ខេត្តស្វាយរៀង ៖ បុរសម្នាក់រងរបួសធ្ងន់ធ្ងរ បែកក្បាល បែកមុខ និងរលាត់ដៃជើងសន្លប់ស្តូកស្តឹង បណ្តាលមកពីរថយន្តហាយឡែនឌ័របុកម៉ូតូពីក្រោយអូសជាង២០ម៉ែត្រ
ខេត្តស្វាយរៀង ៖ បុរសម្នាក់រងរបួសធ្ងន់ធ្ងរ បែកក្បាល បែកមុខ និងរលាត់ដៃជើងសន្លប់ស្តូកស្តឹង បណ្តាលមកពីរថយន្តហាយឡែនឌ័របុកម៉ូតូពីក្រោយអូសជាង២០ម៉ែត្រ សន្លប់នៅនឹងកន្លែង។ គ្រោះថ្នាក់ចរាចរណ៍ដ៏រន្ធត់នេះកើតឡើងកាលពីវេលាម៉ោង២ និង៤០នាទីរសៀល ថ្ងៃទី២៨ ខែមីនា ឆ្នាំ២០១៧ នៅលើកំណាត់ផ្លូវជាតិលេខ១ ស្ថិតនៅភូមិចំបក់ សង្កាត់ចេក ក្រុងស្វាយរៀង។
យោងតាមសាក្សីបានឲ្យដឹងថា មុនពេលកើតហេតុមានបុរស់ម្នាក់ឈ្មោះ ពក យ៉េន អាយុ៤៩ឆ្នាំ មានទីលំនៅភូមិអង្គារដី ឃុំតាសួសស្រុកស្វាយជ្រំ បានជិះម៉ូតូម៉ាកហុងដាវ៉េវពណ៌ខ្មៅ អត់ស្លាកលេខ ដោយធ្វើដំណើរពីទិសខាងកើត មកលិច លើកំណាត់ផ្លូវជាតិលេខ១ លុះដល់ចំណុចកើតហេតុខាងលើ ស្រាប់តែមានរថយន្តមួយគ្រឿងម៉ាកហាយឡែនឌ័រ ពណ៌ត្រីឆ្លូញ ពាក់ស្លាកលេខ ភ្នំពេញ 2AE-6233 បើកបរដោយបុរសចំណាស់ម្នាក់មិនអត្តសញ្ញាណបើកបរពីទិសខាងកើត ទៅលិចស្របទិសគ្នា មិនដឹងយ៉ាងម៉េចស្រាប់តែរេចង្កូតទៅបុកជនរងគ្រោះពីក្រោយពេញទំហឹង លាន់សូរដូចរន្ទះបណ្ដាលឲ្យម៉ូតូដួលទៅលើទ្រូងថ្នល់ រួចអូសទាំងម៉ូតូ និងមនុស្សទៅមុខជាង២០ម៉ែត្រ បណ្តាលឲ្យជនរងគ្រោះបោកក្បាលទៅលើថ្នល់បែកក្បាលបែកផ្ទៃមុខធ្ងន់ធ្ងរនិងដាច់ស្មាសងខាង រលាត់ដៃជើង សន្លប់នៅក្នុងថ្លុកឈាម។
ចំណែករថយន្តបានជ្រុលធ្លាក់ចូលក្នុង វាលស្រែទៅបុកនឹងគុម្ពោតព្រៃទើបទៅមុខលែងរួច។ ប្រភពដដែលបន្តទៀតថា ក្រោយកើតហេតុ ប្រមាណ១នាទី ស្រាប់តែអ្នកបើកបរបើករថយន្តថយក្រោយត្រលប់ក្បាលមកទិសខាងកើតវិញទាំងខ្លួនរងរបួសផងដែរ រួចក៏បើកទ្វារថយន្តរត់គេចខ្លួនបាត់ភ្លាមៗ ទុករថយន្តចោលនៅជិតកន្លែងកើតហេតុ។ រីឯជនរងគ្រោះត្រូវបានប្រជាពលរដ្ឋរាយការណ៍មកសមត្ថកិច្ចមូលដ្ឋានហៅរថយន្តសាមុយដឹកមកកាន់មន្ទីរពេទ្យខេត្តដើម្បីសង្គ្រោះ។ បន្ទាប់មកសមត្ថកិច្ចបានធ្វើការវាស់វែងរួចអូសរថយន្តបង្ក និងម៉ូតូមកកាន់អធិការដ្ឋាននគរបាលក្រុងស្វាយរៀងដើម្បីចាត់ការតាមនីតិវិធី។ ចំណែកស្ត្រីជាប្រពន្ធបានប្រាប់ឲ្យដឹងថា កូនស្រីរបស់គាត់មានជំងឺជាទម្ងន់ ត្រូវបញ្ជូនមកសម្រាកព្យាបាលនៅក្នុងមន្ទីរពេទ្យខេត្តស្វាយរៀង។
ហើយប្តីរបស់គាត់គឺនៅចាំផ្ទះ លុះមុនពេលកើតហេតុគឺបានមកសួរសុខទុក្ខកូនស្រីនៅក្នុងមន្ទីរពេទ្យខេត្តរួចបានជិះម៉ូតូទៅផ្សារវាលយន្តស្វាយរៀង ដើម្បីទិញម្ហូបធ្វើយកមកឲ្យប្រពន្ធ និងកូននៅមន្ទីរពេទ្យក្រោយពីទិញម្ហូបបានហើយក៏យកម្ហូបទៅផ្ទះខណៈកំពុងជិះម៉ូតូក៏ត្រូវរថយន្តហាយឡែនឌ័របុកពីក្រោយតែម្តង។ សមត្ថកិច្ចកំពុងស្រាវជ្រាវតាមចាប់ជនបង្កមកទទួលខុសត្រូវតាមច្បាប់ ហើយបានបង្ហើបថា បានស្គាល់អត្តសញ្ញាណហើយ។ សមត្ថកិច្ចបានសន្និដ្ឋានថា មូលហេតុអ្នកបើកបររថយន្តមានល្បឿនលឿនខ្វះការប្រុងប្រយត្ន័ហើយសង្ស័យបើកបរក្នុងស្ថានភាពស្រវឹង៕
ចែករំលែកព័តមាននេះ