ខេត្តកំពង់ឆ្នាំង ៖ មានការភ្ញាក់ផ្អើលមួយ បានកើតឡើងនៅវេលាម៉ោង៦និង៣០នាទីព្រឹកថ្ងៃទី២៩ មីនា ដោយសារតែសមត្ថកិច្ចជាច្រើនរួមជាមួយអ្នកស្រុក បានដេញស្ទាក់ចាប់ចោរលួចម៉ូតូម្នាក់ ហើយជននោះបានរត់ចូលទៅសម្ងំលាក់ខ្លួននៅក្នុងស្រះទឹកមួយ
ខេត្តកំពង់ឆ្នាំង ៖ មានការភ្ញាក់ផ្អើលមួយ បានកើតឡើងនៅវេលាម៉ោង៦និង៣០នាទីព្រឹកថ្ងៃទី២៩ មីនា ដោយសារតែសមត្ថកិច្ចជាច្រើនរួមជាមួយអ្នកស្រុក បានដេញស្ទាក់ចាប់ចោរលួចម៉ូតូម្នាក់ ហើយជននោះបានរត់ចូលទៅសម្ងំលាក់ខ្លួននៅក្នុងស្រះទឹកមួយកន្លែងក្បែររបងបន្ទាយទាហានតំបន់សឹករងកំពង់ឆ្នាំង ដែលជាអតីតបន្ទាយចាស់ស្ថិតក្នុងភូមិម៉ុងបារាំង សង្កាត់ប្អេរ ក្រុងកំពង់ ឆ្នាំង។
យោងតាមសេចក្តីរាយការណ៍របស់នគរបាលក្រុងកំពង់ឆ្នាំង បានឱ្យដឹងថា ចោរលួចម៉ូតូដែលត្រូវសមត្ថកិច្ចចាប់ខ្លួននោះឈ្មោះ យ៉ន ឌី ហៅ យ៉ន ម៉េងហៀង អាយុ២១ឆ្នាំ មានទីលំនៅភូមិសំរោងសែន ឃុំសំរោងសែន ស្រុកកំពង់លែង មកស្នាក់នៅជាមួយបង ស្រីក្នុងភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង ។ ប្រភពដដែលបានបន្តថា កាលពីវេលាម៉ោង៨និង៣០នាទីព្រឹកថ្ងៃទី២៨ មីនា ជនខាងលើបានធ្វើសកម្មភាពគាស់ទ្វារបន្ទប់ស្ត្រីម្នាក់ជាម្ចាស់ម៉ូតូឈ្មោះ យ៉ា យ៉ុន អាយុ៣៦ឆ្នាំ ជាកម្មកររោងចក្រ ស្នាក់នៅភូមិត្រពាំងចិក្សា សង្កាត់កំពង់ឆ្នាំង គឺជួលស្នាក់នៅជិតគ្នា ។
ពេលគាស់ទ្វារបន្ទប់បានហើយ ជននោះបានធ្វើសកម្មភាពកាច់ក និងកាត់សោជន្ទល់ម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរី២០១៣ ពាក់ផ្លាកលេខកំពង់ឆ្នាំង ១F-៣០២៨ រួចជិះទៅបាត់ ។ ក្រោយពីម្ចាស់ម៉ូតូត្រឡប់ពីធ្វើការនៅវេលាម៉ោង១១ថ្ងៃត្រង់មកដល់ផ្ទះវិញ ដឹងថាបាត់ម៉ូតូក៏ប្តឹងសមត្ថកិច្ចឱ្យជួយតាមរក ។
ប្រភពដដែលបានបន្តថា ក្រោយពីកំណត់មុខសញ្ញាបានហើយ ក៏ដាក់កម្លាំងស្វែងរកស្រាប់តែនៅព្រឹកថ្ងៃទី២៩ មីនា សមត្ថកិច្ចបានឃើញមុខសញ្ញាកំពុងជិះម៉ូតូយា៉ងរំភើយ ក៏បាននាំគ្នាដេញចាប់ ។ ពេលនោះជនល្មើសទាល់ច្រកបានលោតចោលម៉ូតូហើយព្យាយាមរត់គេចខ្លួនលោតចូលទៅសម្ងំលាក់ខ្លូននៅក្នុងទឹកស្រះក្បែររបងបន្ទាយតំបន់សឹករង ដែលមានស្មៅត្រឹបអណ្ដែតដុះក្រាស់ឃ្មឹក ។
រីឯសមត្ថកិច្ចពេលដេញតាមចោរទៅដល់ចំណុចនោះបាត់ដាននៅមាត់ស្រះ ក៏មានការសង្ស័យថា ជននេះអាចនឹងមុជទឹកគេចខ្លួនក្នុងស្រះ ហើយបាននាំគ្នាស្រែកឱ្យចេញពីក្នុងទឹកជាបន្ទាន់ ព្រមទាំងនាំគ្នាយកឈើស្រួចដើរចាក់ស្មានៗ តាមស្មៅ និងកំប្លោកក្នុងទឹកគ្រប់កន្លែង ដោយខ្លះគប់ដុំថ្មបង្អើលផង ។ ប្រហែលជាងកន្លះម៉ោង ទើបជននោះទ្រាំងអត់ដង្ហើមលែងបានក៏ស្ទុះងើបឡើងពីក្នុងទឹក ក៏ត្រូវសមត្ថកិច្ចក្របួចជាប់តែម្តង ។ ក្រោយការចាប់ខ្លួន សមត្ថកិច្ចបាននាំមកកសាងសំណុំរឿងបញ្ជូនទៅតុលាការតាមនីតិវិធីច្បាប់ ។
ដោយឡែក ស្ត្រីជាម្ចាស់ម៉ូតូបានប្រាប់សមត្ថកិច្ចថា ពេលជននោះមកស្នាក់នៅជាមួយបងស្រីរបស់គេក្បែរបន្ទប់គាត់ បុរសនេះបានបោះពាក្យសម្ដីថា ម៉ូតូថ្មីៗអញ្ចឹង ថ្ងៃណាមួយប្រាកដជាបាត់ខ្លួនមិនខាន មិនបានប៉ុន្មានថ្ងៃផងក៏បាត់មែន ៕
ចែករំលែកព័តមាននេះ