រាជធានីភ្នំពេញ ៖ ក្រុមក្មេងស្ទាវប្រុស-ស្រីមួយក្រុម បានបើកថយន្តស៊េរីទំនើបម៉ាកឡិចស៊ីសGS៣០០មួយគ្រឿង ក្នុងល្បឿនយ៉ាងលឿនជ្រែគេឯងពេញផ្លូវ បានជ្រុលទៅបុករះរថយន្តឡង់គ្រីស្ស័រ និងកូរ៉ូឡាជាបន្តបន្ទាប់គ្នាបណ្តាលឱ្យរងការខូចខាតយ៉ាងដំណំ តែសំណាងល្អមិនបង្កឱ្យមានមនុស្សណាម្នាក់រងរបួសទេកាលពីវេលាម៉ោង១២និង៤៥នាទីរសៀលថ្ងៃទី២៧ មីនា នៅតាមបណ្តោយផ្លូវលេខ៦៣(ត្រសក់ផ្អែម)ក្នុងសង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីសមត្ថកិច្ចមូលដ្ឋានម្នាក់បានប្រាប់ឱ្យដឹងថា មុនពេលកើតហេតុគេបានឃើញរថយន្តឡិចស៊ីសGS៣០០ពណ៌ស ពាក់ផ្លាកលេខភ្នំពេញ២AM-៤០៥៦មួយគ្រឿងបើកបរដោយក្មេងស្ទាវមួយក្រុម មានប្រុស មានស្រីជាច្រើននាក់ បើកបរក្នុងល្បឿនយ៉ាងលឿនជ្រែគេឯងពេញផ្លូវ ។ លុះមកដល់ចំណុចខាងលើ រថយន្តឡិចស៊ីសនោះប្រុងនឹងបើកជែងរថយន្តកូរ៉ូឡា ពណ៌ទឹកមាស ពាក់ផ្លាកលេខភ្នំពេញ២AA-១១៥២មួយគ្រឿងដែលបើកនៅខាងមុខ ។
ប្រភពដដែល បានប្រាប់បន្តទៀតថា ស្របពេលនោះ ក៏មានរថយន្តមួយគ្រឿងទៀតមកពីមុខ ហើយអ្នកបើកបររថយន្តឡិចស៊ីសនោះបួងចង្កូតគេចតែមិនផុតក៏ជ្រុលទៅបុកចំកង់ក្រោយរថយន្តក៉ូរ៉ូឡាមួយគ្រឿងរួចបន្តទៅបុករថយន្តម៉ាកឡង់គ្រីស្ស័រ ពណ៌ទឹកប្រាក់ ពាក់ផ្លាកលេខភ្នំពេញ២Y-២២៦៦មួយគ្រឿងទៀតដែលនៅខាងមុខបណ្តាលឱ្យរងការខូចខាតយ៉ាងដំណំ តែសំណាងល្អមិនបង្កឱ្យមានមនុស្សណាម្នាក់គ្រោះថ្នាក់ទេ ។
តាមប្រភពព័ត៌មានពីប្រជាពលរដ្ឋដែលមានផ្ទះនៅក្បែរកន្លែងកើតហេតុបានខ្សឹបប្រាប់ឱ្យដឹងផងដែរថា ជារៀងរាល់ថ្ងៃរថយន្តម៉ាកឡិចស៊ីសGS៣០០ខាងលើនេះ តែងបើកបរដោយក្រុមក្មេងស្ទាវៗក្នុងល្បឿនយ៉ាងលឿន និងបង្កឱ្យមានការព្រួយបារម្ភដល់ពួកគាត់ដែលមានផ្ទះសម្បែងនៅក្បែរចិញ្ចើមផ្លូវយ៉ាងខ្លាំង ។
ក្រោយពេលកើតហេតុ កម្លាំងនគរបាលចរាចរណ៍ខណ្ឌចំការមន បានចុះមកដល់កន្លែងកើតហេតុនិងជួយសម្រួលឱ្យភាគីរថយន្តទាំង២គ្រឿងធ្វើការដោះស្រាយគ្នា ដោយភាគីរថយន្តបង្កយល់ព្រមចេញថ្លៃជួសជុលឱ្យរថយន្តរងគ្រោះដើម្បីបញ្ចប់រឿងនៅនឹងកន្លែងកើតហេតុ៕
ចែករំលែកព័តមាននេះ