ឃាតកម្មសម្លាប់មនុស្សដុតលើគំនរសំរាម ជាង១ម៉ោងក្រោយនគរបាលក្រសោបបាន
ខេត្តស្ទឹងត្រែង ៖ ជនសង្ស័យបីនាក់ត្រូវបានកម្លាំងនគរបាលព្រហ្មទណ្ឌនៃស្នងការដ្ឋាននគរបាលខេត្តចាប់វាយខ្នោះជាបន្តបន្ទាប់ក្រោយធ្វើសកម្មភាពវាយប្លន់បុរសម្នាក់
ខេត្តស្ទឹងត្រែង ៖ ជនសង្ស័យបីនាក់ត្រូវបានកម្លាំងនគរបាលព្រហ្មទណ្ឌនៃស្នងការដ្ឋាននគរបាលខេត្តចាប់វាយខ្នោះជាបន្តបន្ទាប់ក្រោយធ្វើសកម្មភាពវាយប្លន់បុរសម្នាក់យកម៉ូតូរួចសែងដុតលើគំនរសំរាមបានជាងមួយម៉ោងក្រោយ។ ហេតុការណ៍នេះបានកើតឡើងនៅវេលាម៉ោងជាង១រសៀល ថ្ងៃទី២៩ មីនា២០១៧ ស្ថិតនៅមាត់ស្រះទឹកក្បែរគំនរសំរាមភូមិស្រែពោធិ៍ សង្កាត់ស្រះឫស្សី ក្រុងស្ទឹងត្រែង។ ទាក់ទិនការសម្លាប់មនុស្សប្លន់យកម៉ូតូនោះត្រូវសមត្ថកិច្ចអះអាងថា ជនរងគ្រោះ និងក្រុមជនសង្ស័យទំនងស្គាល់គ្នាព្រោះនៅកន្លែងកើតហេតុមានដានភស្តុតាងមួយចំនួនជាការសន្និដ្ឋាន។
សមត្ថកិច្ចស្រាវជ្រាវនៅកន្លែងកើតហេតុបានធ្វើការគូសវាសលើកហេតុផលថា ជនរងគ្រោះមុនពេលត្រូវវាយសម្លាប់បានចុះទៅបង់សំណាញ់ និងដាក់លបក្នុងស្រះទឹក ហើយក្រុមជនសង្ស័យក្នុងគោលបំណងលួចម៉ូតូខណៈធ្វើសកម្មភាពជនរងគ្រោះឃើញទាន់ពេលក៏រត់ឡើងគោកប្រវាយប្រតប់ដណ្តើមយកម៉ូតូពីក្រុមជនសង្ស័យវិញ។ ការសន្និដ្ឋានបន្តថា គ្រាក្រុមជនសង្ស័យបញ្ឆេម៉ូតូជិះចេញ ជនរងគ្រោះរត់មកទាញម៉ូតូពីក្រោយរួចអូសជាច្រើនម៉ែត្រ គ្រាឃើញបែបនេះក្រុមជនសង្ស័យអាចទំនងជាស្គាល់គ្នានោះវាយពីក្រោយចំកញ្ចឹងកសម្លាប់ដើម្បីបំបិទមាត់រួចសែងទៅដាក់លើគំនរសំរាមដុតទាំងនៅមានដង្ហើម។
ក្រោយរយៈពេលកើតហេតុ គ្រួសារប្រទះឃើញ ជនរងគ្រោះបានផុតដង្ហើមទៅហើយ ហើយសពក៏មិនត្រូវបានឆេះរលេះរលួយដែរ ដោយសារគំនរសំរាមដុតនោះឆេះតែបន្តិចរលត់ទៅវិញ។ លោក ហម ប៊ុនធែល ស្នងការរងកណ្តាលនគរបាលយុត្តិធម៌ខេត្តស្ទឹងត្រែងបានអោយដឹងថា នេះជាការជោគជ័យមួយបន្ទាប់ករណីឃាតកម្មកើតឡើងជាងមួយម៉ោងក្រោយកម្លាំងនគរបាលព្រហ្មទណ្ឌនៃស្នងការដ្ឋាននគរបាលខេត្តស្ទឹងត្រែងបានកំណត់មុខសញ្ញាតាមចាប់ខ្លួនបានភ្លាមៗ ព្រមទាំងដកហូតវត្ថុតាងដែលជាម៉ូតូរបស់ជនរងគ្រោះត្រលប់មកវិញ។
លោកបន្តថា ការជោគជ័យនេះដោយសារទីមួយយើងកំណត់គោលដៅមុខសញ្ញាទីពីរ យើងមានបណ្តាញភ្នាក់ងារដូច្នេះទើបឈានដល់ការឃាត់ខ្លួនជនដៃដល់ដំគោលដៅ។ លោកស្នងការរងបន្តថាជនរងសង្ស័យមានបក្ខពួក៣នាក់ ដែលបានឃាត់ខ្លួនសាកសួរហើយទាក់ទិនករណីឃាតកម្មនេះមិនទាន់ដឹងថា ជនណាម្នាក់ជាជនដៃដល់នៅឡើយដោយសារមួយឆ្លើយដាក់មួយដូច្នេះមានតែឲ្យពួកគេប្រឈមទល់មុខគ្នាថាតើស្ថិតក្នុងសកម្មភាពនោះ អ្នកណាជាអ្នកបើកបរម៉ូតូហើយអ្នកណាជាអ្នកដៃដល់វាយជនរងគ្រោះសម្លាប់រួចដុតលើគំនរសំរាម។
តាមប្រភពព័ត៌មានពីកូនប្រុសជនរងគ្រោះផ្តល់ចម្លើយទៅសមត្ថកិច្ចក្រោយប្រទះឃើញសពឪពុកថា មុនពេលកើតហេតុឪពុករបស់ខ្លួនបានប្រាប់ម្តាយ(ប្រពន្ធជនរងគ្រោះ)ថាទៅបង់សំណាញ់ និងដាក់លបនៅស្រះទឹកក្បែរកន្លែកចាក់សំរាម ក្រោយមកបាត់យូរពេកមិនឃើញមកហូបបាយកូនក៏បានមកតាមស្រាប់តែស្លុតអារម្មណ៍ឃើញឪដេកស្លាប់លើគំនរសំរាមនៅផ្សែងហុយៗទាំងសភាពផ្កាប់មុខដៃឆេះភ្លើង។ ប្រភពដដែលនោះបន្តថា ក្រោយប្រទះឃើញសពឪពុកដោយមិនរារែកក៏បានទូរស័ព្ទប្រាប់ម្តាយ និងបងប្អូននាំសពទៅលំនៅស្ថានភ្លាមដែរ។ ក្រោយមកទើបសមត្ថកិច្ចចុះស្រាវជ្រាវភ្លាមៗព្រមទាំងប្រមូលវត្ថុតាង និងធ្វើការអង្កេតគោលដៅមុខសញ្ញាភ្លាមៗ។
លោក ហម ប៊ុនធែល ស្នងការរងកណ្តាលនគរបាលយុត្តិធម៌បានឲ្យជនរងគ្រោះមានឈ្មោះ ដួង ច្រង់ ភេទប្រុស អាយុ៤៧ឆ្នាំមុខរបរកសិករ រស់នៅភូមិស្រែពោធិ៍ សង្កាត់ស្រែឫស្សី ក្រុងស្ទឹងត្រែង ខេត្តស្ទឹងត្រែង ក្រោយសាលាពេទ្យភូមិភាគ១។ ដោយឡែកជនសង្ស័យនៅមិនទាន់បង្ហាញអត្តសញ្ញាណនៅឡើយទេ ដោយសារកម្លាំងនគរបាលព្រហ្មទណ្ឌកំពុងសួរចម្លើយលើករណីឃាតកម្មខាងលើនេះ៕
ចែករំលែកព័តមាននេះ