រាជធានីភ្នំពេញ ៖ បុរសម្នាក់សង្ស័យស្រវឹងស្រានិយាយទូរស័ព្ទជាមួយសង្សារដេកលក់មួយភាំងនៅលើចិញ្ចើមផ្លូវរថភ្លើង ហើយត្រូវរទេះភ្លើងកិនស្លាប់យ៉ាងអាណោចអាធ័ម។ ហេតុការណ៍នេះ
រាជធានីភ្នំពេញ ៖ បុរសម្នាក់សង្ស័យស្រវឹងស្រានិយាយទូរស័ព្ទជាមួយសង្សារដេកលក់មួយភាំងនៅលើចិញ្ចើមផ្លូវរថភ្លើង ហើយត្រូវរទេះភ្លើងកិនស្លាប់យ៉ាងអាណោចអាធ័ម។ ហេតុការណ៍នេះបានកើតឡើងកាលពីវេលាម៉ោង២រំលងអធ្រាត្រឈានចូលថ្ងៃទី២៨ ខែមីនា ឆ្នាំ២០១៧ ស្ថិតនៅតាមបណ្ដោយផ្លូវរថភ្លើង ក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ។
សពជនរងគ្រោះត្រូវបានគេស្គាល់ឈ្មោះ មឿន ឈុន អាយុ២៨ឆ្នាំ មុខរបរកម្មកររោងចក្រ និងបញ្ចូលបទភ្លេង ស្នាក់នៅផ្ទះជួលក្នុងភូមិកើតហេតុខាងលើ មានស្រុកកំណើតនៅភូមិត្រពាំងខ្នារ ឃុំនិទាន ស្រុកបសេដ្ឋ ខេត្តកំពង់ស្ពឺ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញជនរងគ្រោះអង្គុយបញ្ចូលបទភ្លេងដូចសព្វដង ។ លុះក្រោយមកជនរងគ្រោះទៅផឹកស្រាជាមួយមិត្តភក្ដិ រួចក៏ទូរស័ព្ទនិយាយលេងជាមួយនឹងសង្សារ សង្ស័យតែដេកលក់មួយភាំងនូវលើចិញ្ចើមផ្លូវរថភ្លើង ក៏ត្រូវរទេះភ្លើងកិនស្លាប់យ៉ាងអាណោចអាធ័ម ។
បន្ទាប់មកមានប្រជាពលរដ្ឋដែលរស់នៅក្បែរកន្លែងកើតហេតុដើរមកឃើញ ទើបរាយការណ៍ប្រាប់កម្លាំងនគរបាលមូលដ្ឋានចុះទៅពិនិត្យ ដោយសាច់ញាតិបងប្អូនជនរងគ្រោះពុំបានប្ដឹងប្តល់ទេ គ្រាន់តែសុំយកសពទៅធ្វើបុណ្យ ទើបកម្លាំងនគរបាលមូលដ្ឋានសហការជាមួយនគរបាលខណ្ឌប្រគល់ទៅក្រុមគ្រួសារនៃសព។
បច្ចុប្បន្ននេះសពជនរងគ្រោះត្រូវបានកម្លាំងនគរបាលមូលដ្ឋានសហការជាមួយនគរបាលខណ្ឌប្រគល់ទៅឱ្យក្រុមគ្រួសារនៃសពយកទៅធ្វើបុណ្យតាមប្រពៃណី ៕
ចែករំលែកព័តមាននេះ