រាជធានីភ្នំពេញ ៖ ការប្រកួតប្រដាល់វគ្គសន្សំពិន្ទុឈានទៅដណ្ដើមខ្សែក្រវាត់គោជល់ក្នុងប្រភេទទម្ងន់៦៣,៥គីឡូក្រាមនៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី១ មេសា សប្ដាហ៍នេះ ឈានចូលដល់សប្ដាហ៍ទី៣ហើយ ។
សប្ដាហ៍នេះកីឡាករ សេក គឹមរួន មកពីក្លិបអង្គរមានជ័យ ខេត្តសៀមរាប និងកីឡាករ ឆៃ សារ៉ា មកពីសមាគមកីឡាប្រដាល់ក្រសួងការពារជាតិ សុទ្ធតែមានជំនឿចិត្តក្នុងការស្វែងរក៣ពិន្ទុបន្ថែមដូចគ្នា ។ យោងតាមកម្មវិធី សេក គឹមរួន ត្រូវជួបប្រកួតជាមួយកីឡាករថៃឈ្មោះផ្ស័កឧប៊ុន ធីដេតឡូងើន ដែលធ្លាប់ចាញ់ការប្រកួតក្នុងវគ្គជម្រុះជុំទី១រួចម្ដងមកហើយ ។ ដូច្នេះ សេក គឹមរួន មានសង្ឃឹមឈ្នះច្រើនជាងចាញ់ ដោយសារកីឡាករថៃរូបនេះរាងអន់វិជ្ជាគុន កម្លាំងក៏មិនសូវខ្លាំងទៀត ។ ទោះបីយ៉ាងណា សេក គឹមរួន ក៏មិនត្រូវមើលស្រាលគូប្រកួតនោះដែរបើមិនដូច្នោះទេច្បាស់ជាស៊យធំមិនខាន ព្រោះកីឡាករថៃរូបនេះក៏ត្រូវការឈ្នះ ដើម្បីឈោងចាប់ឱកាសឡើងទៅប្រកួតនៅវគ្គបន្តទៀតដែរ ។ ចាំមើល សេក គឹមរួន ដែលមាន៣ពិន្ទុនៅក្នុងដៃរួចទៅហើយនោះ អាចរកបាន៣ពិន្ទុបន្ថែមទៀតដែរឬយ៉ាងណា ។
ចំណែក ឆៃ សារ៉ា ដែលត្រូវជួបប្រកួតជាមួយកីឡាករថៃឈ្មោះភិគុនងើន ស.ផាន់ និសាមួយថៃ លើកនេះក៏មានជំនឿចិត្តក្នុងការស្វែងរក៣ពិន្ទុបន្ថែមដែរ ព្រោះកីឡាករថៃរូបនេះមិនមែនជាជើងខ្លាំងដែលពិបាកទប់ទល់នោះទេ ។ ជាក់ស្ដែងនៅក្នុងការប្រកួតជុំទី១ គេធ្លាប់ចាញ់ពិន្ទុសេក គឹមរួន រួចម្ដងមកហើយ ។
ក្រៅពីគូដណ្ដើមខ្សែក្រវាត់នៅលើសង្វៀនដដែលក៏មានគូប្រកួតមិត្តភាពផងដែរដូចជា កីឡាករ មឿន សុខហ៊ុច មកពីក្លិបពុទ្ធសិរីវង្សព្រែកតាទែន ប្រកួតជាមួយកីឡាករចិនឈ្មោះលាង យ័នហាវ និងកីឡាករ ចេង គា មកពីក្លិបសាលវ័ន្តកីឡា ប្រកួតជាមួយកីឡាករ ទេស ជីវ៉ា មកពីក្លិបកងពលតូចលេខ៧០ ។
ដោយឡែកនៅថ្ងៃអាទិត្យទី២ មេសា វិញ ក៏មានការប្រកួតអន្តរជាតិរវាងកីឡាករកម្ពុជានិងកីឡាករថៃជូនទស្សនិកជនទស្សនាកម្សាន្តនាថ្ងៃសម្រាកចុងសប្តាហ៍ផងដែរ ។ សម្រាប់គូអន្តរជាតិមាន កីឡាករ ជឹម ចិត្រា មកពីក្លិបខ្លារខិនមានរិទ្ធ ប្រកួតជាមួយកីឡាករថៃឈ្មោះចេក ងួនឌែងយីម និងកីឡាករហឹុម សេរី មកពីក្លិបតាព្រហ្មមានជ័យ ប្រកួតជាមួយកីឡាករថៃឈ្មោះសាយឡាប់ ធីដេតឡូងើន ។
ចំណែកគូប្រកួតមិត្តភាពរវាងកីឡាករកម្ពុជា និងកម្ពុជាវិញមានកីឡាករ វិន ចំអឹង មកពីក្លិបសុភានូមានជ័យ ប្រកួតជាមួយកីឡាករម៉ាន់ ទាន់ មកពីក្លិបសាមគ្គីកូនខ្មែរ ពុយ ឈិនមកពីក្លិបសាមគ្គីកូនខ្មែរ ។ កីឡាករ ពុយ ឈិន មកពីក្លិបសាមគ្គីកូនខ្មែរ ប្រកួតជាមួយកីឡាករ កាន់ ដារ៉ូ មកពីក្លិបពន្លឺវិបុល ។ កីឡាករ ពុទ្ធ សំបូរ មកពីក្លិបពុទ្ធសិរីវង្សព្រែកតាទែន ប្រកួតជាមួយកីឡាករ ថាន សារុន មកពីក្លិបពន្លឺណេអុង និងគូប្រកួតចុងក្រោយ កីឡាករ ប៉ឺត វណ្ណោះ មកពីក្លិបរ៉ាហាប់ស្វាយប៉ាក ប្រកួតជាមួយកីឡាករ ឡូន បញ្ញា មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ