ខេត្តប៉ៃលិន ៖ បុរសវ័យចំណាស់ម្នាក់ត្រូវបានកម្លាំងនគរបាលនៃអធិការស្រុកសាលាក្រៅ ធ្វើការចាប់ឃាត់ខ្លួនបញ្ជូនទៅស្នងការនគរបាលខេត្តប៉ៃលិនឱ្យចាត់ការបន្ត ខណៈជនសង្ស័យរូបនេះបានសម្ងំដាំកញ្ឆាខុសច្បាប់ជិត១០០គុម្ព
ខេត្តប៉ៃលិន ៖ បុរសវ័យចំណាស់ម្នាក់ត្រូវបានកម្លាំងនគរបាលនៃអធិការស្រុកសាលាក្រៅ ធ្វើការចាប់ឃាត់ខ្លួនបញ្ជូនទៅស្នងការនគរបាលខេត្តប៉ៃលិនឱ្យចាត់ការបន្ត ខណៈជនសង្ស័យរូបនេះបានសម្ងំដាំកញ្ឆាខុសច្បាប់ជិត១០០គុម្ពនៅក្នុងចម្ការក្បែរផ្ទះរបស់ខ្លួន ដើម្បីយកមកហាន់ហាលឱ្យស្ងួតរួចប្រើប្រាស់(ជក់) លុះមានសេចក្តីរាយការណ៍ពីប្រជាពលរដ្ឋនៅក្នុងភូមិទើបនគរបាលចុះចាប់ឃាត់ខ្លួន និងដកបំផ្លាញកញ្ឆាតែម្តង ។
ហេតុការណ៍ចាប់ឃាត់ខ្លួននេះបានកើតឡើងកាលពីវេលាម៉ោង១០ព្រឹកថ្ងៃទី២៨ ខែមីនា ឆ្នាំ២០១៧ ស្ថិតចំណុចវាលចែង ក្នុងភូមិអូរ៧៥ ឃុំអូរអណ្តូង ស្រុកសាលាក្រៅ ខេត្តប៉ៃលិន នៅជុំវិញបរិវេណផ្ទះជនសង្ស័យ ។ ជនសង្ស័យមានឈ្មោះ មៀល ប៉ុន ភេទប្រុស អាយុ៥៤ឆ្នាំ ជាកសិកររស់នៅភូមិខាងលើ ។
ប្រភពព័ត៌មានពីលោកវរសេនីយ៍ទោ ញឹក ថុល អធិការនគរបាលស្រុកសាលាក្រៅបានឱ្យដឹងថា ក្រោយទទួលបានព័ត៌មានខាងលើលោកក៏បានដឹកនាំកម្លាំងនគរបាលចុះសហការជាមួយខាងប៉ុស្តិ៍នគរបាលរដ្ឋបាលឃុំអូរអណ្ដូង និងកម្លាំងប្រជាការពារភូមិដើម្បីធ្វើការចុះបង្ក្រាបករណីដាំដុះកញ្ឆាខុសច្បាប់នេះ ។
លោកបន្តទៀតថា ជាលទ្ធផលកម្លាំងរបស់លោកបានដកហូតនូវវត្ថុតាងបានមួយចំនួនដូចជា ទី១-បំពង់សំរាប់ជក់កញ្ឆាចំនួន ទី២-កាំបិតហាន់កញ្ឆាចំនួន១ដើម ទី៣-ជ្រុញហាន់កញ្ឆា១គ្រឿង ទី៤- កញ្ឆាក្រៀមចំនួន៣ដើម និងទី៥-កញ្ឆាស្រស់ដើមធំចំនួន១៧ដើម និងកូនកញ្ឆាដើមតូចៗ ចំនួន៦៩ដើម សរុបទាំងអស់ចំនួន៨៦ដើម ។ លោកបញ្ជាក់ថា ជនសង្ស័យបានដាំដើមកញ្ឆាប្រើប្រាស់ខ្លួនឯងអស់រយៈពេលជាយូរមកហើយតែជាលក្ខណៈលួចលាក់អត់ឱ្យនរណាដឹងនោះទេ ៕
ចែករំលែកព័តមាននេះ