ប្រធានាធិបតីអាមេរិក លោកដូណាល់ ត្រាំ បានលុបចោលតាមក្រឹត្យផ្នែកមួយយ៉ាងធំនៃបណ្តាវិធានការប្រឆាំងការកើនកំដៅបរិយាកាសដែលបង្កើតឡើងដោយរដ្ឋការលោកអូបាម៉ា ដើម្បី កាត់បន្ថយផលិតកម្មថាមពលដែលបញ្ចេញការបំពុលបរិយាកាសខ្លាំងនៅដែនដីអាមេរិក ។
មុនពេលចុះហត្ថលេខាលើក្រិត្យនេះ លោកត្រាំ ថ្លែងថា រដ្ឋការរបស់ខ្ញុំបញ្ចប់សង្គ្រាមប្រឆាំងការប្រើធ្យូងថ្ម ។ តាមរយៈក្រឹត្យដែលចុះហត្ថលេខាថ្ងៃនេះ ខ្ញុំចាត់បណ្តាវិធានការជាប្រវត្តិសាស្ត្រនានា ដើម្បីលុបចោលការរឹតត្បិតនានាលើថាមពលអាមេរិក និងដើម្បីបញ្ចប់ការរឹតត្បិតទាំងនេះ ហើយលុបចោលបណ្តាបែបបទដែលបំផ្លាញការងារ ។
ក្រិត្យស្តីពីឯករាជ្យភាពនៃថាមពលសំដៅ ជាពិសេសលុបចោលផែនការ CLEAN POWER PLAN ដែលលោកបារ៉ាក់ អូបាម៉ា ដាក់ឱ្យប្រើកាលពីឆ្នាំ២០១៤ ដែលនោះជាការខិតខំប្រឹងប្រែងរបស់រដ្ឋការលោក ដើម្បីតស៊ូប្រឆាំងការផ្លាស់ប្តូរបរិយាកាស ដោយបង្ខំឱ្យសហរដ្ឋអាមេរិកកាត់បន្ថយ១ភាគ៣ រហូតដល់ឆ្នាំ២០៣០ បើប្រៀបធៀបទៅនឹងកម្រិតឆ្នាំ២០០៥ ការបញ្ចេញឧស្ម័នពុលកាបោនឌីអុកស៊ីតនៅតាមបណ្តាមជ្ឈមណ្ឌលអគ្គិសនី ។ ផែនការនេះរបស់លោកអូបាម៉ា ពុំត្រូវបានអនុវត្តឡើយ មកពីការតវ៉ាទៅតុលាការពីសំណាក់រដ្ឋជាច្រើន ។
CLEAN POWER PLAN អាចឱ្យសហរដ្ឋអាមេរិកគោរពការសន្យា ដែលមានចែងក្នុងកិច្ចព្រមព្រៀងក្រុងប៉ារីស ស្តីពីការកាត់បន្ថយការកើនកំដៅបរិយាកាសដែលចុះហត្ថលេខាកាលពីខែធ្នូ ឆ្នាំ២០១៥ ។ ក្រិត្យនេះរបស់លោកត្រាំ ស្នើដល់ទីភ្នាក់ងារការពារបរិស្ថានអាេមរិក EPA រៀបចំដំណើរការសើរើឡើងវិញជាផ្លូវការនូវកិច្ចព្រមព្រៀងក្រុងប៉ារីស ៕
ចែករំលែកព័តមាននេះ