លោក ត្រាំ អំពាវនាវឱ្យប្រទេសនានា រួមទាំងចិនផងនោះ បញ្ជូននាវាចម្បាំងទៅបើកច្រកសមុទ្រហ័រមូស
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី១៤ ខែមីនា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី១៤ ខែមីនា ឆ្នាំ២០២៦ (ម៉ោងនៅសហរដ្ឋអាមេរិក) បានអំពាវនាវប្រទេសនានា រួមទាំង ចិន បារាំង ជប៉ុន កូរ៉េខាងត្បូង អង់គ្លេស ផងនោះ ឱ្យបញ្ជូននាវាចម្បាំងជួយទៅបើកច្រកសមុទ្រហ័រមូស (Hormuz) ដើម្បីធានាផ្លូវដឹកជញ្ជូនប្រេងដ៏សំខាន់ចេញពីតំបន់មជ្ឈិមបូព៌ា ខណៈកងកម្លាំងអ៊ីរ៉ង់បន្តយុទ្ធនាការសងសឹករបស់ពួកគេផ្តោតខ្លាំងលើច្រកនេះ ចំពេលមានការវាយប្រហាររបស់សហរដ្ឋអាមេរិក និងអ៊ីស្រាអែល។
លោកប្រធានាធិបតី ត្រាំ បានសរសេរក្នុងសារមួយបង្ហោះលើបណ្តាញទំនាក់ទំនងសង្គម Truth Social ថា «បណ្តាប្រទេសនៃពិភពលោក ដែលទទួលប្រេងតាមរយៈច្រកហ័រមូស ត្រូវតែថែរក្សាការពារច្រកនោះ ហើយយើងនឹងជួយ។ សហរដ្ឋអាមេរិកក៏នឹងសម្របសម្រួលជាមួយប្រទេសទាំងនោះផងដែរ ដើម្បីឱ្យអ្វីៗដំណើរការលឿន រលូន និងល្អ»។
នៅក្នុងការប្រកាសមុននេះបន្តិច កាលពីថ្ងៃទី១៤ ខែមីនា ឆ្នាំ២០២៦ (ម៉ោងនៅសហរដ្ឋអាមេរិក) លោក ត្រាំ បានព្យាករណ៍ថា ប្រទេសជាច្រើន ជាពិសេសប្រទេសដែលរងផលប៉ះពាល់ដោយការប៉ុនប៉ងបិទច្រកសមុទ្រហ័រមូសរបស់អ៊ីរ៉ង់ នឹងត្រូវបញ្ជូននាវាចម្បាំង រួមជាមួយសហរដ្ឋអាមេរិក ដើម្បីរក្សាច្រកសមុទ្របើកចំហ និងមានសុវត្ថិភាព។ លោកបានសរសេរថា លោកសង្ឃឹមថា ប្រទេសចិន បារាំង ជប៉ុន កូរ៉េខាងត្បូង អង់គ្លេស និងប្រទេសដទៃទៀត នឹងបញ្ជូននាវាចម្បាំងទៅកាន់តំបន់នោះ។ ហើយក្នុងពេលជាមួយគ្នានេះ សហរដ្ឋអាមេរិកនឹងទម្លាក់គ្រាប់បែកចេញពីច្រាំងសមុទ្រ ហើយបន្តបាញ់ទូក និងនាវាអ៊ីរ៉ង់ចេញពីផ្ទៃទឹក។
សេតវិមានមិនទាន់បានឆ្លើយតបទៅនឹងសំណើសុំការអត្ថាធិប្បាយថា តើប្រទេសណាខ្លះបានយល់ព្រមក្នុងការបញ្ជូននាវាទៅបើកច្រកសមុទ្រហ័រមូសនៅឡើយនោះទេ។
សូមជម្រាបថា ប្រហែល១ភាគ៥នៃប្រេងពិភពលោក និងឧស្ម័នធម្មជាតិរាវ ជាធម្មតាឆ្លងកាត់តាមច្រកសមុទ្រហ័រមូស ដែលជាច្រកតូចចង្អៀតនៃដែនទឹករវាងប្រទេសអ៊ីរ៉ង់ និងប្រទេសអូម៉ង់។ សមត្ថភាពរបស់កងកម្លាំងអ៊ីរ៉ង់ក្នុងការបញ្ឈប់ការដឹកជញ្ជូនតាមរយៈផ្លូវទឹកដ៏សំខាន់នេះ អាចផ្តល់ផល់ប៉ះពាល់ដ៏ធំសម្បើមទាំងលើសហរដ្ឋអាមេរិក និងសម្ព័ន្ធមិត្តរបស់ខ្លួនផងដែរ៕ ប្រភព ៖ Reuters និង BBC
ចែករំលែកព័តមាននេះ