រាជធានីភ្នំពេញ ៖ វិស័យទេសចរណ៍កម្ពុជាកំពុងតែរីកចម្រើនទាំងសេវាកម្ម និងគុណភាព តាមរយៈការបង្ហាញឲ្យឃើញនូវវត្តមានក្រុមហ៊ុននានាកាន់តែច្រើន ដែលបាននិងកំពុងផ្តល់សេវាកម្មក្នុងវិស័យនេះ ។
រាជធានីភ្នំពេញ ៖ វិស័យទេសចរណ៍កម្ពុជាកំពុងតែរីកចម្រើនទាំងសេវាកម្ម និងគុណភាព តាមរយៈការបង្ហាញឲ្យឃើញនូវវត្តមានក្រុមហ៊ុននានាកាន់តែច្រើន ដែលបាននិងកំពុងផ្តល់សេវាកម្មក្នុងវិស័យនេះ ។
លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជាបានថ្លែងឲ្យដឹងតាមទូរស័ព្ទនាព្រឹកថ្ងៃទី២៧ មីនា ថា វិស័យទេសចរណ៍កំពុងមានការរីកចម្រើនទាំងគុណភាព និងសេវាកម្ម ។ ក្នុងរយៈពេល១០ឆ្នាំចុងក្រោយនេះ ចំនួនក្រុមហ៊ុនទេសចរណ៍បានកើនឡើងពី២៨៨ដល់ជិត៦០០ ទាំងក្រុមហ៊ុនអាកាសចរណ៍ជាតិ និងបរទេស និងការមកដល់នូវវត្តមានសណ្ឋាគារល្បីៗនៅលើពិភពលោកកាន់តែច្រើន ។
លោកថ្លែងថា៖ « ការរីកចម្រើនក្នុងវិស័យនេះ ដោយសារកម្ពុជាបានចូលជាសមាជិកអង្គការពាណិជ្ជកម្មពិភពលោក ការបើកចំហជើងមេឃ និងគោលនយោបាយលើកទឹកចិត្តពីរាជរដ្ឋាភិបាលកម្ពុជា ដែលធ្វើឲ្យអ្នកវិនិយោគទុនខ្នាតមធ្យម និងខ្នាតធំ ចូលមកកាន់កម្ពុជាបន្តបន្ទាប់ » ។ លោកបន្តថា៖ « សេវាកម្មរថយន្តប្រណីត និងសេវាកម្មជាច្រើនទៀតក៏បាននិងកំពុងរីកចម្រើន និងផ្តល់ការងារដល់ប្រជាពលរដ្ឋផងដែរ » ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានថ្លែងថា វិស័យនេះពិតជាមានការរីកចម្រើនច្រើន ដោយក្រុមហ៊ុននានាបានកើនឡើងកាន់តែច្រើន និងមានសកម្មភាពមមាញឹក ស្របពេលក្រសួងទេសចរណ៍កំពុងបង្កើតឲ្យមានសកម្មភាព និងផលិតផលទេសចរណ៍ថ្មីៗជាច្រើន ដើម្បីឆ្លើយតបទីផ្សារកំពុងមានការរីកចម្រើន ព្រោះអ្នកនៅក្នុងវិស័យនេះ ចង់ឲ្យភ្ញៀវទេសចរមិនត្រឹមមកមើលអង្គរទេ តែចង់ជំរុញនិងផ្សព្វផ្សាយពីសក្តានុពលទេសចរណ៍ផ្សេងៗទៀត ដើម្បីឲ្យពួកគេធ្វើដំណើរកម្សាន្ដ និងស្នាក់នៅកម្ពុជាបានយូរអង្វែងផងដែរ ។
លោកស្រីបន្តថា អ្វីដែលសមាគមរៀបចំកម្មវិធីជួបជុំគ្នានៅថ្ងៃទី៣០ មីនា ខាងមុខនេះ ដើម្បីចែករំលែកពិសោធន៍ក៏ដូចជាចង់ជួបជាមួយអតីតប្រធានសមាគមចាស់ៗ ដែលបានបង្កើត និងដឹកនាំសមាគមនេះតាំងពីដើមរៀងមក ។
រហូតមកទល់ពេលនេះ សមាគមទីភ្នាក់ងារទេសចរណ៍កម្ពុជា បានឈានដល់អាណត្តិទី៨ហើយ ។ សមាគមនេះ ដឹកនាំដោយលោកស្រី ជុង ច័ន្ទសោភា ជាប្រធានទី១ ។
ទាក់ទងនឹងការរៀបចំរាត្រីជួបជុំគ្នានេះលោក ហូ វណ្ឌី បានថ្លែងថា ការរៀបចំព្រឹត្តិការណ៍នេះ ជាការអបអរសាទរខួប២១ឆ្នាំរបស់សមាគមដែលមានសមាជិកជាង៤០០នាក់ ដើម្បីចែករំលែកបទពិសោធន៍ ក៏ដូចជាស្តាប់មតិយោបល់របស់រដ្ឋមន្ត្រីទេសចរណ៍កម្ពុជា ព្រោះសមាគមនេះ ជាសំឡេងតែមួយគត់របស់វិស័យឯកជន ដែលបានចាប់កំណើតមុនគេដើម្បីការធ្វើការងារជាដៃគូឯកជនរបស់រាជរដ្ឋាភិបាល ។
រដ្ឋមន្ត្រីក្រសួងទេសចរណ៍លោក ថោង ខុន បានថ្លែងថា លោកស្រីឆាយ ស៊ីវលីន បានដឹកនាំសមាគមនេះបានល្អ ដោយលោកស្រីបានចូលរួមគ្រប់សកម្មភាព និងការតាំងពិព័រណ៍នានាទាំងថ្នាក់ជាតិ និងអន្តរជាតិ ដែលជាការចូលរួមយ៉ាងសំខាន់ក្នុងការលើកកម្ពស់ និងផ្សព្វផ្សាយផលិតផលទេសចរណ៍កម្ពុជាទៅកាន់ថ្នាក់ជាតិ និងអន្តរជាតិ ។
តាមរបាយការណ៍ក្រសួងទេសចរណ៍បង្ហាញថា ភ្ញៀវទេសចរអន្តរជាតិ ដែលមកកម្ពុជាតាមផ្លូវអាកាសមានចំនួន៦២៩.៩២៧នាក់ ស្មើនឹង៦១,៤%នៃចំនួនសរុប កើនឡើង១៦,៥% ក្នុងនោះ ច្រកភ្នំពេញមានចំនួន២២៩.១៨៥នាក់ ស្មើនឹង២២,៣%នៃចំនួនសរុប កើនឡើង១៥,៥% ។ ច្រកសៀមរាបមានចំនួន៣៨៥.៤៥៩នាក់ ស្មើនឹង៣៧,៦%នៃចំនួនសរុប កើនឡើង១៣,៥% និងច្រកកងកេងមានចំនួន១៥.២៨៣នាក់ ស្មើនឹង១,៥% នៃចំនួនសរុប កើនឡើង៥៤៧,៣% ។
ចំណែកទីផ្សារទេសចរណ៍សំខាន់ៗទាំង១០ដែលមកកម្ពុជាក្នុងរយៈពេល២ខែដើម ឆ្នាំនេះធៀបនឹង២ខែដើមឆ្នាំ២០១៦ រួមមាន ៖ ចិនជាប់ចំណាត់ថ្នាក់លេខ១ មានចំនួន១៧២.៤៣៨នាក់កើនឡើង១៦,៧%។ វៀតណាមជាប់លេខ២ មានចំនួន១៤១.៣៩៤នាក់ថយចុះ០,៩%។ កូរ៉េជាប់ចំណាត់ថ្នាក់លេខ៣ មានចំនួន១០១.៤៩៩នាក់ថយចុះ២,១% តាមពីក្រោយដោយថៃជាប់លេខ៤ មានចំនួន៦៨.៧៦៥នាក់កើនឡើង១៨,៨%។ ឡាវជាប់ចំណាត់ថ្នាក់លេខ៥ មានចំនួន៦៥.៦៧៥នាក់កើនឡើង៦៤,៥% ខណៈអាមេរិកឈរនៅលេខរៀងទី៦ មាន៥៦.១០២នាក់កើនឡើង១០,៥% ។ ចំណែកជប៉ុនជាប់ចំណាត់ថ្នាក់ទី៧ មានចំនួន៤០.៧២០នាក់កើនឡើង១៤,១% តាមពីក្រោយដោយបារាំងជាប់ចំណាត់ថ្នាក់លេខ៨ មានចំនួន៣៨.៥៧៣នាក់កើនឡើង១២,៧% និងអង់គ្លេសស្ថិតនៅលេខរៀងទី៩ មានចំនួន៣៧.៦២៣នាក់កើនឡើង១០,៦% ខណៈអាល្លឺម៉ង់ មានចំនួន៣៤.៥៧៨នាក់ កើនឡើង៨,២% ស្ថិតនៅលេខរៀងទី១០ ៕
ចែករំលែកព័តមាននេះ