វាយកម្ទេចរថយន្តនិងអ្នកបើកបរ ក្រោយបង្កគ្រោះថ្នាក់ដ៏រន្ធត់ ក៏ព្រោះតែអស់ជំនឿលើប្រព័ន្ធតុលាការ?
រាជធានីភ្នំពេញ ៖ សោកនាដកម្មគួរឱ្យរន្ធត់មួយ ដោយគ្រោះថ្នាក់ចរាចរណ៍ដែលបង្កឡើងដោយរថយន្តឆ្លាមមួយគ្រឿង
រាជធានីភ្នំពេញ ៖ សោកនាដកម្មគួរឱ្យរន្ធត់មួយ ដោយគ្រោះថ្នាក់ចរាចរណ៍ដែលបង្កឡើងដោយរថយន្តឆ្លាមមួយគ្រឿង
រាជធានីភ្នំពេញ ៖ សោកនាដកម្មគួរឱ្យរន្ធត់មួយ ដោយគ្រោះថ្នាក់ចរាចរណ៍ដែលបង្កឡើងដោយរថយន្តឆ្លាមមួយគ្រឿង បើកបរក្នុងទិសដៅបញ្ច្រាសទិសទៅបុករះម៉ូតូជាច្រើនគ្រឿង បណ្តាលឱ្យមនុស្សចំនួន៣នាក់ស្លាប់ និង៧នាក់ផ្សេងទៀតរងរបួសធ្ងន់និងម្នាក់ៗស្ទើរស្លាប់ ស្ទើររស់វេលាម៉ោងជិត៦ល្ងាចថ្ងៃទី២៧ មីនា នៅចំណុចខាងមុខអតីតរោងចក្រកាត់ដេរ គួង ហុង វិថីព្រះមុនីវង្ស ក្នុងសង្កាត់ទន្លេបាសាក់ខណ្ឌចំការមន ។
អ្វីដែលគួរឱ្យកត់សម្គាល់នោះ គឺគ្រោះថ្នាក់ចរាចរណ៍នេះ បានបង្កឱ្យមានកំហឹងពីមហាជនបាននាំគ្នាវាយកម្ទេចរថយន្ត និងវាយដំអ្នកបើកបររថយន្តរបួសយ៉ាងធ្ងន់ធ្ងរផងដែរ ត្រូវបានសមត្ថកិច្ចធ្វើអន្តរាគមន៍រួចបញ្ជូនអ្នកបើកបររថយន្តទៅកាន់មន្ទីរពេទ្យមិត្តភាពខ្មែរ-សូវៀត(ពេទ្យរុស្សី) គឺបើកុំសមត្ថកិច្ចជួយទាន់សង្ស័យមិនរស់ទេ ក្នុងនោះក៏មានមតិមហាជនមួយចំនួនបានលើកឡើងផ្សេងៗគ្នាពីការប្រើហិង្សាមួយនេះផងដែរ ។
ជាការកត់សម្គាល់ នៃគ្រោះថ្នាក់ចរាចរណ៍ដ៏រន្ធត់ដែលបង្កឱ្យមានបាតុភាពខឹងសម្បាជាខ្លាំងនេះរហូតដល់បង្កជាហិង្សា ជាក់ស្តែងបើតាមការស្ទាបស្ទង់មតិ «ឧទាហរណ៍: ឃាត់ខ្លួនជនបង្កគ្រោះថ្នាក់ចរាចរណ៏បានភ្លាមៗ បើអ្នកនៅកន្លែងកើតហេតុ តើអ្នកគួរធ្វើអ្វី?» បានបង្ហាញអោយដឹងថា ៖ មតិចំនួន៤៨%បានបង្ហាញថា ត្រូវប្រគល់ឲ្យសមត្ថកិច្ច ទុកអោយតុលាការកាត់ទោសតាមផ្លូវច្បាប់ទៅ ។ ហើយមតិដែរថា វាយជនបង្កនោះ ទៅតាមកំហឹង គឺមានចំនួន២៧% ។ រីឯ ១១% ចូលជួយឃាត់អ្នកដទៃ ដែលវាយជនបង្ក ។ រួមនិងប្រហែល ១៤% ទៀតគឺនៅស្ងៀម ឈរមើល ឫថតវីដេអូបង្ហោះ Facebook ទៅវិញ ។ ទោះជាយ៉ាងណាក្តី នេះគ្រាន់តែជាការស្ទង់មតិមហាជនមួយចំនួនតែប៉ុណ្ណោះ មិនមែនឆ្លុះបញ្ចាំងពីទស្សនមតិរបស់ប្រជាពលរដ្ឋទូទាំងប្រទេសនោះឡើយ ។
ជាមួយគ្នានេះដែរមានមតិខ្លះលើកឡើងថា ប្រការដែលប្រជាពលរដ្ឋដើរតួជាចៅក្រមនេះ ក៏ព្រោះតែអស់ជំនឿលើប្រព័ន្ធតុលាការនៅស្រុកខ្មែរ ប៉ុន្តែក៏មិនត្រូវប្រើអ្វីតាមតែកំហឹងចិត្តនឹកឃើញឲ្យហួសពីផ្លូវច្បាប់នោះដែរ ។
បើតាមប្រភពព័ត៌មានពីសាក្សីច្រើននាក់នៅក្នុងហេតុការណ៍នោះ បានប្រាប់ឱ្យដឹងថា ខណៈពេលដែលពួកគាត់កំពុងតែអង្គុយលក់ភេសជ្ជៈនៅក្បែរនោះ ក៏ស្រាប់តែឭសំឡេងផាំងៗផ្ទួនៗគ្នាពេលក្រឡេកមើលទៅ ក៏បានឃើញរថយន្តមួយគ្រឿង កំពុងតែបើកបរក្នុងទិសដៅបញ្ច្រាសទិសបុករះម៉ូតូជាច្រើនគ្រឿងបន្តបន្ទាប់ ដូចបើករត់គេចពីអ្វីមួយ បណ្តាលឱ្យម៉ូតូដួលត្រៀបត្រាពេញផ្លូវជាបន្តបន្ទាប់ និងខ្ទាតជនរងគ្រោះប្រុសស្រីចំនួន៣នាក់ ហោះផ្លោងរំលងរបាំងថ្មពុះចែកទ្រូងផ្លូវធ្លាក់មកម្ខាងផ្លូវតែម្តង ។ ដោយសារករណីគ្រោះថ្នាក់ចរាចរណ៍នេះ បានបង្ករឱ្យមានមនុស្សជាច្រើននាក់ស្លាប់និងរងរបួសរដូករណែល ហើយម៉ូតូជាច្រើនគ្រឿងទៀតត្រូវបានរងការខូចខាតបានធ្វើឱ្យរូបគាត់មានការតក់ស្លុតយ៉ាងខ្លាំងផងដែរ ។
តាមប្រភពព័ត៌មានពីមន្ត្រីនគរបាលម្នាក់បានប្រាប់ឱ្យដឹងថា រថយន្តបង្កម៉ាកកាមរីឆ្លាម ពណ៌ទឹកមាស ពាក់ផ្លាកលេខភ្នំពេញ២M-២២៤៥ បានបើកបរដោយបុរសម្នាក់ឈ្មោះ មាស សុខហេង អាយុ៣០ឆ្នាំ មុខរបរលក់ទូរស័ព្ទ ស្នាក់នៅផ្ទះលេខ១១១ ផ្លូវជាតិលេខ២ ភូមិទួលរការ ក្នុងសង្កាត់ចាក់អង្រែក្រោម ខណ្ឌមានជ័យ ។ មុនពេលកើតហេតុ បុរសខាងលើបានបើករថយន្តរបស់ខ្លួនតែម្នាក់ឯងក្នុងទិសដៅពីជើងទៅត្បូងតាមផ្លូវធម្មតា ។ លុះមកដល់ចំណុចហាងលក់ម៉ូតូហុងដាមួយកន្លែងដែលមានទីតាំងនៅក្បែរកន្លែងកើតហេតុនោះ ក៏បានបើករថយន្តទៅប៉ះជាមួយនឹងរថយន្តមួយគ្រឿង ហើយក៏ព្យាយាមបើកគេចខ្លួន ។ លុះបើករត់គេចមកដល់ចំណុចកើតហេតុ ដោយសារផ្លូវមានសភាពចង្អៀតហើយឃើញផ្លូវបញ្ច្រាសទំនងជាទូលាយអាចបើកគេចបានទើបបុរសរូបនោះ ក៏បានបើករថយន្តឆ្លងទៅម្ខាងដែលជាផ្លូវបញ្ច្រាសទិសក្នុងបំណងព្យាយាមបើកគេចខ្លួនក្នុងល្បឿនយ៉ាងលឿន ក៏បានជ្រុលទៅបុករះម៉ូតូជាច្រើនគ្រឿង និងមនុស្សជាច្រើននាក់បណ្តាលឱ្យស្លាប់ និងរងរបួសរដូករណែលពេញផ្លូវតែម្តង ។ ភ្លាមៗនោះរថយន្តនិងអ្នកបើកបរ ត្រូវបានក្រុមអ្នកធ្វើចរាចរណ៍មិនដឹងអ្នកណាខ្លះទេ យ៉ាងច្រើននាំគ្នាធ្វើការឡោមព័ទ្ធដេញចាប់ឃាត់បាន ដោយអ្នកខ្លះបាននាំគ្នាចោមរោមវាយដំទៅលើអ្នកបើកបររូបនោះ ដូចទឹកបាក់ទំនប់ បណ្តាលឱ្យរងរបួសយ៉ាងធ្ងន់ធ្ងរហើយកុំតែមានការរារាំងអំពីសំណាក់កម្លាំងមានសមត្ថកិច្ចជាច្រើននាក់នោះ ម្លេះនឹងឈានទៅដល់ការស្លាប់បាត់បង់ជិវិតដោយសារតុលាការលើដងផ្លូវមិនខានឡើយ ៕
ចែករំលែកព័តមាននេះ