់ថែម១ជើងទៀត និងទាញដៃបោកផ្ទប់ជញ្ជាំងបន្ទប់ រួចលើកដាក់លើអង្រឹង ។ ក្រោយមកដោយកូនចុងនេះយំស្រែករហូតដល់ទន់ដៃទន់ជើងនិងស្លេកស្លាំង ទើបនាងហៅម៉ូតូកង់បីដឹកបញ្ចូនទៅកាន់មន្ទីរពេទ្យកុមារជាតិ តែពេលទៅដល់ត្រូវគ្រូពេទ្យបញ្ជាក់ថា ស្លាប់បាត់ទៅហើយ រួចក៏ដឹកសពមកតម្កល់ទុកនៅវត្តព្រៃស្ពឺ ប៉ុន្តែមិនទាន់បានបូជាសពផង ក៏ត្រូវនគរបាលឃាត់ខ្លួនតែម្ដង ។
ក្រោយទទួលបានព័ត៌មាននោះហើយ នគរបាលការិយាល័យបច្ចេកទេសនិងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ និងលោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមសាលាដំបូងរាជធានីភ្នំពេញសហការណ៏ជាមួយអង្គការការពារកុមារ(CPU)បានធ្វើកោសល្យវិច័យ ហើយសន្និដ្ឋានថា ក្មេងប្រុសរូបនោះស្លាប់ដោយសារខ្សោះឈាម បណ្តាលមកពីបែកតម្រងនោមខាងឆ្វេងឈាមហូរពេញពោះ ៕
ចែករំលែកព័តមាននេះ