រាជធានីភ្នំពេញ ៖ ការប្រកួតបាល់ទាត់មិនមែនអាជីព នៃពានរង្វាន់ខ្មែររៀលអុីស្ទេតលីគឆ្នាំ២០១៧ ដែលបានធ្វើឡើងកាលពីថ្ងៃសៅរ៍និងអាទិត្យ ទី២៥-២៦ មីនា កន្លងមកនេះ គេបានរកឃើញក្រុមចំនួន៣ដែលកំពុងតែមានពិន្ទុនាំមុខគេនៅក្នុងតារាងជាបណ្ដោះអាសន្ន គឺក្រុមនិស្ស័យ ឈរនៅកំពូលតារាង ក្រុមAnvayaឈរនៅលេខរៀងទី២ និងក្រុមAvata ឈរនៅលេខរៀងទី៣។
ក្រុមទាំង៣នេះសុទ្ធតែបានយកឈ្នះលើគូប្រកួតរៀងៗខ្លួននៅលើទីលានដំរីស ។ សម្រាប់ការប្រកួតកាលពីថ្ងៃសៅរ៍ ដែលមានតែ២ប្រកួតនោះ ក្រុមបាយ័នបានចាញ់ក្រុមនិស្ស័យនៅក្នុងលទ្ធផល១-៥ និងក្រុមបាសាក់បានចាញ់ក្រុមAvata ១-២ ។ ចំណែកថ្ងៃអាទិត្យដែលមាន៦ប្រកួតនោះ ពេលព្រឹកមាន៣ប្រកួតជាលទ្ធផល ក្រុមAnvaya បានយកឈ្នះលើក្រុមខ្លាស ៤-១ក្រុមHavasបានយកឈ្នះលើក្រុមHHK៥-១ និងក្រុមកំពង់ចាមស្មើ១-១ជាមួយក្រុមBlue Dragon ។ ពេលល្ងាចមាន៣ប្រកួត ក្រុមខ្មែរយូណាយធីត បានយកឈ្នះលើក្រុមV.Train៣-០ ក្រុមGiantស្មើ៣-៣ជាមួយក្រុមGood hill និងក្រុមNaritaបានយកឈ្នះលើក្រុមកូនខ្មែរ៦-១ ។
សម្រាប់ក្រុមទាំង៣ដែលកំពុងតែឈរនៅកំពូលតារាងជាបណ្ដោះអាសន្ននេះ គឺសុទ្ធតែមាន៦ពិន្ទុនៅក្នុងដៃរៀងខ្លួន គ្រាន់តែក្រុមនិស្ស័យមានគ្រាប់បាល់ចំណេញរហូតដល់ទៅ៩គ្រាប់ ។ ទោះបីជាយ៉ាងណា គូប្រជែងយ៉ាងសំខាន់របស់គេគឺក្រុមAvata និងក្រុមAnvayaដែលកំពុងតែព្យាយាមប្រជែងយកតំណែងកំពូលតារាងដូចគ្នា ៕
ចែករំលែកព័តមាននេះ