ឃាត់ខ្លួនចោរលួចកាច់សោកម៉ូតូ និងមុខសញ្ញាជួញដូរគ្រឿងញៀនយ៉ាងសកម្មនៅជាយដែន
ខេត្តបន្ទាយមានជ័យ ៖ កម្លាំងនគរបាលជំនាញផែនកណ្តាលព្រហ្មទណ្ឌ ដោយសហការណ៍ជាមួយកម្លាំងនគរបាលវរសេនាតូចការពារព្រំដែនគោកលេខ៨០៧
ខេត្តបន្ទាយមានជ័យ ៖ កម្លាំងនគរបាលជំនាញផែនកណ្តាលព្រហ្មទណ្ឌ ដោយសហការណ៍ជាមួយកម្លាំងនគរបាលវរសេនាតូចការពារព្រំដែនគោកលេខ៨០៧ និងនគរបាលក្រុងប៉ោយប៉ែត ព្រមទាំងកម្លាំងនគរបាលការិយាល័យប្រឆាំងគ្រឿងញៀន ចុះធ្វើការស្រាវជ្រាវលើករណីចោរតែងតែធ្វើសកម្មភាព លួចកាច់សោកយកម៉ូតូ ក្នុងភូមិសាស្ត្រ ស្រុកថ្មពួក និងក្រុងប៉ោយប៉ែត បានឈានដល់រកឃើញមុខសញ្ញាជនសង្ស័យប្រុស-ស្រីចំនួន៨នាក់។ ដែលជាមុខសញ្ញាចោរលួចកាច់សោកយកម៉ូតូ និងមុខសញ្ញាជួញដូរ និងប្រើប្រាស់គ្រឿងញៀនយ៉ាងសកម្ម នៅឯជាយដែននៃស្រុកថ្មពួក ខេត្តបន្ទាយមានជ័យ ត្រូវបានចាប់ឃាត់ខ្លួនជាបន្តបន្ទាប់បញ្ជូនខ្លួន រួមទាំងវត្ថុតាងទៅសាលាដំបូងខេត្តបន្ទាយមានជ័យ នាថ្ងៃទី២៧ មីនា ២០១៧ ហើយដែរ។
លោកវរសេនីយ៍ទោ ខែម សោភ័ណ នាយការិយាល័យ នគរបាលព្រហ្មទណ្ឌកម្រិតស្រាល បានឲ្យដឹងថា បន្ទាប់ពីសមត្ថកិច្ចបានធ្វើការបង្ក្រាបមុខសញ្ញាកាច់សោកម៉ូតូ និងជួញដូរគ្រឿងញៀន២នាក់ប្តីប្រពន្ធ ដែលមានឈ្មោះ វ៉ាន់ ភាព ជាប្តី និងប្រពន្ធឈ្មោះ ឡៅ មុំ មក។ កម្លាំងសមត្ថកិច្ចបានបន្តធ្វើការស្រាវជ្រាវបន្ថែមទៀតរហូតឈានដល់ការបង្ក្រាបចាប់ឃាត់ជាបន្តបន្ទាប់ចំនួន៨នាក់ ពីបទជួញដូរគ្រឿងញៀន រួមទាំងដកហូតបានវត្ថុតាងថ្នាំញៀនជិត៥ពាន់គ្រាប់ និងអាវុធខ្លី១ដើម តាមបទបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្ត និងមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ។
លោកឧត្តមសេនីយ៍ត្រី សិទ្ធ ឡោះ ស្នងការរង ទទួលផែនកណ្តាលនគរបាលព្រហ្មទណ្ឌ និងលោកវរសេនីយ៍ឯកចាប សុផាប្ញទ្ធិ ក៏បានបញ្ជាក់ថា ជនសង្ស័យទាំង៨នាក់ជាមុខសញ្ញាជួញដូរគ្រឿងញៀននេះ ឈ្មោះ ១- គី ផា ភេទប្រុសអាយុ៥០ឆ្នាំ នៅភូមិនបន្ទាយមានរិទ្ធ ឃុំគោករមៀត ស្រុកថ្មពួក ជាម្ចាស់ផ្ទះ ឆែកឆេររកឃើញថ្នាំញៀនចំនួន២៨៤២គ្រាប់,២-ទេព ចិន្តា ភេទស្រី អាយុ៥០ឆ្នាំ នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ,៣-ឡាច ចន ភេទប្រុសអាយុ៥០ឆ្នាំ នៅភូមិសាមគ្គី ឃុំគោករមៀត ,៤-ហឿង ចាន់ណាន ហៅមុំ ភេទស្រី អាយុ៥៣ឆ្នាំ នៅភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែត,៥-សេង រ៉េត ភេទស្រី អាយុ៥៣ឆ្នាំ នៅភូមិត្រពាំងសំរោង ឃុំគោករមៀត ,៦-ម៉ាង គុយ ហៅ ចាន់ វឿង ភេទប្រុស អាយុ៥៨ឆ្នាំ នៅភូមិបន្ទាយមានរិទ្ធ ឃុំគោករមៀត,៧- លី ណុយ ភេទប្រុស អាយុ៣៧ឆ្នាំ នៅភូមិសាមគ្គី ឃុំគោករមៀត ,៨- ជួន រ៉ា ភេទប្រុស អាយុ២០ឆ្នាំ នៅភូមិសាមគ្គី ឃុំគោករមៀត ស្រុកថ្មពួក ខេត្តបន្ទាយមានជ័យ។
ជាមួយនឹងការបង្ក្រាបនេះ សមត្ថកិច្ចបានធ្វើការដកហូតបានថ្នាំញៀនប្រភេទមេតំហ្វេតាមីន សរុបទាំងអស់ចំនួន ៤៨៤២គ្រាប់ និងអាវុធខ្លី ម៉ាក K.59 មួយដើម មុខសញ្ញាទាំងនេះអ្នកខ្លះធ្លាប់ជាប់ពន្ធនាគារពី១ឆ្នាំ ខ្លះទៀត២ឆ្នាំក៏មាន។ លោកឧត្តមសេនីយ៍ត្រី សិទ្ធ ឡោះ បានបញ្ជាក់ផងដែរថា ឆ្លងតាមការស៊ើបអង្កេតរបស់សាមីខ្លួន ដែលបានឆ្លើយសារភាព ប្រទាក់គ្នាលើបញ្ហារកស៊ីថ្នាំញៀន និងការឆែកឆេររកឃើញវត្ថុតាងជាក់ស្តែងនោះ សមត្ថកិច្ចបានរៀបចំសំណុំរឿងបញ្ជូនខ្លួនទៅសាលាដំបូងខេត្តហើយដែរ៕
ចែករំលែកព័តមាននេះ